في أماكن المطر

في أماكن المطر

في أماكن المطر

…..

لو سألت أي شخص في أي مكان في العالم عن أيه هو المطر
هيبقي الرد العلمي والمنطقي هو تكثف بخار الماء من السحاب
وسقوطه على شكل قطرات منفصلة على الأرض
أما لو سألت نفس السؤال ده لأي مواطن مصري اصيل
هتسمع تنهيدة طويلة معاها كوكتيل من المعتقدات المصرية
..المرتبطة بالمطر واليكم التالي

…..

١-موسم قلع الجاكيت

المطر بالنسبة للحبيبة بيتمثل في جملة “خدي الجاكيت بتاعي عشان الجو برد” الشباب كلهم رجولتهم بتصحى من النوم أول ما يشوفوا شوية مطر ويقوموا قالعين الجاكيت عشان يدفي حبيبته اللي في الأغلب بتبقى لابسة خمستاشر جاكيت بس برضو بيفضل يقنعها إنها لسه سقعانة
.تخلص الخروجة والباشا حرارته ٤٠ وبتنتهي قصة الحب على كده

 ٢-خطة البيت دايما كسبانة

المطر عند ناس كتير يعني قاعدة
في البيت وقاعدة البيت دي ليها أساسيات كده واللي بتبقى شوربة عدس، كاكاو سخن، برتقال ويوسفندي، سحلب
وطبعاََ طبق الفشار العملاق ويا سلام بقى لو تاخد البطانية
وتقعد متكلفت جواها قدام التلفزيون وأنت راصص قدامك
.طقم السندوتشات والمشاريب وإنسى بقى النزول من البيت

٣-يا مطرة رخي رخي

علي عكس جميع سكان العالم والكواكب
المطرة بالنسبة لينا يعني يلا ننزل ونجري تحت المطر..نعيا بقي ولا يجرى اللي يجرى المهم أننا شعب مش بيفوت مطرة
الا ولازم ننزل نتغرق تحت الشتا وطبعا نقعد نغني يا مطرة رخي رخي
…ده غير إننا بنحب اوي ناكل أيس كريم في الشتا لسبب مجهول

٤-بيات شتوي

المطر بالنسبة لناس كتير يعني بيات شتوي, الناس اللي بتخاف على هدومها وعربياتها بيفضلوا يقعدوا في البيت أطول وقت ممكن في الوقت ده خوفاََ على حاجتهم ده غير طبعاََ إنه فصل لبس الجزم المتوسخة عشان هيبقي دايما في مبرر
.”الجرمة اتبهدلت في المطر”

٥-دعاوي المطر

إحنا كشعب بنستنى نزول المطر عشان ندعي, وقت المطر بالنسبة لينا هو وقت الخير, بنفتح الشبابيك وندعي
بكل اللي في قلوبنا وبيبقي وقت كله تفاؤل
.وتمني أن أبواب السما تبقى مفتوحة

…..

أياََ كان السبب اللي بتحب المطر عشانه
ماينفعش تنكر أبداََ إنه وقت كله روقان
وقت اللي بيحلى فيه سمعان فيروز، الذكريات والسهر
…ووقت عشان تحس بقيمة الحاجات الحلوة في حياتك