أماكن لازم تفكر فيهم قبل ما تشتري الكحك
بعد أكتر من 20 يوم رمضاني بناكل فيهم ونحلي ونتخن بس بضمير مرتاح وإحساس إن الموضوع مستحق وإن دي من لحظات السعادة اللي بتخلينا نكمل أيامنا، جه وقت المراجعة الأخيرة والامتحان والاستفادة من العلم اللي جمعناه طول الشهر، يعني جه وقت الكحك!
قد ما الكحك منتج سنوي ومتكرر إلا إن صناعته تعتبر من الصناعات الحساسة واللي بتحتاج حرفية وخبرة بتحط كل مكان بيبيعه كل سنة مهما كان مشهور في اختبار مش سهل، لأن في الأساس عمايل الكحك كانت تقاليد منزلية، مفيش بيت بيخلى من وصفته ومفيش ست بيت ما عندهاش وجهة نظر عن الكحكة الحلوة المفروض تطلع إزاي، ومفيش ابن أو ابنه ما عندهمش ذكرى وانطباع عن كحك زمان واللي منتظرين يلاقوا زيه.
عشان كدة جمعنالكوا أهم الأماكن اللي بتعمل كحك كل سنة، عشان تدرس وتفكر وتجرب وبعدين تشتري!
1- عبدالرحيم قويدر
فيه ناس عندها ذكرياتها ممكن تتخزن في كتاب وفي ناس بتستعيد ذكرياتها بالأصوات وفيه بالروايح أو الأماكن والأهم من كل دة فيه الطعم، والأماكن اللي موجودة معانا من زمان، اللي طلعنا لقيناها، بتقدملنا منتج قيمته مش بس في طعمه لكن كمان في ذكرياتنا المرتبطة بيه.
قويدر بيقدم الحلويات الشرقية بأنواعها والتورتات والأيس كريم، وتقييماته فضلت عالية طول شهر رمضان، وبناء على رفيوهاتنا وتقييمات الناس قررنا نبدأ بيه القايمة لأن كحك العيد متوفر من دلوقتي في كل فروعه المختلفة والمنتشرة في القاهرة وخارجها زي:
التجمع الخامس- المعادي- مدينة نصر- المهندسين- الرحاب- الشيخ زايد- وسط البلد القاهرة- مارينا، بجانب فروعه داخل كافور كايرو فيستيفال سيتي- الشروق- جولف سيتي- معادي سيتي سنتر- داندي مول- صن سيتي- ومول مصر.
وممكن تسأل عن طلباتك على رقم 01206665599 أو تتواصل معاهم على صفحتهم على فيسبوك.
2- ساليه سوكريه
ساليه سوكريه بيعاملك معاملة الأهل اللي عارفين طلباتك واحتياجاتك وبيساندوك قصاد التزاماتك الاجتماعية في العزومات والمجاملات عشان تظهر بأفضل شكل، بيقدم مخبوزات وحلويات شرقي وغربي، وأكتر الانطباعات والتقييمات كان أهمها إن كل حاجة دايمًا طازة.
كحك العيد متوفر بتشكيلات وأحجام مختلفة ممكن تشوفها على صفحتهم الرسمية على فيسبوك، أو تزور أقرب فرع ليك.
3- لابوار
شعار لابوار السنة دي إن كحك العيد هتدوب فيه، وبيخاطب بالشعار دة كل ست بيت عارفة إن دة ميزان الكحكة المخدومة كويس.
بالفعل لابوار بدأ من وقت الإعلان عن توفر حلويات العيد بأشكالها، مش بس الكحك، لكن كمان البسكوت والغريبة، والبيتيفور.
4- طلعت
خلال رمضان حصلت طفرة كبيرة عملت إقبال استثنائي على حلوياته من غير أي حملة إعلانية غير تقييمات الناس وكلامهم، ودة ممكن يبقى مبشر بشيء استثنائي للكحك السنة دي، على جانب تاني ما تعتمدش على صفحتهم على فيسبوك لأنها مش نشطة، والأفضل تزور أقرب فرع ليك.
5- ديليس
من الأماكن اللي كانت ومازالت وحيدة من نوعها، في الغالب الاعتماد عليه بيكون في الحلويات الغربية، لكن في رمضان بيكون فيه منيو استثنائي لحلويات الشهر، زي الكنافة والبقلاوة والقطايف وبلح الشام، لكن في أشكال وابتكارات مختلفة، وفي العيد بيعمل كحك.
6- كوكي مان
هنا فيه ميزة ممكن ما تلاقيها في أي مكان، وهي إن الكحك مصنوع من دهون غير مشبعة، يعني صحي ومش تقيل على المعدة، ومناسب خصوصًا للناس اللي ما بتاكلش حلويات العيد عشان تقلها.
7- Coppermelt
بيقدم الشرقي بإضافات وأشكال مبتكرة وبيقدم حلويات غربي، قايمة الكحك بمختلف أنواع الحشو، وحلويات العيد التانية وصلت عندهم بالفعل وبيعلنوا عنها بكل الأجحام والأسعار والتشكيلات.
8- Nola
في السنوات الأخيرة نولا كان لها الريادة وأثبتت نفسها في الحلويات الغربية، وفي قدرتهم على تغيير شكل حلويات رمضان الشرقية وتقديمها بإضافات وأشكال مختلفة، خلتهم يكسبوا ثقة الناس، ودة ممكن يبقى حافذ لتجربة كحك العيد من عندهم وانتظار لمساتهم عليه.
9- Le Carnaval
من الأماكن اللي أخدت تقييم كويس في الأيام القليلة اللي فاتت بعد ما الكحك بدأ ينزل السوق، وعادة بيستخدم أفضل خامات في التصنيع، عشان الكحك يطلع مظبوط مش ناعم أوي ومش خشن، ودة بيبرر شوية غلو أسعاره عن المعتاد.