حلاوة الويك إند : فراخ داي
في حالة إنك وصلت بسلام وأمان للويك إند
ف اسمحلي أهنّيك وأباركلك وأقول لك حمدالله ع السلامة يا أبو الغوالي.
وفي حالة إنك مش في الساحل ولا السخنة
ولا أي مكان يستدعي إنك تكون لابس مايوهك
ومعاك العوامة الفلامنجو الجميلة…
فأحب أقولك إن المقال ده موجّه ليك وإحنا حنقولك تعمل إيه.
،،
مبدأيًا
حضّر فيلم جميل أو مسلسل على نيتفلكس، واطلب fried chicken تكمّل بيها الجو الويك إندي السعيد!
حتيجي تقول لي الفيلم أو المسلسل سهل ومقدور عليهم… طب والـfried chicken!!
إحنا حنقولك خلاصة خبراتنا في عالم مطاعم الـfast-food الخاصة بالفراخ المقلية الكرسبي… سواء كنت من أهل كايرو أو من إسكندرية الماريا.
بروست Broest 
وده لحبايبنا الإسكندرانية… الـfried chicken fans
المحل منتشر وله كذا فرع في كذا مكان، وأهم حاجة بتميّز المكان ده هو “المنوعات”…
يعني حتلاقي في المنيو أكل يعجبك على حسب ذوقك… فيه سندوتشات وفيه رول وفيه أرز (ريزو).
ولو انت من الشرفاء اللي عاملين دايت وعايزين يمشوا في الطريق المستقيم، فحتلاقي جزء في المنيو للمشويات.
ووجبات الكرسبي نفسها بتبدأ من ٢ قطعة لحد ١٢ قطعة…
شوف إنت بقى جعان قد إيه و والأسعار عنده بتبدأ من ٢٧ جنيه لحد ١٢٥ جنيه.
يعني أكل… دلع… اختيارات… وكمان توفير!!
Zack’s chicken
“زاك” له ٤ فروع منتشرين في أنحاء القاهرة المحروسة…
حبايبنا اللي بيحبوا ساندوتشات الفراخ الكرسبي، نحب نبشرّهم إن Zack’s حيكون مكانهم المفضل في كوكب الأرض!
حتلاقي في المنيو مجموعة كبيرة ومتنوعة ومتدلّعة من ساندوتشات الفراخ المقرمشة…
كمان بيعمل pasta oven بقطع فراخ كرسبي مقرمشة وغرقانة صوص وموتزاريلا.
دجاج كنساس Kansas Fried chicken
عشاق الفراخ الكريسبي في القاهرة برده أكيد عارفين كنساس!!
اللي بيميّز فراخ كنساس غير إنه عنده مجموعة متنوعة من وجبات الفراخ على حسب جوعك ومزاجك…
هو إن عند مجموعة متميزة ومتنوعة وروشة جدًا من النقنقة (الـappetizers) وأشهرهم التشيكن بوب كورن، والموتزاريلا ستيكس.
،،
تمام يا سيدي؟؟
عرفت حتعمل إيه في الويك إند ولا لأ!!