الأصحاب في السينما

الأصحاب في السينما

لو هتصنف أهم العلاقات في حياتك لازم هيجي من ضمنها “الصحاب” , و أعتقد حاجة بالأهمية لازم يكون اتعبر عنها في السينما
و احنا جايين النهاردة عشان نتكلم عن بعض علاقات الأصدقاء اللي ظهرت في أفلامنا و نقول بعض الجمل اللي لازم تفضل في بالنا دايما

….

أصحاب ولا بيزنس

فيلم درامي جسد معنى الصداقة و أهميتها حتى لو على حساب الشهرة والفلوس
و ادانا مش مجرد جملة مهمة ده عملنا أغنية كاملة غرزت فينا معنى الصداقة
“أصحاب أنا وانت ولا فاكرين الماضي ولا ناسيين كل اللي بينا ولا طبع الحياة

….

صاحب صاحبه

أسامة وجاد و قصة الصداقة والتضحية
شخصيتين مختلفين تماما ولكن ده مأثرش على صداقتهم
و رغم السفر والغربة اللي كان فيها جاد إلا إن أسامة ماقدرش ينساه وفضل منتظره
وبنشوف تضحية جاد في أخر الفيلم عشان خاطر أسامة يتجوز البنت اللي بيحبها
في محاولة منه إنه يرد لأسامة جزء من تضحياته في وقت سفره
فيلم جميل عرفنا يعني إيه صاحب
و الصحوبية الجميلة دي اتلخصت في جملة
– مبسوط يا أوس أوس ؟!
= اوي اوي يا جاد .. اهم حاجه إن احنا مع بعض

….

زهايمر

و رغم إن الفيلم مش عن الصحاب و لكن فيه واحدة من أجمل حوارات الصداقة في السينما المصرية
و تحس إنه كان مشهد بيعبر عن صداقة عادل إمام وسعيد صالح في الواقع مش في الفيلم
و رغم الزهايمر اللي بياكل في عقل (عمر) و لكنه فاكر صديق عمره (محمود) وطلب منه اللي مارضاش يطلبه من أولاده
“ابقي إسأل عليا يا محمود ، متعملش زيهم وتروح وتنساني !”
عشان يقولنا فيلم زهايمر إن أحيانا الدنيا بتديلك صحاب بكون ليك هو كل حاجة

….

تيتو

الصداقة اللي ساعدت على التغيير
صداقة تيتو وفارس مش مجرد صداقة عادية اتعرضت في فيلم من الأفلام
دي قصة منفصلة ممكن تبقى فيلم لواحده وقصة ملهمة ومهمة
لإنها صداقة ساعدت تيتو إنه يكون شخص مختلف وشخص أحسن
و رغم إننا كلنا مابنفتكرش غير جملة “أنا عملت كل حاجة ممكن تتخيلها بس عمري ما خونت واحد صاحبي”
إلا إن في جملة أهم بتدل على أهمية صاحب زي فارس بالنسباله
“الكنز في الرحلة.. في الناس اللي بتقابلهم بتحبهم وبيحبوك”

….

إبراهيم الأبيض

و طبعا أكيد نقصد “عشري صاحب صاحبه”
و سيبك من خيانته لإبراهيم في الأخر .. الراجل كان مفضل إنه ينتحر على إنه يخونه
ولكن بعيد عن أخر الفيلم … عشري و إبراهيم قصة صداقة حقيقة من أجمل ما اتعرض على شاشة السينما
و أعتقد مافيش جملة ممكن تعبر عن ده أكتر من
“ما طول عمرنا كتف في كتف في أيتها مصلحة إنشالله حتى لو رايحين جهنم”

….

الصداقة فعلا مهمة في حياتنا, و جزء من رزقك في الحياة بيكون في صحابك … و مش بالعدد خالص, صاحب واحد ممكن يغني عن الكل
المهم اختاره صح .. لإن الصاحب بيغير و بيأثر فينا, فأختار الشخص اللي يغيرك للأحسن