كبسولة الإسكندرانية للمطاعم الخفية

كبسولة الإسكندرانية للمطاعم الخفية

اسكندرية بتحب الأكل والأكل بيحب اسكندرية

يعني بعيدا عن انها عروس البحر الأبيض واهم مصيف في مصر الا ان اسكندرية فيها نوع خاص جدا من السياحة اسمها سياحة الأكل

ناس كتير بتيجي اسكندرية يوم واحد عشان تتغدي هناك وتمشي

ودايما ساكني المحافظات التانية بيروحوا اسكندرية عشان يكتشفوا أماكن جديدة للأكل

مطاعم كتير بتاخد شهرة كبيرة حتي لو الطعم والجودة فيهم مش احلي حاجة لمجرد ان اسم المطعم كل الناس عرفاه او واخد شهرة كبيرة

رغم انهم لو سألوا هيكتشفوا مطاعم خفية او مهدور حقها من السياح احلي وارخص بكتير من المطاعم المشهورة علي الفاضي

عشان كده قرر اهل اسكندرية يكشفوا عن شوية اسرار خاصة بيهم عن المطاعم اللي بيحبوها واليكم المنيو

 

وهبة …سلطان الكبدة والسجق

رغم ان في أماكن كتير جدا في اسكندرية بتقدم الكبدة الاسكندراني والسجق الا ان الطعم والتتبيلة عند وهبة غير أي مكان تاني

روح منطقة العطارين وأول ماتشوف المنيو هناك هتبقي عايز تجربه كله من حلاوته

من اول الكبدة مرورا بالكفتة المشوية لحد ماتوصل للكلاوي والقلوب..ساندوتش يدوب في بقك

 

أولاد عبده…اطلب واتمني

وانت واقف بتطلب عند أولاد عبده هتبقي محتار تاكل ايه ولا ايه

مطعم بيلعب علي قدراتك في الاختيار،مكان بيحتوي البني ادم،السندوتشات هناك حاجة فخمة كده

بنرشحلك الروزبيف بالجبنة،الفياجرا الحادق،لحمة زبدة ومعاهم واحد حلاوة بالقشطة

 

صواريخ..لعشاق الطواجن والشطة

لما بتجرب اكل صواريخ وخصوصا الطواجن بتبقي عايز تعيط من فرط اللذة زي ما قال عادل امام

الطواجن هناك بتبقي عايز تاخدها بالحضن،يعني عندك مثلا طاجن الكوارع،طاجن اللحمة بالبصل وطبعا الطاجن الاختراع فول سجق بالموتزريلا

وطبعا لازم نذكر سندوتشات اللسان،المخ والجمبري

 

كشري عالسخن..الكشري علي اصوله

اول ماتدخل مطعم عالسخن في العطارين هتلاقي مكتوب عالحيطة “هذا المطعم يؤمن بالتخصص لذلك لا يوجد لدينا الا الكشري”

ورغم ان المطعم شهرته مش كبيرة بالمقارنة بمطاعم كشري كتير ليها عشرات الفروع الا انك لو بتفهم في الكشري وبتقدر طعم الصلصة وتحميرة البصل،عالسخن هيبقي بالنسبالك ادمان

 

الكيال …دكتوراه في الحواوشي

الكيال في الأساس جزارة وبيقدم مشويات

لكن الحواوشي عنده صعب تلاقي زيه في مكان تاني

اللي مأكلش حواوشي عند الكيال يبقي فايته كتير،لحمة،سجق او بسطرمة

الرغيف بيبقي مليان وياسلام بقي وهو بالجبنة السايحة اللي بتمط،بنتحداك لو تقدر تخلص رغيف كامل لوحدك

 

شي جابي…تاريخ اسكندرية

يعتبر شي جابي من اقدم مطاعم البيتزا في اسكندرية

في شارع هادي متفرع من شارع فؤاد هتلاقي مكان شكله شيك

كل الناس اللي جوه شكلهم مبسوط سواء بالمناخ العام للمكان والموسيقي وطبعا بجمال الاكل الإيطالي هناك

لما تجرب البيتزا هناك وخصوصا بيتزا السجق او باستا السي فوود

هتحس انك مأكلتش اكل إيطالي قبل كده

ده غير ان أسعار المكان ممتازة بالمقارنة بمطاعم تانية كتير بتقدم نفس نوع الاكل

.بنرشحلك شي جابي لو عايز خروجة رومانسية او عشا هادي مع مزيكا حلوة

 

النظامي…الايس كريم كما يجب

معظم المصييفين عارفين أماكن معينة للأيس كريم منذ فجر التاريخ مش بيروحوا غيرهم

رغم ان اللي ماجربش النظامي فايته كتير،محل صغير علي الكورنيش في بحري الا انك دايما هتلاقي الناس واقفة قدامه بالطوابير

الايس كريم او”الجيلاتي” عنده طعمه مختلف عن أي مكان تاني،ده غير ان النكهات اللي عنده كتير وكلها حلوة،بنرشحلك “الكروكان” وادعيلنا

 

اسكندرية مليانة مطاعم عظيمة والاكل فيها يجنن زي محمد احمد،دهب،البان سويسرا،بلبع،صابر

بس احنا حوالنا نجمع شوية مطاعم بتقدم اكل مختلف ومش كل الناس تعرفها،هنستني رأيكم وبالهنا والشفا