دينا الشربيني تنضم لموسم “الريمونتادا”
الانتصار بعد هزيمة أو موقف صعب دايمًا بيبقى مؤثر ودرامي ويتسحق التقدير أكتر من النجاح التقليدي والمتواصل، وفي موسم “الريمونتادا” أو العودة والتعافي اللي هز العالم في الكورة، ظهرت دينا الشربيني وحققت “ريمونتادا” فنية واجتماعية من خلال مسلسل زي الشمس، رجعتها في المكانة اللي أثبتت إنها تستحقها.
في الحلقة التالتة والرابعة من مسلسل زي الشمس قدمت “دينا” أداء استثنائي في تقديم شخصية “نور” المحامية اللي بتدور على أختها المفقودة وبتلاقيها مقتولة وبتبدأ رحلة البحث عن القاتل، وفي فلاش باك خلال الأحداث بنعرف إن أختها اعترفتلها إنها كانت بتخونها وحامل من خطيبها!
في الحلقتين شوفنا مشهد المواجهة بين “نور” وخطيبها اللي بيقدم دوره أحمد السعدني، والمشهد اللي بتتعرف فيه على جثة أختها المقتولة، المشهدين انتشروا زي النار في الهشيم خلال مواقع التواصل الاجتماعي وكل الناس أشادت بقدرات “دينا” التمثيلية وشافوا إن دة إثبات كافي إنها فنانة حقيقية وتستحق بطولة المسلسل.
التعافي هنا كان لشعبية “دينا” وجماهيريتها اللي اتأثرت بشكل كبير بعد ارتباطها بالفنان عمرو دياب، واللي بعدها واجهت انتقادات كبيرة جدًا وأحيانًا متنمرة ومهينة عن شكلها وموهبتها ومدى خفة دمها، على الرغم من تنوع أدوارها وتعددها بين الخير والشر والكوميديا من أول ظهورها لحد دلوقتي، زي أدوارها في “المواطن إكس”، “حكايات بنات”، و”جراند أوتيل” و دلوقتي في مسلسل زي الشمس.
من ناحية تانية دي تعتبر “الريمونتادا” التانية في حياة دينا الشربيني، والمرة التانية اللي تثبت فيها إنها شخصية صلبة عندها قدرة تقوم وتواجه بعد الصعوبات، والمرة اللي فاتت بعد القبض عليها بتهمة تعاطي المخدرات ودخولها السجن لمدة سنة!
قالت “الشربيني” وقتها إنها اتظلمت لكن مع ذلك حكمت عليها محكمة جنايات القاهرة في فبراير 2014 بالسجن سنة مع الشغل وغرامة 10 آلاف جنيه، وخرجت “دينا” بعد السنة واجهت حياتها بكل شجاعة ورجعت بأدوار علمت مع الناس زي “هيبتا” و”كدبة كل يوم”.
مسلسل زي الشمس كان من المفترض يقدموا الثنائي الناجح في عالم الدراما وهما الكاتبة مريم نعوم، والمخرجة كاملة أبو ذكري، لكن “كاملة” انسحب بعد خلافات ماحدش صرّح بحقيقتها لحد دلوقتي، وكمل بعدها المخرج سامح عبد العزيز، مع مجموعة من الفنانين منهم أحمد السعدني، وريهام عبد الغفور.