أماكن للفن في مصر

أماكن للفن في مصر

مصر مشهورة بحاجات كثيرة من ناسها, لجوها, لأكلها و لتاريخها
كل المكونات دي بتعمل مصر بس في عامل أساسي
ممكن متكونوش اخدتوا بالكم منها و هي الفن,  أيوا زي ما بقولك كدة
إحنا كمصريين الفن دا جزء اساسي في حياتنا
كل شارع في شوارع مصر بيحكي حكاية فنية, زي ايه مثلا؟
تعالى يا سيدي وانا اقولك…زي منطقة كوم الدكة بالأسكندرية
الي هزت المدينة بألحان الفنان سيد درويش و زي حي الجمالية بالقاهرة
الي من قلبها ظهرت حكايات الكاتب نجيب محفوظ, وغيرهم كثير
مصر ولدتهم عبر السنين, بس اللي متعرفهوش بقى
إن لسة مصر شوارعها بتحكي حكايات فنية و جواها أماكن روحها بتتنفس فن
زي ايه؟ تعالوا نخوض رحلة فنية بسيطة مع بعض في شوارع
.الأسكندرية اللي ضواحيها مليانة فن
…..

أول محطة عندنا هي محطة الرمل اللي في قلبها ساكن

“بيت جوانا”

بيت جوانا اتأسس سنة 2009, والغرض من تأسيسه هو خدمة المجتمع من خلال الفن وتوفير خدمات ثقافية وفنية للناس من خلال نزولهم وتقديمهم بعض من أعمالهم الفنية  في الشارع أو في أماكن ثقافية مشهورة
في الأسكندرية زي مكتبة الأسكندرية وقصر ثقافة الأنفوشي
بيت جوانا أسسه مجموعة شباب بتحب الفن
وعايزة تقدم فن بيعبر عن المجتمع و دايما بيقولوا عن بيت جوانا
إنه “بيت صغير شايل أحلام ناس كتير”, هم مش بس بيقدموا
عروض فنية دول كمان بيوفروا تدريبات وورش فنية متنوعة
سواء في التمثيل أو العزف على آلات موسيقية أو الغناء
أو حتى الفنون اليدوية والتشكيلية زي الرسم والأعمال اليدوية
.ومؤخرا اطلق قطاع تنمية الطفل

…..

تاني محطة عندنا هى كوم الدكة اللي فيها بنلاقي

“6 باب شرق”

باب شرق6 إتأسست في سنة 2019
وهي مساحة فنية وثقافية تابع لمعهد الجوتة  وهدفها تمكين الفنانين الإسكندرانية من خلال أنشطة ثقافية قائمة على ورش أعمال فنية مختلفة زى التصميم المسرحي، والإخراج، والإنتاج الموسيقي وغيرها من المجالات اللي بيدعم المشهد الثقافي
هى بتوفر للشباب فرصة لعرض أعمالهم الفنية
وفرصة للتبادل والحوار بين الفنانين و التعبير عن ثقافة المجتمع السكندري
اللي ساعد فى تأسيس المشروع هم مجموعة من الشباب السكندري
كانوا بيطالبوا بمكان يساعدهم على التعبير عن أفكارهم الفنية
باب شرق6 بيقدم بشكل خاص مساحة للمواهب الغير معروفة
.وبيوفرلهم فرصة انهم يكتسبوا خبرات مش بس نظرية وعملية كمان

…..

تالت محطة عندنا هى شارع فؤاد اللي فيها ممكن نتعلم من

” فيلا 70 “

ستوديو فيلا 70 للفنون الأدائية بدأ سنة 2016 وهو مساحة فنية جواها ستوديو تدريب موسيقي لتسجيل أغاني وفويس أوفر وفي إمكانية لحجز قاعات مزيكا للبروفات وكمان بتوفر فرص لتعليم
كافة فنون الرقص زي الرقص المعاصر, الرقص اللاتيني
زي السالسا والتانجو), الرقص الهندي, الباليه والهيب هوب)
…من الأخر كل أنواع الرقص ممكن تتعلمه هناك
عندهم كمان قسم فني كامل للرسم والديكور وورش للتمثيل
ولو إنت غاوي رسم على الحيط أو على الأبواب أو بتحب رسم التابلوهات وبورتريهات ممكن تروح هناك وتسيب بصمتك
المكان كمان متاح كمساحة ثقافية للمذاكرة والشغل والتصوير
.بإختصار هدف فيلا 70 إنك تعبر عن نفسك

…..

وآخر محطة عندنا النهاردة هي محطة سبورتنج اللي فيها بنسمع عن

” جراند شاهين “

جراند شاهين اتأسس سنة 2016
وجواه شاهين ارت ستوديو وهو أكاديمية تعليمية للفنانين في إسكندرية بيربط بين
الحرف اليدوية والثقافة والفنون وريادة الأعمال الهدف من تأسيسه هو مساعدة أصحاب المشاريع الصغيرة المتعلقة بالحرف والفنون اليدوية و توفير لهم ورش خاصة
لتعليمهم أصول ومبادئ إدارة المشاريع الخاصة
هدف جراند شاهين بشكل عام هو بناء أكبر مجتمع مهتم
بالفنون والحرف اليدوية فى مصر عن طريق توفير
مدربين أكاديميين متخصصين وحرفيين ضمن برنامج
أكاديمي ودبلومات خاصة بشاهين ارت ستوديو عشان
يقدروا يوصلوا المعلومات اللي عندهم وخبراتهم للمتدربين
وبيوفروا برضو فرصة لعرض منتجات هاند ميد في الستور بتاعهم
.ومكان هادئ للمذاكرة

…..

و هنا نوصل لنهاية رحلتنا, طبعا مش دي بس الأماكن اللي بتوفر فن
…دا في زيها كثير فى كل أنحاء مصر, ادخل على النت و شوف
…هتتفاجئ بكمية الأماكن اللي لسة بتهتم بالفن , الفن جوانا مبينطفيش
.فى حاجات كتير حواليك بتناديك