سافر من غير ما تسافر
يقول أنيس منصور, هناك ثلاثة انواع من الرحلات: ان تسافر, و ان تقرأ الكتب, و ان تقرأ كتب الرحلات..
على دخول الصيف, و في ظل السفريات الكتير اللي بتحصل حوالينا, فيه اللي مطحون في عجلة الروتين و مش عارف يسافر او حتى يطلع يشم نفسه يومين بره بلده!
و عشان احنا كتير و لسنا بقليل , ولان كل مشكلة لا بد لها من حل , اختارنالك 5 كتب خفيفة و لطيفة هتخليك تسافر من وانت في مكانك.
– مسافر الكنبة في إيران
في الكتاب دا ، عمرو بدوي بيخطفك برشاقة كلماته إلى “بلاد فارس” و بيوصف مغامراته فيها خلال عشرين يوم ..
بيختلف الكتاب دا عن باقي الكتب في انه بيوصف التجربة الإيرانية من الداخل، من حيث الحواري و الناس و الأزقة ، بطريقة درامية و كوميدية، يتخللها القليل من الاكشن.
– حول العالم في ٢٠٠ يوم
واحد من أشهر كتب الرحلات .. بيصور أنيس منصور مغامرته اللي استمرت لمدة ٢٠٠ يوم ، خصوصا في دول جنوب شرق آسيا مثل الهند وسيلان وسنغافورة وأستراليا واليابان والفلبين وهونج كونج، ثم زيارته أيضا للولايات المتحدة الأمريكية وجزيرة هاواي!
بالرغم من أن بعض المعالم المذكورة في الكتاب اندثرت مع مرور الزمن، و لكن هيفضل الكتاب دا من افضل الكتب اللي ممكن تقراها و تستمتع بيها بسبب طريقة انيس منصور المشوقة في السرد و تصوير التفاصيل لكل بلد.
– أعجب الرحلات في التاريخ
لو كنت من المهتمين بتاريخ اكتشاف القارات والبلدان ، ف الكتاب دا اكيد ليك!
الكتاب بردو من تأليف المبدع دائما أنيس منصور ، بياخدك فيه لعالمه الخاص و شغفه الدائم المتعلق بالسفر و اكتشافات الأولين للقارات و البلاد الحديثة في مسلسل زمني منظم و مفصّل.
الكتاب ظريف و خفيف ، و بيعكس روح و خفة دم أنيس منصور و عرضه الصحفي المعروف باختصاره و دقته, و بيدي القارئ جرعة مكثفة و كافية جدا لإعطائه ما يريد من المعلومات.
– رحلة في زمن النوبة
كتاب للمؤلفيّن محمد رياض و كوثر عبد الرسول.
بيرجع بينا المؤلفين لسنة ٦٢ قبل التهجير في منطقتي كوم إمبو و إسنا ، و بيعرضوا فيها شكل الحياة الاجتماعية لأهل النوبة ، و التاريخ الحضاري هناك.
الكتاب مفيد جدا للي عاوز يتعرف على “بلاد النوبة” ، اللي كانت ملتقى حضارات العصور القديمة ، و جزء مهم جدا من التاريخ القديم ، واللي تعرضت بشكل كبير للظلم و الاهمال من قبل الحكومات المتتابعة.
– هوستيل
” لكل قطعة من الارض و لكل جدار فوقها, قصة تستحق ان تروى” .. بهذه الكلمات بدأت شيرين عادل كتابها عن رحلتها الشخصية لمجموعة محترمة من الدول , و خصوصا الأوروبية منها!
كتاب هوستيل هو تاني كتاب لشيرين بعد كتاب “رحلة في بلاد الفرنجة” اللي كانت بتتكلم فيه عن تجربتها في فرنسا فقط, بس اللي بيميز “هوستيل” , هو انه هيقدر يشبع بعض من رغبة السفر الموجودة جوا كل شاب نفسه يسافر و يشوف العالم, دا غير انه هيستفزك عشان تعمل ابحاثك عن البلاد المذكورة في الكتاب و تطلع باكبر معلومات ممكنة عنها! و كل دا بسبب اللي بتوصله الكاتبة بطريقة كتابتها و خفة ظلها و اضافة تجاربها الشخصية في كل بلد.
