سارة ولورا أيوب: إزاي تحول الـ”بوب” لـ”كلاسيك”؟
أذكى حاجة ممكن تعملها أما تحب تلفت نظر الناس لنوع من الفن واخدين عنه فكرة ثابتة إنه مش ممتع أو مش شبههم أو له ناسه، هي إنك تقدمه عن طريق حاجة هما بيحبوها بالفعل ومتعلقين بيها لأنها جزء من ذكرياتهم.
عشان كدة سارة ولورا أيوب، الأختين اللي من أصل مصري/ أسكتلندي اختاروا موسيقى “ليلة القبض على فاطمة” لعمر خيرت، عشان يعّرفوا بيهم طبقة كبيرة من العرب والمصريين مش متعودين يهتموا بالموسيقى الكلاسيكية، وبالفعل الكليب لقى انتشار واسع جدًا على وسائل التواصل الاجتماعي، وبدأ الناس يهتموا إنهم يعرفوا مين دول؟ وبيعملوا إيه؟
في حوار لـ”بس في مصر” اتعرفنا عليهم وسألناهم عن كواليس التصوير وتفاصيل تعاونهم مع فرقة “ذي سوينجلز”، ومشروعاتهم الجاية في مصر، ودي كانت ردودهم:
- اشتركنا مع فرقة “ذي سوينجلز” قبل كدة في جولة فنية، وحبينا المرة دي نقدم حاجة جديدة مع بعض، هما كانوا عايزين يعملوا “ليبر تانجو” لـ”آستور بيازولا” مرة تانية بمناسبة وصول نسختهم الأولى لـ2 مليون مشاهدة على “يوتيوب”، فاخترناها واقترح “إيد راندل” -واحد من الفريق-، إننا نعمل موسيقى تصويرية لفيلم من الأفلام لجمهور الشرق الأوسط، فعلى طول فكرنا في رائعة عمر خيرت “فاطمة”.
- “ذي سوينجليز” قدموا حفلات قبل كدة في بلاد عربية، وكانوا متشوقين لاكتشاف الموسيقى العربية أكتر، فأما سمعوا “فاطمة” كلهم اتعلقوا بيها جدًا وكانوا مستعدين للتنفيذ فورًا.
- تصوير الكليبين وتسجيلهم تم في نفس الوقت، وفي يوم واحد في لندن تقريبًا كان اليوم الأكتر حرارة في السنة هناك!
- صورنا في جزء مهجور من محطة سكة حديد، كل 15 دقيقة كان بيعدي قطر قريب مننا، فكان لازم نظبط وقت التسجيل عشان صوت القطر ما يطلعش فيه.
- علاقتنا بعمر خيرت بدأ من واحنا أطفال، كان بابا وماما دايمًا بيجيبوا شرايط الكاسيت لألبوماته ويشغلوها طول الوقت في العربية، حبينا جدًا أسلوبه المتفرد والجمع بين الربع التون العربي والأوركسترا الكلاسيكي.
- بنعتقد إن الانتشار الواسع للكليب دة بالذات سببه إننا قدمنا “فاطمة” بتوزيع جديد ومختلف، والتعاون مع “ذي سوينجلز” ساعدنا على إضافة دراما للمقطوعة، الناس ماكانوش متوقعين يسمعوا أصوات بشرية “أكابيلا” مع آلات وترية.
- شاركنا قريب في منتدى شباب العالم، والموضوع بدأ من تشجيع ماما لينا بعد ما تابعت المنتدى السنة اللي فاتت، وأصرت إننا نقدم السنة دي، وكنا محظوظين وشاركنا في حفل الختام.
- أي مصري لازم يبقى فخور بمستوى المنتدى وبمصر وهي فاتحة بابها للشباب من كل أنحاء العالم، وبمستوى التنظيم ومدى الاهتمام بالتفاصيل فيه.
- عزفنا النشيد الوطني في حفل الختام قدام الرئيس عبدالفتاح السيسي، واتكرمنا منه وأخدنا جايزة المنتدى، دة حدث هنفضل نعتز بيه طول عمرنا.
- أول ألبوم لينا سجلناه في ستوديو “آبي رود” التاريخي في لندن، وشاركنا فيه الأوركسترا الملكية الفيلهارمونية، وكان بيجمع بين الموسيقى الكلاسيكية المعروفة، وموسيقى عربية.
- احنا الاتنين بنتكلم عربي مكسر وبنحاول نحسنه ونخليه أكثرطلاقة، لكن مرتبطين بالموسيقى والأغاني العربية بجيلها القديم والجديد، يعني بنحب عبدالحليم حافظ، وفريد الأطرش، وأم كلثوم، وبنحب عمرو دياب وطبعًا عمر خيرت.https://www.youtube.com/watch?v=x5Wfpi5AsjM
- الموسيقى العربية لها شكل مميز بسبب استخدام الربع تون، وإيقاع الطبلة العربي المميز.
- بنيجي مصر باستمرار وقدمنا عروض قبل كدة مع أوركسترا القاهرة السيمفوني وكورال القاهرة الاحتفالي بقيادة ناير ناجي.
- عمر خيرت هو الفنان اللي نتمنى نقدم حاجة معاه قريب.
- مشروعنا الجاي في مصر هيكون مع أوركسترا القاهرة السيمفوني بدار الأوبرا المصرية، يوم 26 يناير، وحفلة تانية في مسرح سيد درويش بالأسكندرية يوم 27 يناير.
- حلمنا هو نشر موسيقانا على أوسع نطاق ممكن من العالم، احنا مؤمنين إن نوع الموسيقى اللي بنقدمه شامل وممكن يجتمع عليه الناس من ثقافات وجنسيات وخلفيات مختلفة.
يُذكر أن سارة عندها 25 سنة ولورا عندها 22 سنة، اتولدوا في أسكتلندا لأب وأم مصريين، بيعزفوا عدد من الآلات وفي بعض الحفلات بيبدلوها أثناء العرض رغم تخصصهم بشكل أساسي في الكمان والتشيللو، الألبوم الأول لهم هو:
Pop Goes Classical
صدر في 2017 وتصدر “آي تيونز” في الألبومات الأكثر سماعًا.
الموقع الرسمي: