التحبيشة, البصل, المخلل والجو العام للأكل على الواقف اللي بيخليك ماتشبعش, كل دي حاجات بتميز الأكلة الشعبية الأولى في مصر واللي فعلا من غيرها اليوم المصري مابيبدأش
وعشان كده إحنا جينا نعرفكوا أشهر 5 عربيات فول في مصر عشان تعرف تبدأ يومك إزاي

….

عربية سعد الحرامي

أشهر عربيات الفول في القاهرة وفي مصر كلها
صاحبها سعد الحرامي شخصية استثنائية وله قصص كتير, وتم استضافته مؤخرا في برامج كتير عشان يعرفوا قصته وسر شهرته
عربية سعد الحرامي هي أقدم عربية فول بالقاهرة, متواجدة في تقاطع شارع شامبليون مع شارع محمود بسيوني قرب ميدان التحرير في وسط القاهرة

….

عربية الجحش

واحدة من أشهر عربيات الفول في مصر ولو أنت من السيدة زينب لازم تفطر من هناك كل يوم
عربية الجحش بتقدم الفول بثلات طرق فقط, بالزيت الحار, وبالزيتون الحلو, وبالزبدة, ولكنه مميز جدا فيهم
طبعا ده بجانب الطعمية والمخلل والبطاطس عشان الفطار يكمل
الجحش بدأ بالعربية و دلوقتي بقى عنده محله الخاص في نفس المكان

….

عربية حمادة شيراتون

زي ما باين من الإسم كده العربية دي موجودة في منطقة

الشيراتون في القاهرة
تعتبر عربية حمادة شيراتون أشهر مكان بيقدم فول وفلافل في منطقة الشيراتون بالكامل, و ذاع صيته عشان يكون من أشهر الأماكن لتقديم الفول والفلافل في مصر
حمادة شيراتون فتح مطعمه بجانب عربيته و ده خلاه في شهر رمضان و وقت السحور بتكون المنطقة المحيطة بالعربية من ازحم الأماكن في مصر
ده بسبب الاجواء المختلفة والجودة اللي بيقدمها, بجانب إنه بيستهدف الشباب وبيجذب الناس من كل الطبقات

….

عربية الجوازات

لو كنت من سكان الإسكندرية فأنت أكيد أكلت عند أقدم عربية فول في إسكندرية
عربية الجوازات عربية متواجدة أمام مكتب الجوازات في منطقة محطة الرمل
يكفي نقول إن من شهرتها وكم الناس اللي بتتجمع وبتجيلها من كل حته عشان تفطر هناك, اشتكى سكان الحي و اتعرضت العربية للإزالة كذا مرة
لكن بترجع تاني بمطالبة من الناس اللي مابقوش يعرفوا يبدأوا يومهم من غير طبق الفول المميز بتاعها

….

عربية عم زغلول

عم زغلول (صديق الطلبة), أشهر عربية فول في الإسكندرية حاليا
ده بيرجع لإختلافه في طريقة التقديم لإن بجانب السندوتشات والأطباق, أنت تقدر تطلب سرفيس يكفي من فردين لخمس أفراد
ده بيكون سرفيس فيه (حاجه من كل حاجه), ودي واحدة من أهم التجارب اللي لازم تجربها
كمان هو بيتميز بالفئة المختلفة اللي بيخاطبها
عم زغلول يملك عربية فول ومطعم بجانب جامعة الإسكندرية بالأزاريطة ده خلى أغلب اللي بيروحوا يفطروا عنده هم الطلبة

وكونه قريب من سنهم ده خلاه يعرف أكتر هما محتاجين إيه و يقدمه بشكل غير تقليدي ومناسب ليهم, بجانب أسعاره واللي تعتبر ممتازة بالنسبة للجودة والكم اللي بيقدمه