مسلسلات بنرشحلك تشوفهم تاني في 2019
زمان وقبل التزايد الكبير في عدد القنوات الفضائية، كان الكل بيجتمع حوالين مسلسل واحد في أوقات ثابتة، فكان ممكن تلاقي شوارع كاملة فاضية بسبب إن دة معاد المسلسل.. لكن دلوقتي وبعد ما عدينا مرحلة الانفجار في عدد القنوات، وصلنا للاعتماد شبه الكامل على المشاهدة أون لاين، وبناء عليه اتحولنا من ناس بيتفرض عليها موضوعات وأفلام ومسلسلات، لناس حرة تمامًا في اختيار المناسب لها.
عشان كدة، وعشان ممكن بفكرة غلط أو بإنك عدى عليك مسلسل أصلاً من غير ما تسمع عنه، يفوتك حاجات مهمة وما تشوفها، جمعنالك أهم المسلسلات اللي اتعرضت في 2018، واللي هتنبسط لو رجعت تشوفها في السنة الجديدة.
1- سابع جار
المسلسل بدأ في 2017، واتقسم في عرضه على جزئين، التاني كان في 2018.
المسلسل بيقدم حكايات متنوعة للبيوت المصرية، عن طريق عمارة وسكانها، وعلى الرغم من الشعبية الكبيرة والانطباع الدافي اللي سابه عند الناس بعد بداية عرضه، إلا إن الانطباع دة اتقلب لحالة جدل بسبب إنه قدم صورة جديدة للمجتمع ولغة الشباب وتفكيرهم.
فيه ناس شافت الصورة دي واقعية وناس شافتها بتشوه الواقع بتاعهم وناس شافتها بتكشف اللي ماكانوش هما عايزينه يتعرف عنهم!
في الأخر هو تجربة فنية جديدة، أميل للاتجاه الواقعي، وقدمت إضافة لصناعة المسلسلات.
بنرشحلك إنك تشوفه وتكون رأيك بنفسك!
2- أبو العروسة
أول حاجة أثبتها المسلسل دة هي إن مفيش مستحيل!
سيد رجب الفنان صاحب الموهبة الكبيرة، واللي ظهر في عمر متقدم وبمقاييس بعيدة تمامًا عن المتعارف عليها للبطل الأول، بيقدم نفسه هنا كبطل أول للعمل.
بتدور أحداث المسلسل عن مشاكل الطبقة المتوسطة، في التعامل مع الفجوة في التفكير بينهم وبين أولادهم، وتأثير تغيرات الحياة الاجتماعية والاقتصادية على شكل حياتهم.
بعد نجاح الجزء الأول، جاري تصوير الجزء التاني، فبننصحك تلحق تشوفه قبل ما الجديد ينزل!
3- أبو عمر مصري
مسلسلات رمضان 2018 قدمت عدد من الأعمال اللي حيهمك تشوفها.
لو إنت من قراء المؤلف عزالدين شكري فشير، وقريت ثلاثيته “مقتل فخر الدين”، و”غرفة العناية المركزة”، و”أبو عمر المصري”، يبقى هتحب تشوف المسلسل اللي متاخد عنها وتشوف نفذوا قد إيه من خيالك عنها!
المسلسل من بطولة أحمد عز، وأروى جودة، وفتحي عبدالوهاب اللي شخصيته بقى أحد أبطال “الميمز” على السوشيال ميديا!
4- ليالي أوجيني
فيه ضجة بتتعمل بيبقى معناها إن دة مسلسل له شعبية، وفيه ضجة أكبر معناها إن دة مسلسل له شعبية وبيقدم محتوى فعلاً كويس.
ليالي أوجيني كان من أهم مسلسلات رمضان 2018، وأكترهم تأثيرًا على الناس.
الجو الكلاسيكي، الملابس، الموسيقى، اختيار الممثلين، حتى أغنية التتر، كل حاجة ساهمت في إنها تعزل الناس وتنقلهم لفترة زمنية مختلفة، وتفصلهم عن حياتهم.
5- نصيبي وقسمتك
المسلسل حلقات منفصلة، أو قصص منفصلة، كل قصة بتتقدم في حلقة أو أكتر، بعدد كبير من الفنانين.
الجزء الأول منه كان بطولة هاني سلامة واتقدم في 2016، التاني كل قصة كان لها أبطالها واتقدم في 2018، والاتنين لقوا نجاح كبير بسبب القضايا الاجتماعية والأخلاقية اللي بيتبناها من ناحية، ومن ناحية تانية بسبب التنوع وكسر الملل بتقديم حكايات مختلفة.
دي كانت اقتراحاتنا للمسلسلات اللي سابت علامة معانا السنة دي و متأكدين ان هنفضل نتفرج عليها تاني و تالت، و الاكيد ان في مسلسلات كمان تستحق وقتك علشان تستمع بيها.