تلات مقابلات للزعيم بتقول عنه الكتير
بدأ بلال فضل سلسلته عن عادل إمام، اللي استمرت لتلال حلقات،
:في برنامج “الموهوبون في الأرض” كالتالي
“الأسهل والألذ والأريح هو الحكم على مشوار فنان أو كاتب في جملة وسلام لو في كلمة..
إذا كان الإنسان العادي البسيط اللي بيمارس وظيفة واحدة وليه علاقات إجتماعية محدودة مش هتقدر تحكم عليه بعبارة واحدة..
ما بالك الأمر متعلق بفنان زي عادل إمام قدر يحطم كل الأرقام القياسية اللي سبقته في النجاح الجماهيري”
في المقال ده هنحاول من خلال 3 مواقف في 3 مقابلات
لعادل إمام نكوّن صورة ثلاثية الأبعاد
عن واحد من أهم الممثلين في تاريخ مصر والعالم العربي
- ━━━━━━━━━━━━━━━━━━━━━━━━━━━
-
ممثل زراعي
بيبدأ عادل إمام الحوار بجملة “الواحد اللي يحب المهنة بتاعته، المهنة بتاعته هتحبه”. باين على عادل إمام في اللقاء
اللي اتعرض وقت عرض شاهد ماشفش حاجة إنه متحفظ ودفاعي ومتوتر شوية.
في الوقت ده ابتدى عادل إمام ياخد بطولات في السينما والمسرح،
وبدأ يتكون الزعيم اللي نعرفه دلوقتي، في اللقاء ده إنه بيحب التمثيل ومش شايف نفسه بيعمل أي حاجة تانية،
وبيتكلم عن التفاني اللي بيتطلبه المسرح من الممثل بكل جدية وحب وبيورينا، لو في دقائق قليلة، هو ليه واحد من أقرب الممثلين لقلوب المصريين.
-
أنا أب، عادل إمام أب
في لقاء مع الأسطورة مفيد فوزي، الزعيم مش لوحده، مراته وأولاده وناس كتير من حياته بيتكلموا عنه.
بيتكلموا عن قد ايه الجواز والأبوة أثرت عليه بشكل إيجابي كإنسان وفنان.
وعادل إمام بيتكلم فيه عن علاقته بأبوه اللي اتصاحبوا على بعض “على كبر” وإنه ورث خفة الدم منه، وعن مراته اللي بيقول
انها هي اللي اتجوزته وهي اللي منظمة حياته.
بيتكلم بحب وسعادة وفخر عن عيلته، ولما بيذكر نفسه، وده قليل لما بيحصل، بيتكلم في سياقه
كإبن أو زوج أو أب. بيتكلم بتواضع وصدق، بيتكلم كشخص راضي عن حياته، مش محتاج أكتر من كده…
شخص لقى السعادة في أولاده ومراته وفي علاقته مع أبوه بعد سنين، شخص قدر يفهم حياته فعلاً.
-
أرجوك اعمل الفيلم ده عشان ولادنا
عادل إمام طول عمره مهتم بالسياسة، سواء في فنه أو إنه بيبين ده في المقابلات.
طول عمره شايف إن الفن المصري هو أكتر حاجة بتلم العرب، ودائماً بيتكلم إنه بيمثل لشعوب مش لحكومات.
في حادث إرهابي سنة 1988 كسرت جماعة إرهابية المسرح لفرقة مسرحية،
فعادل إمام قرر إنه يروح أسيوط ويعرض مسرحية الواد سيد الشغال هناك،
بعدها على طول. وبعد كام سنة حس إنه ماعملش كفاية، فقرر يكتب فيلم الإرهابي مع الكاتب لينين الرملي، وسط محاولات متكررة لإغتيال شخصيات مهمة في الدولة، لكن عادل إمام قرر إن ده أحسن وقت إنه يعمل فيلم رأيه إنه يقدر يساعد في الحرب على الفكر الإرهابي في مصر ويدافع بيه عن معتقداته، وفي اللقاء ده بيحكي القصة كاملة.
━━━━━━━━━━━━━━━━━━━━━━━━━━━