فانتازيا العرّاب: أحمد خالد توفيق
ليه اسمه العراب؟
الدكتور أحمد خالد توفيق كان و سيظل من أهم علامات الأدب العربي و العالمي. اكتشف حبه للأدب و بالأخص أدب الرعب، الفانتازيا والخيال العلمي وبالرغم من التحديات اللي قابلها في بداية حياته كروائي الا انه ما استسلمش..
بصراحة من حسن حظنا انه تحدى كل العقبات و بدأ رحلته الأدبية بسلسلة “ما وراء الطبيعة” اللي كسّرت الدنيا بالرغم من ان أدب الرعب ما كنش منتشر في مصر أو الأدب العربي.. فأقل ما يقال عليه “العرّاب” أو الأب الروحي عشان الأجيال اللي حبّت القراءة بسببه.
دكتور أحمد خالد توفيق.. مثال و قدوة.
بالنسبة لشريحة كبيرة جدا من الشباب المصري، يعتبر الدكتور أحمد خالد توفيق قدوة مش بس عشان رواياته اللي استمتعنا بيها و اتعلمنا منها كتير.. لكن الأهم من ده انه عرّفنا ان قدرات المصري أقوى من اللي احنا فاكرينه. لأنه ببساطة كان مثال حيّ على النجاح في مجالين مختلفين..
العرّاب استمر في ممارسة مهنة الطب و أثبت نجاحه بأنه كان عضو هيئة التدريس واستشاري قسم أمراض الباطنة المتوطنة بكلية الطب جامعة طنطا.
مش أي عيد ميلاد!
لو هندور على أسباب تخلينا نحبه و نفضل طول حياتنا فخورين بيه.. مش هنقدر نعدّهم، و عشان كدة مش بس احنا اللي بنحتفل بعيد ميلاد العرّاب.. جوجل كمان بتحتفل بعيد ميلاده تقديرا لدوره العظيم في الأدب العالمي.
كل سنة و انت طيب يا دكتور.. هنفضل فخورين بيك.. “جعلت الشباب يقرأون”