١٠ أشخاص هتقابلهم في الجامعة
عام دراسي سعيد عليكم كلكم
بمناسبة عودة الدراسة قررنا اننا نحتفل معاكم بأننا نستعرض ١٠ شخصيات
:لازم نكون قابلناهم في المدرسة او الجامعة أو حتى بنشوف نفسنا في الأشخاص دي، وإليكم الاتي
رومانسي الدفعة
ده الشخص اللي بييجي الجامعة عشان يحب وبس، مابيقعدش غير مع بنات
بيبقي هو حلال المشاكل بتاعهم والصدر الحنين واللي مايقدروش ياخدوا أي خطوة
قبل ما يرجعوله وفي الأغلب مثله الأعلى في الحياة بيكون تامر حبيب
اللامكترث بتاع الدفعة
ده بيبقي شخص التعليم مش من أولوياته أساسا، لو نجح يبقي تمام ولو مانجحش مش هيبقي خسر حاجة وزي ما تيجي تيجي بقي
فاشونيستا الدفعة
ده اللي جاي عشان يستعرض محتويات دولابه، كل يوم طقم أروع من اللي قبله ولو بنت في الأغلب عمرك ماهتعرف شكلها أو لون شعرها الحقيقي
دحيحة الدفعة
ده الشخص اللي مش بيجيب اقل من ٩٥ ٪ دايما وفي الاغلب بيبقي شخص مكروه من كل العيال الفاشلة وبيفتكروه دايما قبل الامتحانات عشان يذاكر ليهم
مطرب الدفعة
دايما معاه الة موسيقية ولامم حواليه البنات في المدرج او على السلم وقاعد بيغني وبيحلم بالشهرة حتى لو صوته وحش وبيتصور مع أي فنان بيشوفه
اللي بييجي بعد المحاضرة التالتة
ده الشخص اللي بيبدأ يومه الساعة ١٠ ونص حتي لو عنده محاضرة الساعة ٨ و مش هيبقي فاكر هو في سنة كام
اللي بينجح واسطة
ده بيبقي ابن المدير او العميد او حتى قريب حد من الدكاترة
الشلة اللي بتيجي تفطر وتروح
دول الشلة اللي بيعيدوا سنة تانية للمرة الرابعة، بييجوا يضربوا الفطار ويحبسوا بالشاي ويروحوا بعدها
اللي بينجحوا بالبركة
دول الأشخاص اللي بينجحوا ببركة دعا الوالدين وبتساهيل ربنا وبيتعينوا معيدين في الأخر
الفتاي بتاع الدفعة
اللي عارف حاجة عن كل حاجة وفي الاغلب بيبقي العصفورة بتاع الدكاترة