دليل بابا نويل لرأس السنة بليل

دليل بابا نويل لرأس السنة بليل

دليل بابا نويل

لراس السنة بليل

…..

يمكن ماعندناش تلج في مصر والأجواء اللي بنحتفل فيها براس السنة
مش شبه اللي بنشوفها في الأفلام الأجنبي بس عموما إحنا شعب
بيحب جدا الفرحة والفسح والتغيير، عشان كده في الأرتيكل ده
حاولنا نجمعلكم شوية أماكن هتحس فيها بأجواء الكريسماس وبهجة راس السنة واللي فيها هتقدر تاخد صور حلوة وتتفسح فسحة حلوة واليكم التالي

…..

١-أركان بلازا – الشيخ زايد

أركان بلازا زي ماهو مليان كافيهات ومطاعم
هتلاقي كمان هناك شجر الكريسماس اللي مليان الوان وزينة والديكورات اللي بتتعمل هناك
هتخليك تحس فعلا بروح الكريسماس واللي تقدر تستقبل فيها بداية سنة جديدة ومش لازم كمان تدفع أي حاجة هناك

 

 

كايرو فيستيفال سيتي – التجمع الخامس

كل اللي هتحتاجه معاك هناك جاكيت تقيل وموبايلك وإتصور بقى أجمل صور مع النافورة الراقصة وأشجار الكريسماس، التفاصيل اللي هناك هتخليك تحس فعلا إنك مش في مصر وطبعا لو حسيت إنك جعان الفود كورت موجود

 

 

Capital Business Park

من أجمل الأماكن اللي ممكن تقضي فيها الكريسماس الشجر والديكورات اللي بيعملوها هناك شكلهم تحفة. وكل اللي هتحتاجه معاك موبايلك وإلبس الحتة اللي على الحبل واتصور احلي صور هناك

 

 

 

 Zed Park

جاهز تسافر بره مصر من غير ما تطلع بره مصر؟ ده بالظبط اللي هتحسه اول ما تدخل هناك، ملاهي كاملة والعاب للعيلة كلها إستعراضات وحفلات طول السنة من أجمل الأماكن اللي ممكن تروحها لو بتدور على خروجة ماتتنسيش ليلة راس السنة

تيفولي دوم – اسكندرية

اسكندرية كمان ليها نصيب في الارتيكل تخيل بقي تبقي بتستمتع باحتفالات السنة الجديدة وبتتصور مع شجر الكريسماس اللي كله انوار والوان
وكمان جنبك البحر، في احلى من كده؟

…..

لو بتفكر تقضي يوم راس السنة كله بره، إنت تقدر تخرج اليوم ده
من الصبح بدري وتعمل حاجات كتير عشان تبقى قضيت اليوم
بشكل مميز ومختلف، ومن الأماكن اللي بنرشحهالك برج القاهرة، دريم بارك
شارع المعز، القرية الفرعونية وممكن بقي تنسي كل الكلام ده وتدخل سينما
…مع علبة فشار كبيرة وكل سنة وأنتم طيبين