ليه Home Alone فيلم مصري 100%!
من العلامات المميزة للكريسماس على مدار الـ28 سنة اللي فاتوا هو فيلم Home Alone… مجرد ما تشوفه على شاشات التلفزيون أو تتكعبل فيه في أي محطة لازم حتسيبه وتتفرج عليه ويا سلام بقى لو كوباية كاكاو سخن أو طبق فشار مع العيلة والأصحاب، حتبقى خلاص مش عايز حاجة تاني من الدنيا!!
والفيلم فعلًا بيتحدى الزمن ومفيش حد غالبًا مش بيحبه أو ممكن ينساه… ودليل على كلامي مثلُا شركة Google لما حبت تعمل اعلان عن Google assistant عملوا اعلان عبقري بيعيدوا فيه أهم مشاهد الفيلم وبنشوف فيه بطل الفيلم Macaulay Culkin بعد 28 سنة، والاعلان كسّر الدنيا!
،،
قصة الفيلم معروفة طبعًا بأحداثها ومغامراتها… لكن الحقيقة أنا شايفة إننا كمصريين بنحب الفيلم لأسباب أعمق من كده بكتير.
الفيلم الحقيقة مليان بتفاصيل مصرية 100% بتعكس طبيعة أي بيت مصري أصيل…
1- لمة العيلة لازم تقلب بعركة
في أول الفيلم بنلاقي عيلة “كيفن” بطل الفيلم وهما متجمّعين كلهم في البيت ووسط كل الزحمة والهرج والمرج والدوشة بتبدأ تحصل عركة بين العيلة والموضوع بيقلب بعكننة وقفش، والمشهد بينتهي إن “كيفن” بيردّ على مامته أمام أفراد العيلة فبتعاقبه وتخليه يطلع أودته من غير عشا. وده مصير عادي لأي تجمع عيلة هنا في مصر، وياما عيال اتلطشت بالأقلام واتقرصت من خدودها عشان بيردوا على حد من العيلة. بس معندناش حد بينام من غير عشا معلش!! 
2- عيلة أي كلام
المثالية والأحلام الوردية اللي دايمًا الأفلام الأجنبي بتعيّشنا فيها بخصوص العيلة ملهاش وجود في فيلم Home Alone … العيلة الطويلة العريضة دي نسوا ابنهم نايم في البيت وراحوا ركبوا طيارة وسافروا… فاللي هو صباح الفل!! معتقدش عندنا حد وصل للاهمال ده عندنا في مصر… إحنا ممكن ننسى عيالنا في الطيارة آه بس مش حننسى عيالنا في البيت ونمشي… هو في ايه؟ القطة أكلت عيالها؟! 
5- امسك حرااااامي!
الأكشن كله بيبدأ لما العصابة اللي بتتكوّن من اتنين حرامية بيسرقوا كل بيوت الشارع في موسم الأعياد وبيجي الدور على بيت “كيفن”… وطبعًا الأكشن اللي من النوع ده محبب عند المصريين، ده احنا بنجيب الجرايد مخصوص عشان صفحة الحوادث ونقرأ ونشوف مين اتسرق ومين اتقتل وكده يعني. ولو إن انا عندي إضافة بسيطة لخيالك عزيزي القارئ، إننا لو حبينا نعمل الفيلم بتويست مصرية فمفيش حد ممكن يمثّل دور الاتنين الحرامية زي “محمود البزاوي” و”ماجد الكدواني” الثنائي الأعظم العربي سيطرة والمر بزيادة… مع خالص الحب والاحترام لـ Joe Pesci و Daniel Stern
4- الجيران لبعضيها
في الفيلم فيه جار “كيفن” واللي الناس كلها بتبقى مفكرّاه راجل شرير وفيه اشاعات كتير وقصص بتحوم حواليه، لكن الحقيقة الراجل الكبير الطيب ده في آخر الفيلم هو اللي بينقذ “كيفن” من الحرامية اللي بيحاولوا يقتحموا البيت. ومعلش مفيش جدعنة جيران في الدنيا زي جدعنة الجيران في مصر أم الدنيا… وممكن نتخيل الراجل ده لو الفيلم كان معمول في مصر بيقوم بدوره الفنان الجميل “لطفي لبيب”.
5- الأخ الكبير الغتت
في آخر الفيلم بعد الأحداث والمغامرات دي كلها أهل “كيفن” بيرجعوا ويحصل اللقاء الجميل والسعادة ترجع تاني ومع ذلك بنلاقي أخو “كيفن” بكل غتاتة بيعامله بسخافة وبرود زي أي أخ كبير موجود في كل بيت مصري وظيفته الرئيسية تنغيص عيشة اخواته الصغيرين.