لو لسه بتستخدم بلاستيك المقال ده ليك
من فترة سمعنا قرار منع استخدام الأكياس البلاستيكية في البحر الأحمر واللي تم تطبيقه فورا
القرار كان بيقول “حظر استخدام الأكياس البلاستيك بالمحال العاملة
في مجال الغذاء (المطاعم – السوبر ماركت – البقالة – اللحوم – الأسماك – الفواكه والخضروات)
وكذلك الصيدليات، كما يحظر حظرا نهائيا استخدام الأكياس البلاستيك والأدوات البلاستيك
والتي تستخدم لمرة واحدة في كل أنشطة المشروبات والأطعمة مثل السكاكين والمعالق والشوك البلاستيك والأكواب والأطباق والماصات بالمطاعم
وكذلك المراكب السياحية كافة ( السفاري – النزهة – اليومية ) بمحافظة البحر الأحمر
السؤال بقي
ليه القرار ده اتعمل من الأساس؟
الأكياس دي جزء من حياتنا اصلا،بنشتري فيهم كل حاجة وبنستخدمهم في رمي القمامة،تخزين الأكل وحاجات تانية كتير
ناس كتير ماكنش عندها علم بالأضرار اللي بتسببها الأكياس دي او البلاستيك بشكل عام
الدراسات اثبتت ان مادة البلاستيك ليها اضرار كتير علي الحياة في العموم سواء بقي انسان،حيوانات برية وطبعا الحيوانات البحرية
ازاي بقي؟
اضرار البلاستيك علي الأنسان
ناس كتير بتستخدم البلاستيك عشان تحفظ الأكل سخن
الدراسات بقي اثبتت ان تفاعل البلاستيك مع الحرارة بينتج عنه مواد مضرة للأكل
وبتسبب للأنسان امراض خطيرة زي السكر،العقم ومشاكل في الرئة والجهاز المناعي
اضرار البلاستيك علي البيئة البرية
عارف ان سبب موت ٩٨٪ من طيور النورس كل سنة سببه مخلفات بلاستيكية؟
طب عارف ان حيوانات كتير من اللي احنا بناكلها بيبقي جواها بقايا بلاستيكية؟
الأحصائيات بتقول ان كيس بلاستيك واحد بيموت حيوان مخنوق كل ٣ شهور
اضرار البلاستيك علي البيئة البحرية
البلاستيك مادة عمرها طويل،طويل جدا كمان
،يعني مش بيتحلل من مياة مالحة ولا عذبة الا بعد سنين طويلة جدا ممكن توصل ل١٠٠ سنة،والله زي مابقولك كده
فا بتبقي النتيجة ان قاع المحيط بيبقي فيه حوالي ١٠ مليون طن من النفايات البلاستيكية كل سنة،متخيل الرقم
اسماك وكائنات بحرية كتير بتموت بأعداد ضخمة نتيجة وقوعهم في فخ النفايات البلاستيكية
والضحية الرئيسية هي السلاحف البحرية لأنها ببساطة بتخلط بين اكلها والأكياس والزجاجات الفاضية وطبعا ده شئ بيسد قنواتها الهضمية ويموتها
اضرار البلاستيك علي التربة
تراكم البلاستيك علي التراب بيخليها تفقد خصوبتها،البلاستيك بيمنع الأعشاب والنباتات من النمو بسبب انها بتحجب عنها اشعة الشمس فا بالتالي الحشرات اللي عايشة علي النباتات دي هي كمان بتموت ويبدأ يحصل خلل بيولوجي
اصعب حاجة انك تغير حاجة اتعودت عليها طول حياتك
بس لما نبدأ نفكر في الموضوع بشكل اوسع هنكتشف ان استخدامنا الغير ملحوظ والغير مدروس للبلاستيك بيدمر كوكب بأكمله
ده غير اننا عندنا بدايل كتير ومش مضرة للعالم اللي احنا عايشين فيه واللي عايزينه يبقي عالم افضل للأجيال اللي بعدنا كمان
محافظة البحر الأحمر خدت الخطوة العظيمة دي بقرار منع البلاستيك وتوزيع اكياس بديلة غير ضارة علي المواطنين
بلاد كتير اعلنت قرار منع استخدام الاكياس البلاستيكية واهمهم رواندا واللي كانت رائدة في صناعة البلاستيك،
بس كدولة شافت المشكلة من منظور اوسع،وبلاد تانية كتير زي جنوب افريقيا،المغرب،السنغال،الكاميرون وغيرهم كتير
لو بتستخدم بلاستيك كتير
ابدأ دلوقتي في التغيير