شوفوها بعيوننا: حملة مصرية بعيون شباب مصرية
رغم ان لكل واحد مننا نظرة مختلفة، وذوق مختلف، اماكن بنتفق عليها واماكن بنختلف عليها لكن شوفتوها بعيوننا؟
“شوفوها بعيوننا” حملة اطلقها شاب مصري رفض يكون فرد من جيل تايه، حملة جمعت بين الشغف والهواية والموهبة وحبه لبلده، حملة ساعدت العالم يشوفوها بعيون مختلفة.
مؤمن الشناوي قاضي مصري في منتصف التلاتينات قدر يجمع بين حياته العملية وبين احترافه التصوير اللي اتحول لحملة شوفوها بيعيوننا؟.
ازاي جاتله الفكرة؟ ازاي قدر ينفذها؟ ازاي وصل للنجاح اللي حققه؟ ايه خططته الفترة اللي جاية؟
عشان كدة قرر فريق بس في مصر ياخدكوا جوله مع مؤمن الشناوي في شوفوها بعيوننا.
في البداية نحب نعرف ازاي جاتلك فكرة حملة شوفوها بعيوننا؟
بدأت فكرة الحملة لما اتكلمت مع صحابي بره مصر وعرضت علهيم انهم يجوا زيارة لمصر، واتفاجئت من رد فعلهم واعتراضهم انهم يجوا مصر والفكرة الغلط المأخوذة عن البلد. اتضايقت جدا وقررت بما اني بحب السفر اني اعمل فيديوهات عن كل مكان اروحه جوا مصر لتصحيح الفكرة المتاخده عن مصر. وبالفعل كنت موجود في الصيف في اسكندرية وبدأنا “اول فيديو للأسكندرية ” في الصيف ولقينا نجاح كبير جدا عليه على السوشيال ميديا واطلب مننا نعمل فيديو تاني عن اسكندرية في الشتا وبالفعل نزلت على السوشيا ميديا لو حد حابب يشارك في الفيديو وقابلت ناس كتير جدا. كان اهم حاجة بندور عليها في كل شخص هو شغفه وفعلا عملنا اول فريق عمل لحملة شوفوها بعيوننا وفي منهم اللي مكملين معانا لحد دلوقتي زي جاسر قاسم ومصطفى شلبي.
هل واجهتك صعوبة في تكوين فريق العمل؟
الحقيقة كلنا كان هدفنا واحد وهو ان الفيديو يطلع بأحسن شكل ممكن و بيجمعنا نفس الشغف عشان كدة الفيديو قدر يوصل للناس كلها ويحقق النجاح ده. وبالفعل تم تكريمنا من محافظ الأسكندرية وتم اختيار محافظة الاسكندرية لتنظيم المؤتمر الدولي للمتاحف وتفوقه على “اولسو وبراغ” بسبب فيديو اسكندرية.
ازاي قدرت تنمي هوايتك في التصوير بجانب حياتك العملية كقاضي؟
في الحقيقة في الاول كنت زي اي شاب بيحاول يلاقي شغفه في اي حاجة، مارست انواع مختلفة من الرياضة والكتابة وركوب الموتسيكلات لحد ما لقيت نفسي فعلا في التصوير. بقيت بلاقي سعادتي فعلا في كل مرة بشوف فيها الشخص اللى قدامي عينه بتلمع قدام اي صورة باخدها وبالفعل بدأت دورات تدريب في الاضاءة والتصوير السينمائي عشان تساعدني على تنمية موهبتي وشغفي وفي نفس الوقت تساعدني في توصيل صورتنا للعالم كله بس بعيوننا.
ايه اكتر الصعوبات اللي بتواجهك اثناء تصويرك لأى فيديو؟
من اكتر الصعوبات اللي واجهتنا التصاريح الأسئلة عن اسباب التصوير بس في ناس كتير بتساعدنا في ده زي لما قررنا نعمل فيديو “لسيوة” الناس هناك كانت متكفلة بكل الاجراءات والتصاريح حتى اقامتنا.
هل كنت متوقع نجاح الفيديو بالشكل ده؟
الحقيقة لأ, انا شخصيآ لحد دلوقتي متفاجيء، الموضوع كأنه الحلم من اول رد الفعل على” فيديو اسكندرية وفيديو سيوة”، حتى وصول رسالتي للمسئولين في الامم المتحدة اللي كلفوني بتصوير فيديو “لمدينة برلين” وبعدها بدأت اختار مدن تانية للبدء في التصوير فيها زي
” لبنان، المغرب و كوبنهاغن “
ايه خططك الفترة اللي جاية؟
بعد فيديو اسكندرية و سيوة، بنجهز حاليا لفيديو القاهرة واوعدكم هتشوفوها بشكل مختلف تماما، ومن الاماكن كمان اللي نفسنا نصورها الجونة و مرسى مطروح بس الموضوع لسه هياخد شوية وقت عشان الاجراءات والتصاريح.
مؤمن كان زي اي شاب في جيلنا مشتت في اكتر من هواية لغاية ما اكتشف شغفه وموهبته في التصوير وقرر يخلي العالم كله يشوفها بعيوننا زي ما وصفها ” كأنها حته من الجنة، كأنها اول مرة تتغنى”، ارض السحر والجمال، بحر الرمال الدهبية المياه الخلابة اللي تسحر العيون، تاريخ عظيم عدى على ارضها ورسم لوحه بريشة فنان، كل شبر فيها له اثر بيسيبه جوة اللي بيزورها مرة واحدة”
تقدروا تتابعوا فيديوهات مؤمن من خلال صفحته على يوتيوب: