هتتسحر فين النهاردة؟ مراجعة النص التاني من رمضان
وبعد وقت عصيب اتهددت فيه مفاهيمنا ومعتقداتنا اللي بتقول إن السحور هو فول وبيض وزبادي،
بميزانية المواطن محدود الدخل، واكتشفنا إن البيض ممكن يتدحرج ويدحرج ميزانيتنا معاه،
قررنا نرجع الأمور لأصلها ونعيد الأمان لكل جموع الشعب اللي خايفة تتسحر برة بعد كدة، ونقولهم الدنيا لسة بخير!
لو عايز سحور على قديمه يأدي الغرض أو عايز تجربة جديدة مفيش مانع من إنها تتكلف شوية،
جمعنالك الأماكن اللي ممكن تتسحر فيها في القاهرة وإسكندرية بداية من الأساسيات
وبعدها ترشيحات الناس وتجاربهم في النص الأول من الشهر،
عشان تعرف التجربة اللي رايحها هي اللي بتدور عليها ولالا، ولما يجي الشيك ما تتفاجئش.
– محمد أحمد
لو ما جربتش فول محمد أحمد على الأقل مرة في حياتك يبقى إنت ما جيتش إسكندرية!
مفيش غير فرع واحد في محطة الرمل والوصول له سهل.
– أبو ربيع 
خلال خطة العودة للأصل والقواعد، مش ممكن ننسى أبو ربيع وفروعه المنتشرة في إسكندرية،
واللي بسهولة ممكن تدور على أقرب فرع ليك لو مزنوق في الوقت أو المكان.
ولأن الأصيل أصيل في كل حاجة فسواء كنت من هواة السحور التقليدي الفول والبيض والفلافل،
أو بتحب اللحوم أو الفراخ، هتلاقي التشكيلة اللي تنفع معاك وبأسعار ما تزعلكش.
– جاد بفروعه
قاهرة وإسكندرية جاد ممكن يلحقك أي وقت ويحتضنك بفول إدرة زي كتاب السحور ما بيقول.
– القزاز
هنا بنرجع للقواعد، وهي إنك تنزل وسط البلد في القاهرة تاخد سندوتشاتك حتى لو مش هتقعد وتتجه لأقرب قهوة تاكل وتحبس بالشاي، ونبقى ساعتها مش عايزين حاجة تانية من الدنيا!
– أكلخانة
من الأماكن اللي بدأت تاخد تقييم عالي ويظهر اسمها بقوة في ترشيحات الناس لأماكن سحور مناسبة في إسكندرية رغم إنه جديد نسبيًا.
ممكن تجرب فيه جو رمضاني وقاعدة عربي لطيفة في الهوا خصوصًا إن الجو في إسكندرية مازال ممتع وقت السحور والحر مش مزعج.
الأكلخانة بيقدم فول بأنواعه وبيض بأنواعه، وممكن تاخد فيه الشاي أو تحلي برز باللبن،
ومكانه في شارع أديب إسحاق في المنشية، يعني في وسط البلد وممكن توصله بسهولة لو كنت مش من إسكندرية أو ساكن في أي ناحية فيها،
دة غير إن كل خميس وجمعة بيكون فيه باند شرقي ودة بيخليه مناسب جدًا لسهرات الويك إيند.
– محروس في جاردن سيتي
ودي عربية فول تراثية، موجودة من أكتر خمسين سنة،
لكن محروس كان الابن اللي قرر يشغل العربية بالليل بدل النهار،
وبقالها أكتر من 25 سنة شغالة بالليل بس حتى في غير رمضان!
– مشكل جبن
لكل عشان الجبن وإضافتها على أي حاجة، مشكل جبن هيبدأ معاك من الجبن بأبسط أشكالها اللي هي جبنة بالطماطم جنب السحور المعتاد الفول والبيض والزبادي، لحد ما توصل لأي حاجة تحبها تاني بالجبنة، بالإضافة لأنه من الأماكن القليلة في إسكندرية اللي بتقدم البيتزا كيك واللي ممكن تبقى اختيار كويس للفطار.
مكانه في عمارات مصطفى كامل، ورا سيتي سكوير.
– ليفرفول
من وحي ابننا صلاح، ممكن تاكل على عربية فول اسمها “Liver Fuul” واللي رفعت شعار “you will never eat alone” !
ممكن تتبع العربية وأماكنها من صفحتهم الرسمية على فيسبوك.
– طبالي
يشبه باب رزق في ستايله، لكن مكانه في الزمالك وبردو بيقدم فطار وسحور وعنده تنوع كبير في الأصناف بين أطباق وفطاير وسندوتشات.
– بكيزة
هتلاقي هنا تنوع أكبر لو حابب تتسحر أكلة دسمة، فيها برجر أو فراخ، ومكانه في سيدي جابر في عمارات مصطفى كامل.
– Braavos lounge
في شارع تسعة في المعادي، واللي هيجمعلك بين اهم موضوعين عايشينهم الفترة دي،
وهما رمضان وجيم أوف ثرونز،
المكان كل تفصيلة فيه وكل ديكوراته ومكوناته من المسلسل،
لكن هتلاقي فيه أجواء رمضانية والسحور المصري المعتاد بأشكال مختلفة ومتنوعة ممكن تختار بينها.
– مطبخ صوفيا
بيقدملك السحور الرمضاني المصري البيتي الدافيء في بوفيه مفتوح للسحور من الساعة 10ونص للساعة 2ونص، من غير حجز، وفي أي فرع من فروعهم الموجودة في المنتزه، لوران، وسيدي جابر.
– فطوطة
لو إنت من كوكب مدينة نصر، يبقى لازم تجرب فطوطة،
وهو مخصص بس لسهرات رمضان وتقديم السحور،
هناك مهتمين بإنهم يحطوك في أجواء شرقية تمامًا، كمان فيه عروض مناسبة لو معاكوا أطفال المكان ممكن يبقى مسلي ليهم.
– باب رزق
بردو في مدينة نصر في ميدان الساعة، وشعاره إنك مش هتحس إنك في مدينة نصر!
أجواءه مختلفة وديكوراته مبهجة، بيقدم سندوتشات وطواجن وطاسات وحلو، يعني هينفع معاك سحور أو فطار.
– زوبا ZOOBA
عشان احنا بنحب الاختراعات لكن من غير ما نتخلى عن أكلنا المتعودين عليه،
زوبا طول رمضان بتقدملك الأكل المصري الأصيل لكن مع شكل أو إضافة أو ابتكار جديد!
زوبا ممكن يبقى اختيارك للسحور لأن فروعة منتشرة في القاهرة،
ولأنك هتجرب حاجة جديدة من غير ما تبعد كتير عن منطقتك الآمنة.