الدليل السعيد للإحتفال بالعيد

الدليل السعيد للإحتفال بالعيد

 

زي ما كلنا عارفين ان العيد فرحة واجمل فرحة

خصوصا ان معظمنا بقاله كتير مش بينزل ولا بيخرج فا بنستني العيد عشان نحس بالبهجة اللي بتبقي في الجو حوالينا

 

في المقال ده هنقولك علي شوية حاجات تتعمل في العيد لو لسه مش عايز تنزل من البيت،هنخليك تتبسط وتغير جو من غير ما تطلع بره باب الشقة

وكل سنة وانتم طيبين

 

اول حاجة ممكن تتعمل هو انك تجمع صحابك او قرايبك عندك في البيت وتعزمهم علي الغدا المتين في اول أيام العيد

هتلاقي ان اللمة والضحك والهزار اللي في اليوم ده احلي مليون مرة من أي خروجة و أي مكان عايز تروحه

 

تاني حاجة ممكن تعملها في العيد هو انك تطلع الشيف بوراك اللي جواك

دورعلي وصفة جديدة علي النت واعمل مفاجئة للعيلة اليوم ده،اعملهم فتة مثلا او حمرلهم شوية ممبار،بس هو لو الاكلة باظت احنا ولا نعرفك

 

مين كل فترة بيقول انه هينزل الأفلام اللي بقاله سنة نفسه يشوفها وفي الاخر مش بيعمل حاجة؟ايوه حضرتك

اليومين اللي جايين حمل كل الأفلام اللي بتأجل فرجة عليهم بقالك كتير واتسلي بيهم في العيد

 

لو لسه ماجربتش تشتري لبس اون لاين

يبقي انت فايتك كتير،ادخل دلوقتي اشتري لبس العيد اونلاين واعمل احلي فوتوسيشن فوق سطوح العمارة او في البلكونة

المهم انك تحس بالبهجة بتاعة العيد

 

بقالك كتير بتقول انك عايز توضب اوضتك

عايز ترمي كراكيب كتير ودايما بتكسل والاوضة خلاص مابقاش فيها مكان تقف فيه حتي ،اعتقد إجازة العيد وقت مناسب جدا عشان تعمل كل ده

غير ديكور اوضتك،لونها لون جديد لو زهقان من شكلها،شغل مزيكا حلوة وانت بتوضب وهتبقي لا اجدعها مهندس ديكور

 

العيد يعني مسرحيات،والمسرحيات اللي بنحبها كتير ومايتزهقش منها حتي لو بنشوفهم كل سنة

بنرشحلك تتفرج علي : العيال كبرت،الواد سيد الشغال،المتزوجون،عفروتو وسك علي بناتك

 

طاقتك بتحتاج تتجدد زي باقة الانرنت بالظبط،من الحاجات اللي ممكن تعملها في العيد انك تبعد تماما عن السوشيل ميديا

بعد ما تعيد علي القرايب والصحاب اقفل تليفونك وابعد عن دوشة الناس والاخبار،اسمع مزيكا هادية،اقرا رواية او حتي جرب العب يوجا

هتلاقي نفسك راجع لحياتك بعد العيد بحماس وسعادة

صحابنا الجيمرز،العيد بالنسبالكم يعني

call of duty او GTA

ظبطوا اكلكم وشربكم وعيشوا إجازة العيد جوه العالم بتاعكم

 

لو كل الكلام اللي فوق ده مش عاجبك يبقي جرب انك تنام في العيد

لو نومك بقاله فتره مش متظبط او مش بتنام ساعات كفاية،عندك إجازة العيد كلها تشبع فيها نوم من غير مايبقي وراك حاجة توجع دماغك

 

حاجات كتير ممكن تتعمل في العيد غير الحاجات اللي قولنا عليها

يعني لو حابب تسافرلك يومين تغير جو او تنزل تقابل صحابك وقرايبك مفيهاش مشكلة

المهم بس تاخد بالك علي نفسك وعلي اللي معاك وماتنساش الكمامة في أي مكان هتروحه وعيد سعيد عليك