عادات أصلية من المطابخ المصرية

عادات أصلية من المطابخ المصرية

عادات أصلية من المطابخ المصرية

…..

كلمة “أكل” عند المصريين عاملة زي البحر. موضوع مالوش أول من أخر
سواء أنواعه وأشكاله وبنحب ناكل ايه وازاي وامتى وفين
شعب بيعامل الأكل زي ما بيعامل حبيبته
علاقة مليانة حب وأحترام ومشاعر حلوة كتير
في المقال ده هنستعرض معاكم عادات مصرية
.من داخل المطبخ أو السفرة المصرية

…..

١-الفاكهة اللي تبوظ تتعمل عصير

عندنا عادة غريبة كا مصريين أن الفاكهة لما لونها يبدأ يتغير ويغمق مش بتترمي، ولكن بتتحول الي عصير ولا كأنه جاي من عند أجدعه محل عصير
ونذكر من الفاكهة دي الموز واللي لما لونها بيقلب أسود ست البيت بتحط عليه اللبن والسكر
…ولا من شاف ولا من دري

٢-أنتي هتعملي ملوخية كده؟
!!قومي إشهقي عليها بسرعة

لو أنتي كا عروسة جديدة أو حتى سينجل وقررتي تعملي الملوخية لعيلتك للمرة الأولي، هتلاقي مامتك أو حماتك جايين وراكي للمطبخ يشوفوا عملية صنع الملوخية
ويا سواد ليلك لو نسيتي تشهقي
وكأن الشهقة دي هي اللي بتدي الطعم والريحة للملوخية

٣-العزايم والإعدام

في العزومات المصرية والتي يكثر بها العشم الأوفر بنسمع كلمة تعدمني لو مأكلتش
أكتر ما بنسمع كلمة بالهنا والشفا
بتحس وقتها أنك قاعد مش مرتاح وأنك مضطر تاكل بدل ما تعدم طنط ميرفت

٤-تشرب ايه؟ أشرب شاي

من العادات المصرية الأصيلة أن بعد الأكل لازم شاي…الشاي هو اللي بيظبط الأكلة، الشاي هو اللي بيخليك تحس أن الدنيا لسه بخير
الشاي هو اللي بيدينا أمل في المستقبل
.ويا سلام لو الشاي ده بالنعناع

 

٥-وجع البطن ولا كب الطبيخ

الأم المصرية دايما عندها شعور أنها الشيف الأفضل والأشطر والأهم في العالم، فا بمنتهي البساطة الأكل لو ماخلصش في النفس اليوم هناكله هو هو بكرة، بكرة ماخلصش؟
هناكله بعد بكرة، وبنفضل في الدوامة دي لحد ما الأكل يخلص أو أنت بقي اللي تخلص

٦-الحب الحب.. بلوبيف بلوبيف

في المطبخ المصري، الحب بيتقاس بالأكل، لو مراتك أو أمك راضيين عنك ومبسوطين منك هتروح من شغلك تلاقي ما لذ وطاب من المأكولات والطواجن والمحمر والمشمر، أما بقي لو المدام أو ماما مش طايقينك
فا هتلاقي قلقاس، قلقاس وبس وساعات بقي لما بتبقي
خارب الدنيا أوي يعني هتلاقي علبة تونة مستنياك ومعاها
.رغيف عيش ساقع أو علبة بلوبيف وأعملها أنت بقي

……….

 أيا كانت عاداتك في الأكل، أيا كان بتحب تاكل ايه وازاي
إستمتع دايماََ بفعل الأكل، لأن الأكل هي الحاجة الوحيدة
اللي هتبقي دايما موجودة عشانك، الأكل هي أجمل علاقة ممكن تعيشها
…وبالهنا والشفا