شخصيات الفيسبوك

شخصيات الفيسبوك

الفيسبوك من يوم ما ظهر و هو مسيطر على حياتنا كلنا.
فيه اللي معندوش تويتر أو انستجرام،بس نادرًا ما هتلاقي حد ماعندوش فيسبوك
من الآخر هو بالنسبة لنا مركز المعلومات الأساسي اللي قرب لنا المسافات وبين لنا المستخبي!
الزيارة اليومية بتاعته متقّلش أهمية عن زيارة الثلاجة بتاعة آخر الليل اللي كلنا منقدرش نستغنى عنها.
وزي ما بنقابل ناس كتير في حياتنا الواقعية بشخصيات مختلفة بنقابل برضو أنواع كتير من الشخصيات في عالم الفيسبوك
وفي أغلب الوقت بيكون فيه تناقض ما بين الشخصية  في الحقيقة والشخصية قدام الشاشة
كله متوقف على طبيعة كل شخص و طريقة استخدام للسوشيال ميديا.
 الأنواع الجاية دي هي أكتر شخصيات بنقابلها على الفيسبوك:       

ال Active ٢٤ ساعة:

ده شخص عايش حياته قدام الشاشة وبيحب يشارك الناس بكل تفاصيل حياته من الآخر مبيعترفش بالخصوصية ولا بيحب يخبي حاجة عن الجمهور. مشاركة كل ثانية وأي حدث في حياته بالنسبة له مسألة حياة أو موت ومتغمضلهوش عين غير لما ينزل السيلفي اليومية.
الشخصية ديه أنت بتعيش معها كل حاجة في حياتها وبتديلك إحساس إن أنت عارفها من زمان أو من باقي عائلتك.

المخبر:

الفضول وباء منتشر عند المصريين إحنا شعب عنده هواية التدخل فيما لا يعنيه عشان كده شخصية المخبر بنقابلها كتير في حياتنا.
ده بقى شيرلوك هولمز في نفسه بنك معلومات متحرك لو حب يجيب قرار حد حيكون عنده معلومات مش موجوده عند السجل المدني و احتمال يعرف حاجات الشخص ميعرفهاش عن نفسه أولوياته اكتشاف التفاصيل الخاصة في حياة كل الناس. ده دايمًا أكتيف وبيراقب في صمت بيلعب دور المشاهد فقط وطبعًا الأقارب أشهر أنواع المخبرين متفرغين لجمع المعلومات وبس.

مهووس الشير واللايكس: 

ده شخص نرجسي بيعمل لايك لنفسه عنده مرض الشير وجمع اللايكس اللاإرادي روح التحدي عنده عالية مينفعش بوست يعدي من تحت إيده من غير ما يعمله شير هو عايش عشان ينول الرضا يعمل شير و يجمع لايكس حتي لو حاجه مش فاهمها كله عشان محبة الجمهور عنده استعداد يبيع نفسه في سبيل اللايكس .

المحلل الاستراتيجي (الفيلسوف) :

ملك الفتيّ ده شخص لقى نفسه على السوشيال ميديا بيحب يعمل نفسه فاهم في كل حاجة وميقدرش يعدي أي حدث من غير ما يقول رأيه فيه
ده شخص عايش في عالم موازي غير عالمنا الحالي تماما معظم بوستاته حكم عميقة وكلام محدش يفهمه لأن هو ذات نفسه مش فاهمة بس هو أول ما بيحصل أي حدث تلقائيًا يقوم مشمّر الكم ويبدأ عملية الفتيّ.

الغامض:

ده بيبقى معانا بروحه بس على الفيسبوك مش أكتر ورغم محاولته للتخفي فهو أشهر الشخصيات على الفيسبوك “ملاك بأخلاقي”  و“رايقة وفايقة” دول ناس ملهاش أي رأي أو نشاط على السوشيال ميديا. لما تفتح الأكونت بتاعهم بتحس إن هو معمول لاستخدامات مجهوله مستحيل تلاقي صورة ليهم وكل الموجود صور مناظر طبيعية.