14 كدبة بنقولهم لنفسنا كل يوم
الكدب هو تغيير الحقيقة، تغيير شكلها أو تأثيرها أو دوافعها، ولأن الكدب صفة شريرة أو سيئة السمعة، اخترعنا حاجات زي “الكدب الأبيض”، أو “التجمل” عشان يعني نقول إن “ماكانش قصدنا حاجة وحشة!” أو ما ضريناش حد! ومن نفس المنطلق ظهر تعبير “إنك بتكدب على نفسك”.
في حاجات إنسانية اجتماعية حياتية بنكدب على نفسنا فيها كل يوم، ولأنك لما بتكدب على نفسك ما بتضرش حد، فمش هيتوجهلك اتهام إنك عملت حاجة غلط، لكن هتلاقي ضحكة بتقولك إنت كداب.. زيي بالظبط!
ومن الجمل الخالدة في حياتنا في ذلك السياق:
1- هروح الجيم
الكدبة الأكبر في حياة كل واحد وبنت، والجيم هو تقريبًا المكان الوحيد اللي بندفعله عشان نريح ضميرنا مش عشان نروح فعلاً!
2- هبدأ ريجيم
طبعًا هي معروفة إن الريجيم دايمًا هيبدأ من أول بكرة.
3- هاكل أكل صحي
زي المثال الشهير لما ماما أما بتشوف قنوات الطبخ باستمرار وبتعمل مكرونة وبانيه في الأخر، إحنا كمان بنقرا باستمرار عن فوايد الأكل الصحي لتحسين المود العام والحفاظ على صحتك وكله كلام جميل قابل للتنفيذ لمدة ساعتين أول اليوم بس، وبعدين شوفولنا بقى هناكل إيه إنهاردة!
4- هنام بدري
بعد ما تصحى لما المنبه يخلص كل الفقرات اللي عنده، بتقرر إنك لازم تنام بدري عشان دة ما يتكررش تاني، وتقريبًا مش بتفتكر حاجة عن الموضوع غير نفس المعاد اليوم اللي بعده.
5- هروح الشغل بدري
راجع “هنام بدري”
6- هكسر الدنيا في الويك إيند
من المعروف إن الأسبوع هدفه الأول والأخير هو الوصول للويك إيند، والآمال دي بتتوج بتسجيل رقم قياسي جديد في النوم المتواصل.
7- هشوف حلقة واحدة وأنام
من أكبر الأساطير في حياتنا، لما تاخد قرار إنك هتبدأ مسلسل “تشوف منه شوية” النهاردة وتنام.. خلي بالك.. فيه سحب جوة!
8- هحوش الشهر دة
حاجات ما بنلحقش ناخد بالنا إننا كدبنا على نفسنا فيها.. في الغالب الفلوس بتكون خلصت قبل ما نفكر!
9- مش هشتري حاجات مالهاش لازمة
لما بتحذر نفسك من حاجة زيادة بتسيطر عليك، ومن خوفك منها بتعملها.. ولما بتقول لنفسك مش هشتري حاجة مش محتاجها بينتهي بيك الأمر جايب حاجة عندك منها عشرين قبل كدة، أو حاجة مالهاش أي استخدام في حياتك!
10- هذاكر من أول السنة
وكم من أيام عدت ومواد اتشالت وسنين اتعادت وكانت بادئة بـ “هذاكر من أول السنة”.
11- هقرا اللي عندي الأول مش هشتري جديد
كل مدمنين الكتب ومحبينها واللي عندهم صراع بين تأنيب الضمير إنهم لسة ما خلصوش الكتب اللي اشتروها، وبين حب اقتناء كل الكتب اللي في الحياة، عارفين إن “هقرا اللي عندي الأول” هي أول مقاومة إغراء إنه يشتري كتب جديدة عجباه وبتنتهي بإنه يطلع مديون لشهرين قدام!
12- ماعنديش هدوم
الشكوى اللي لو كانت مناخير البني آدمين بتطول زي “بنوكيو” كان البنات ماعرفوش يتحركوا بسببها.
13- ماحدش مهتم بيا
لما بتعمل تبريرات لكل الهبوط والارتفاع في حياتك بشكل درامي، هنا بيتغير الاتجاه، وبتبدأ لما تكدب على نفسك تعطلها وتحبطها بشكل حقيقي.
14- أنا مش حد كويس
على نفس النمط التبريرات المبالغة لكل كبوة أو عطلة أو حتى غلطة تحصل في حياتك.
في الآخر لما بنقول لنفسنا أي تبرير أو تحوير بنبقى عايزين نريحها، عايزين نعمل اللي عايزينه من غير ما نحس بالتقصير، ولأنها كدبنا على نفسنا أصبح حقيقة وجودية ماحدش بيزعل أما بتقوله إنت كداب.. زيي بالظبط!