معلومات أثرية عن القصور المصرية

معلومات أثرية عن القصور المصرية

مصر زي ما هي مشهورة بحاجات كتير

زي أكلها واللي كتير اتكلمنا عن مشاهيرها في كل المجالات
وطبعا الأماكن اللي ملهاش أول من أخر عشان نتفسح فيها
هي كمان مشهورة جدا بقصورها واللي في منهم عمرهم مئات السنين
منهم اللي إتحوّل دلوقتي لمزارات سياحية جميلة، وفي السطور اللي جاية هنستعرض معاكم مجموعة قصور مصرية ومعلوماتهم الأثرية

..

قصر عابدين

 

قصر عابدين موجود في ميدان الجمهورية
بمنطقة وسط البلد، يعتبر من أهم القصور اللي في مصر
مش بس عشان مكانته التاريخية لا وكمان لقيمته الفنية واللي يعتبر من أهم التحف المعمارية في مصر.
 

اتبني قصر عابدين في عهد الخديوي إسماعيل
وده كان سنة ١٨٦٣، وإتسمي نسبة لعابدين بك واحد من قادة الجيوش المصرية، القصر فيه أكتر من ٥٠٠ غرفة ده غير الأجنحة والقاعات ويعتبر الجناح البلجيكي من أهم الأجنحة فيه، وغير كل ده القصر بيحتوي على مكتبة عملاقة فيها أكتر من ٥٠ ألف كتاب وكمان مسرح.

 

..

 

قصر عائشة فهمي

قصر عائشة فهمي اتبني سنة ١٩٠٧
بناه فهمي علي باشا لبنته عائشة، إتنقلت ملكية القصر لوزارة الثقافة سنة ١٩٨٥ وإتحوّل لمبني أثري سنة ٢٠١٠
وغرف القصر إتحولت لصالات عرض لوحات لفنانين كتير.
 

من أشهر غرف القصر هي الغرفة اليابانية
وإتشهر القصر كمان بأن جدارياته مصنوعة من الحرير والكتان، ومؤخرا تم إفتتاح القصر للزوار بعد فترة ترميم طويلة إستمرت تقريبا ١٠ سنين.

 

..

 

قصر السكاكيني

واحد من أقدم القصور المصرية
واللي اتبني سنة ١٨٩٧ على إيد حبيب باشا السكاكيني واللي مصنف ضمن أثار القاهرة ورغم روعته المعمارية
إلا أنه للأسف غير بارز ضمن القصور.

 

القصر مساحته ٢٦٩٨ متر مربع وبيضم أكتر من ٥٠ غرفة
ده غير إنه بيحتوي علي أكتر من ٣٠٠ تمثال
سنة ١٩٦١ إتنقل متحف التثقيف الصحي من عابدين الي قصر السكاكيني وحاليا القصر مستني دوره للتطوير زي ما حصل مع قصر البارون مؤخرا.

 

..

قصر المنتزة

من أجمل قصور الإسكندرية واللي بناه الخديوي عباس حلمي الثاني من أكتر من ١٠٠ سنة.

 

شهرة القصر المنتزة واللي مبني علي الطراز الفلورنسي إن موقعه فريد واللي موجود وسط حدائق وغابات علي مساحة ٣٧٠ فدان ده غير الشواطئ اللي حوالين القصر وأحواض الزهور النادرة.

 

..

قصر التيه

 

بعيدا عن القصور الملكية، يعتبر
قصر التيه أو اللابرانت اللي موجود في الفيوم من القصور الفرعونية
واللي بناه الملك أمنمحات الثالث واتسمي بقصر التيه لأن بيه اكتر من ٣٠٠٠ غرفة يعني مستحيل ماتتوهش جواه
ويقال أن الكهنة كانوا بيدخلوا القصر دايما بخريطة عشان يقدروا يخرجوا من هناك. 

كتب هيرودوت عن إعجابه بقصر التيه
وقال: إنه يفوق الوصف، يتكون من 12 بهوا، ومن 3آلاف غرفة، نصفها تحت الأرض، ونصفها الآخر فوقها، والغرف العليا تفوق ما أخرجه الإنسان من آثار، إذ أن سقوفها كلها قد شيدت من الأحجار، ويحيط بكل بهو أعمدة مصنوعة من الأحجار البيضاء.
 

..

 

قصر المنيل

بناه الأمير محمد علي ابن الخديوي توفيق، يعتبر قصر المنيل
واحد من أجمل القصور المصرية بسبب

 تصميمه الإسلامي المقتبس من العمارة الفاطمية، القصر بيتكون من طوابق كتير وكمان مسجد صغير واللي رغم من صغر حجمه إلا أنه يعتبر تحفة معمارية زي القصر. 

القصر مفتوح للجمهور معظم أيام الأسبوع وبرسوم بسيطة،
وبيتعمل فيه دايما معارض بتحكي قصة الأمير محمد علي توفيق وبيتم إستعراض صوره وتراثه من خلال صور ومقتنيات.

 

………..

 

ادخل على النت ودور على القصور المصرية
هتندهش من عددهم وجمالهم
لو بتفكر في أماكن جديدة تروحها
جرب تزور القصور المفتوحة للجمهور وأكيد هتتبسط جدًا