١٣ سؤال عن مبادرة لتنضيف النيل
الصداقة كمفهوم هي حاجة محتاجة مجهود عشان تكسب وجودها في حياتك، وصداقتك للبيئة مقايضة كسبانة للطرفين، لأنك زي ما هتعمل عشانها من طاقتك ووقتك، هي كمان هتديك حياة صحية وحياة أطول، ومناظر أجمل.
دي المعادلة اللي حققها مجموعة من الشباب متطوعين بدون أي مقابل مادي، لتنضيف النيل، ولأن قضيتهم نبيلة كسبوا مشاركة كل اللي سمع عن الموضوع.
في حوار لـ”بس في مصر”، عرفنا من إيمان عماد، أحد المسؤولين بمبادرة “فيري نايل”، إجابات أهم الأسئلة عن الإيفنت اللي فات وكل اللي محتاج تعرفه لو عايز تشارك بعد كدة.
1- إزاي بدأت VeryNile؟
“جرينيش” هي مبادرة توعية بيئية، عملت حملات تنظيف قبل كدة في أماكن زي البرلس والأسكندرية، وفكرة التوجه للاهتمام بالنيل وتنضيفه طلعت بالاشتراك مع شركة “بسيطة” فعملنا “فيري نايل”، وكان أول المشجعين لينا هما “نايل تاكسي”، وكان لهم دور كبير في نقل الشخصيات العامة والصحفيين خلال الحملة.
2- التمويل بيجي منين لشراء الأدوات والتجهيز؟
مفيش دعم مالي أو تمويل ثابت، لما بنحتاج لحاجة بتقدمها أي جهة بتشاركنا الاهتمام بالبيئة، وبتبقى مؤسسات أو سفارات.
3- الفريق كان خاص بالمبادرة، ولا كان متطوعين أول مرة؟
العدد كان كبير ومن أماكن مختلفة وكلهم أول مرة يشاركوا، كمان كان فيه أجانب، وكان فيه ناس بتشوفنا في الشارع بتقولنا يا جماعة عايزين نشتغل معاكوا!
4-عدد المتطوعين كان كام؟
حوالي 250
5- كام منطقة تم العمل عليها؟
منطقتين، بالإضافة لنادي التجديف دة كان بيطلع منه الناس للتنضيف جوة النيل.
6- إزاي التعامل مع عملية التنضيف ممكن تبقى آمنة للمتطوعين من التلوث والأمراض؟
هما مش بيمسكوا أي حاجة بإيديهم، فيه أدوات مخصصة لكل حاجة.
7- في تكملة للمشروع دة بإيفنتات جاية؟
ناويين نكرر الحملات كل شهر، لكن لسة بنحاول نلاقي الدعم من البيئة من وزراة الري، واللي كانوا متعاونين معانا جدًا في الإيفنت اللي فات بتسهيل التصاريح.
8- يوم العمل بيتحدد بعدد ساعات ولا بمقدار الشغل؟
كنا بنعمل عدد ساعات معين كحد أقصى، لكن اللي بيحصل إن كل مجموعة في منطقتها مش بتبقى عايزة تمشي قبل ما تسيب المكان نضيف تمامًا، فبنقعد لحد ما نخلص.
9- إيه موقف الناس في المناطق دي؟
في منطقة ميدان الجلاء مثلاً، كان فيه أسرة عايشة في مركب جوة النيل والزبالة محوطاهم من كل ناحية، استأذناهم إننا ننضف، وفرحوا جدًا، وطول الوقت كانوا بيشكرونا.
10- إزاي بتجهزوا لنزول منطقة معينة؟
بينزل حد من عندنا يعاين المنطقة اللي هننزل فيها، ويتابع كل أسبوع عشان نتأكد إن الزبالة لسة موجودة، ونحدد حجم الشغل المطلوب.
11- الزبالة اللي بتاخدوها بتروح فين أو العملية بتمشي إزاي؟
كان مشارك معانا رئيس حي الزبالين، كان بياخد الزبالة، وكلها بتروح لإعادة التدوير، والأكياس اللي بنستخدمها كلها صديقة للبيئة، وهتتحلل بعد فترة قصيرة.
12- كنتوا قاصدين يكون فيه مشاهير من المشاركين؟
آه، أكيد، بسيطة كانوا مسؤولين عن دعوة الشخصيات المشهورة، عشان نجذب الناس للإيفنت أكتر ونشجعهم للمشاركة، فكان معانا الفنانات أروى جودة، ومي الغيطي.
13- إزاي ممكن حد يشترك في الحملة الجاية؟
كل المطلوب هو متابعة صفحتنا على فيسبوك، لحد ما نعلن عن التفاصيل، زي الأماكن والمواعيد، ونفتح باب التقديم.