تمثال مجدي يعقوب اخد 100 ساعة شغل

للسنة التانية على التوالي يتفاجيء الناس بتمثال ضخم متقن الصنع، معمول لشخصية من اللي محفورين في قلبهم. السنة اللي فاتت كان محمد صلاح، والسنة دي التمثال للدكتور مجدي يعقوب.

وزي ما أرض أسوان استقبلت مركز مجدي يعقوب الضخم والمتطور لعلاج القلب، طميها صنع منه الدكتور محسن سليم مدرس النحت الميداني بكلية فنون جميلة جامعة أسيوط-  تمثال له بأربع أحجام الحجم الطبيعي-.

وضح الدكتور محسن في تصريحات لـ “بس في مصر” إن تمثال مجدي يعقوب بدأ الشغل فيه بناء على تكليف من محافظة أسوان لصنعه عشان يتحط في حديقة مركز القلب بأسوان، ومصنوع بالحجم دة عشان يكون مناسب لوضعه في مكان كبير ومفتوح، ودة عكس تمثال محمد صلاح اللي عمله “سليم” السنة اللي فاتت كمبادرة شخصية منه وتعبير عن حبه لللاعب الشهير، ومازال محتفظ بيه عنده لحد دلوقتي.

صُنع تمثال مجدي يعقوب أخد 100 ساعة شغل متوزعين على 3 أسابيع، ولسة دة مش شكله النهائي لأن “خامة الطين دي مش دايمة، لسة هيتعمل منها قالب عشان يتحول لـ”فايبر جلاس” أو بلاستر” زي ما عبر “سليم”.

الدكتور محسن سليم بيشتغل كمدرس في كلية فنون جميلة من 22 سنة.  كان بيدرس في جامعة المنيا لحد ما تم افتتاح واحدة بأسيوط فاتنقل لها من 3 سنوات، وله أعمال قائمة في ميدانين من ميادين محافظة أسيوط، الأول هو تمثال بميدان جمال عبد الناصر، بارتفاع 4.5 متر وعلى قاعدة 4 متر، وآخر للزعيم عمر مكرم بارتفاع 5 متر وعلى قاعدة 4.5 متر.

على جانب تاني اشترك في معرض “وجوه مصرية” اللي بدأ في كلية فنون جميلة ثم اتنقل لقصر ثقافة أسيوط، وكان بيضم 18 بورتريه لرؤساء جامعات وفنانين وعدد من المشاهير.

في النهاية بيعبر “سليم”: “فيه شخصيات كتير الواحد يتمنى يعملهم ثماثيل بعد مجدي يعقوب أهمهم الدكتور أحمد زويل”.