دليلك لفهم أغنية وجع الهوى
من احلى اللحظات اللي بدأنا نتعود عليها، هي لحظة ما بنعرف ان محمود العسيلي نزّل اغنية جديدة. بتبدأ مراحل الاستماع للاغنية بشكل لا نهائي لحد ما تتعب منها، بعد كدة مبتوقفش برضه. المرة دي الوضع كان مختلف، محمود العسيلي فاجئنا باغنية وجع الهوى.
احنا قضينا آخر ٢٤ ساعة بنحلل كلمات اغنية وجع الهوى، و بعد اكتر من ١٩٣ مرة لسماعنا للأغنية و تساؤلات كتير، نقدر نمشي معاك خطوة خطوة فيها.
١- الموسيقى اللي في الاول
موسيقى حزينة هتحسسك بوجع الهوى من غير ما تكمل حتى باقي الاغنية.
٢- الاتوبيس
الاتوبيس اللي في الفيديو غير مفهوم لحد دلوقتي سبب وجوده او ايه علاقته بالاغنية او بالكلام.
٣- “انتي حلوة و حياتي بيكي حلوة”
بداية حلوة و جميلة مفيهاش اي مشاكل.
٤- “حبتيني و محبتكيش”
هنا اتقسمنا لرأيين: هل عسيلي غلطان انه محبهاش ولا راجل تمام و صريح انه اعترف انه مبيحبهاش؟
٥- “ليه يا قلبي ليه مدخلتيش”
ليه ايه يا عسيلي؟ ما ازاي هتدخل نفسها بالعافية؟
٦- “مفيش انسان بيجي مكان انسان”
حلو، طب ما انت عارف الكلام ده يبقى ليه بقى من الاول؟
٧- “كنتي الدوا لمرض مش عندي، و كنتي حلم لغيري كبير”
لأ، المرض عندك انت اللي مش عايز تخف منه.
٨- ” وجع الهوى جربته زمان انا، و بتدوقيه معايا كتير”
طب طالما انت جربته و ضايقك، بتعمله في غيرك تاني ليه؟
٩- تاني..الناس اللي في الاتوبيس
محدش برضه فاهم
١٠- “ورتيني الجنة و حلاوتها”
هنا رجعنا تاني للبدايات الكويسة.
١١- “انا آسف”
تكملة كويسة للبداية اللذيذة اللي قبلها.
١٢- “قلبي ملك لواحدة انا حبيتها”
لأ يا عسيلي..خلاص كدة مينفعش
برغم اي حاجة ممكن نكون حاولنا نشرحها، الاغنية اكيد لسه فيها تساؤلات كتير و برضه برغم كل الكلام دة احنا لسة بنحب محمود العسيلي و هنفضل بنحبه و بنسمع اغاني وعمرنا ما هنزهق منها
و لو كنت عايش تحت صخره و ماسمعتش اغنية وجع الهوى، اتفرج على الفيديو هنا!
.