طموحات بتطلع للنور

طموحات بتطلع للنور

ابداعات كتير ملهاش حصر، حملات توعية، وافكار كتير في طريقها انها تتنفذ على أرض الواقع واضافة وفايدة كبيرة لينا احنا كمشاهدين ومتابعين قبل ما تكون فايدة ليهم، وهو ده الهدف اللي عاوزين يوصلوله!

في “بس في مصر”، اتكلمنا مع مجموعة من الطلاب المبدعين من كليات مختلفة، و سمعنا منهم و اتناقشنا في مشاريع تخرجهم، اللي هي قبل ما تكون مجرد فرض دراسي، هو حلم نفسهم يشوفوه بيطلع للنور.

إعلام القاهرة

– مشروع شابوه..

“الناس دي داخلة تتبسط ملهاش دعوة انت زعلان في البيت ولا عندك مشكلة، البسمة لازم تكون دايما علي وشك، عشان اللي داخل دا مش ذنبه حاجة وحقه عليك انه يتبسط ” محمد رضا – أحد فناني السيرك.

مشروع “شابوه”،  فيلم وثائقي صُنع على أيدي طلاب جامعة إعلام القاهرة، بيسقطوا فيها الضوء على حياة فناني السيرك و شخصياتهم ووجهة نظرهم في شغلهم كفنانين في قطاع الاستعراض، و الجزء دا من حياتهم أثر على شخصيتهم لأي درجة!

اعرف اكتر عن مشروع شابوه من هنا: https://www.facebook.com/chapeaumccu/

–  فاصلة..

من وقت للتاني، كل انسان بيحب يفصل دماغه ولو فترة بسيطة من الزمن عن زحمة الشغل و رتم الحياة السريع اللي بيخليه يفقد اتزانه النفسي في كثير من الأحيان.

و دا اللي كان أبطال حكايتنا من كلية إعلام القاهرة عاوزين يوصوله عن طريق صناعتهم ل “فاصلة” .. “فاصلة” هو فيلم وثائقي يناقش بشكل أساسي فكرة التأثير النفسي الإيجابي على الناس عند زيارتهم للمنتجعات البيئية في مصر (أو ما يسمى بال Eco-lodges) مقارنة مع العيش في صخب المدينة والتكنولوجيا.

الفيلم يغطي بعض الأماكن في مصر زي أسوان، سيوة وغيرها..

اعرف اكتر عن مشروع فاصلة من خلال اللينك دا:  shorturl.at/bvLWY

– أمر بالزيارة..

مسجد سيدنا الحسين، السيد زينب، السيدة نفيسة، كلها اماكن زارها مبدعي الفيلم الوثائقي “أمر بالزيارة”

“أمر بالزيارة” فيلم وثائقي عن “المولد”، الوقت والأماكن اللي بيحتفل بيها المصريين بمولد النبي محمد -صلى الله عليه وسلم- أو أسرته أو الأبرار.. الفيلم بيناقش الطقوس اللي بنعيشها كل سنة و بيركز اكتر على اللي جايين هجرة للزيارة، أو المأمورين بيها على حسب تعبير اغلب الناس، وبيطرح سؤال ممكن يكون بيدور في أذهان ناس كتير … هل الزيارة هي تقرب من المعبود، ولا أصبحت عادة؟

اعرف اكتر عن مشروع أمر بالزيارة من هنا: https://www.facebook.com/anordertovisit/

– انفلوچينجا

بسبب طبيعة السوق التنافسية في مجال الإعلام، ظهر في الفترة الاخيرة على مواقع التواصل الاجتماعي المختلفة ما يعرف بال “”Influencers او” الاشخاص المؤثرين” اللي بيكون دورهم بشكل كبير يتمحور حول الإقناع بفكرة معينة أو منتج معين، بالإضافة لزيادة عدد متابعينهم.

انفلوچينجا، هي حركة بدأها بعض من طلاب كلية إعلام القاهرة، بتهدف بشكل أساسي الى توعية رواد مواقع التواصل الاجتماعي – خصوصا الشباب منهم – بأهمية تفاعلاتهم على أي محتوى وايه اللي ممكن يحصل لو تفاعلت مع المحتوى الخاطئ و العكس لو تفاعلت مع المحتوى الايجابي لاي حد مشهور او Influencer.

اعرف اكتر عن انفلوچينجا من هنا:  https://www.facebook.com/Influejenga/

 

اداب لغة فرنسية

“مين مننا ما بيحبش الكرتون المدبلج بالمصري، مين ما بيحبش صوت محمد هنيدي وحسن حسني مثلاً؟”

من الجملة دي استوحى طلاب كلية آداب – قسم اللغة الفرنسية – فكرة مشروعهم، ومنها بدأوا رحلة الدبلجة ليقع اختيارهم على فيلم Nemo لدبلجته باللغة الفرنسية!

و برغم صعوبة الموضوع والمجهود والوقت الضيق اللي عانى منه الطلاب في التحضيرات، قدروا يطلعوا شغل غاية في الدقة و التميز بفضل تعاونهم و مواهبهم اللي استغلوها و استثمروها بشكل محترف في مشروع التخرج.

اتفرج على فيلم Nemo باللغة الفرنسية من هنا: shorturl.at/pL267

  دي كانت عينة بسيطة من مختلف الإبداعات اللي بتحصل حوالينا  في مصر على أيدي شباب عندهم احلام في انتظار انها تطلع للنور.. شاركنا برأيك وتقييمك عن مشاريعهم اللي حكينا عنها ، و قولنا ايه اكتر مشروع عجبك