قواعد الكوارنتين العشرون

قواعد الكوارنتين العشرون

الفترة دي صعبة علي الناس كلها، ما بين ناس زهقانة و ناس قلقانة و ناس مش عارفة تعمل ايه
..في الوقت الكتير اللي بيقضوه في البيت، حاولنا نجمع شوية قواعد كده لو مشينا عليها الفترة دي هتمر بشكل ظريف خفيف و في نفس الوقت مفيد

 : القاعدة الأولي
الكوارنتين بالعربي يعني حظر،يعني تقعد في البيت،يعني القواعد اللي جاية دي لما تحب تطبقها او تجربها ياريت تعمل ده وانت قاعد في البيت

: القاعدة الثانية 
الأكل دايما حل عظيم لكل الحالات،احنا بناكل واحنا زعلانين و مبسوطين و زهقانين فا طبيعي برضو ناكل و احنا محظورين

:القاعدة الثالثة
كل واحد جواه فنان،الفترة دي هتكتشف انك جواك مواهب مدفونة انت شخصيا ماكنتش تعرفها في نفسك

: القاعدة الرابعة
الخناق مالوش ميعاد زي زمان، قبل كده العيلة ماكنتش بتتجمع غير يوم الجمعة فا طبيعي تبقي الخناقة يوم الجمعة.
.دلوقتي استعد لخناقة في اي توقيت و من غير اي مبرر

: القاعدة الخامسة
القاعدة دي بتقولك لحضراتكم ماتكلموش الاكس يا بهايم !! مش عشان انتم زهقانين ترجعوا تنشروا سمومكم علي خلق الله يا توكسيك انت و هي

: القاعدة السادسة
التيكتوك من اساسيات الكوارنتين،اللي ماجربش تيكتوك يبقي ماعش ايام حظر يا جماعة

: القاعدة السابعة
نتفلكس بتحتوي الانسان،معاك مسلسلات من دلوقتي و لحد ما عيالك يكبروا حواليك علي نتفلكس

: القاعدة الثامنة
ارجع للزمن الجميل،اتفرج علي لن اعيش في جلباب ابي،عائلة الحاج متولي و طبعا ماتنساش الحقيقة و السراب يا لص

  : القاعدة التاسعة
اسمع مزيكا كتير و ابدأ اسمع انواع مزيكا جديدة عمرك مافكرت تسمعها يمكن يعجبك لون جديد

:القاعدة العاشرة 
… طالما محظور في البيت يبقي وضب البيت، دي حتي النضافة مطلوبة اليومين دول، قوم كده روق اوضتك و شيل الهدوم اللي علي الكرسي اللي جنبك ده
!! ايوه الكرسي ده

:القاعدة الحادية عشر
خدلك كورس اونلاين، مش لازم خالص يبقي في مجال شغلك او دراستك، ممكن كورس تلوين او كورس طبخ.. اي حاجة تتعلم منها حاجة جديدة

: القاعدة الثانية عشر
اخدت كورس الطبخ؟ قوم اعمل كيكة بقي

:القاعدة الثالثة عشر
ابدأ اتعرف علي اهلك من اول وجديد،هتكتشف انهم ناس لطيفة اوي و يمكن توصولوا لحل لتفادي خناقة يوم الجمعة بعد كده

:القاعدة الرابعة عشر
الفترة دي مش اجازة يا هوانم و يا بشوات،اللي وراه مذاكرة يذاكر و اللي وراه شغل يخلص اللي وراه ..بلاش استهبال

:القاعدة الخامسة عشر
!!ارجعوا تاني للقاعدة الخامسة …يا بهايم

:القاعدة السادسة عشر  
لو في حاجات بقالك سنين بتأجلها زي توضيب الدولاب،اكتشاف اللي تحت السرير و كتاب بقالك كتير عايز تقراه و وقتك ماكنش يسمح..اعمل كده دلوقتي

:القاعدة السابعة عشر
استمتع بالهدوء عشان هيوحشك،افتح الشباك او اطلع البلكونة و اعمل كوباية شاي بالنعناع و اتفرج علي الشوارع و هي هادية و مافيهاش دوشة ولا كلاكسات

:القاعدة الثامنة عشر  
ابعد عن الفتي و الفتايين، الناس في الفترات دي مابتصدق تطلع ابراهيم الفقي اللي جواهم،
“خلي ليك مصدر انت واثق فيه تابع منه الاخبار و تفادي الفويس نوتس اللي بتبدأ “ب مساء الخير يا جماعة انا الدكتور فلان الفلاني

:القاعدة التاسعة عشر
: ارجع تاني للقاعدة الخامسة .. افتكر اني قولتلك بلاش

:القاعدة العشرون
كل حاجة بتحصل في حياتنا بتتوقف علي احنا بنشوفها ازاي، حتي الازامات و المواقف الصعبة لما بنشوف نص الكوباية المليان منها
بنتأكد اننا في نعمة كبيرة و عندنا اسباب كتير جدا نبقي مبسوطين بسببها