دليلك للمذاكرة أونلاين

دليلك للمذاكرة أونلاين

المذاكرة دلوقتي اختلفت خالص عن زمان, دلوقتي بقى في تابلت بدل الكتب وبقت المذاكرة و المناهج على النت
وعشان العالم بيتغير, فإحنا قررنا نعملكم دليل المذاكرة أونلاين عشان الدنيا بقت “سريعة سريعة”  و إحنا لازم نلحقها
وطبعا كلنا عارفين “أنت عمرك ما هتفلح طول ما أنت ماسك الزفت التليفون” بس إن شاء الله الدليل ده يغير من نظرة أهالينا و ننجح و نعدي البراميل

….

 باقة النت

أول وأهم حاجة في المذاكرة أونلاين إنك تعرف تبقى أونلاين أصلا
فأنا آسف فاللي هاقوله ده بس أنت محتاج تجدد باقة النت ومحتاج يبقى في نت
أيوة الاتنين مالهمش علاقة ببعض, مش معنى إنك جددت باقة النت إن هيبقى في نت
فحاول تجدد الباقة وبعدين تشوف حد بقى يوصل نت ليك و للشركة اللي أنت لسه مجدد من عندهم الباقة

….

 المحاضرات والدروس الأونلاين

لو ربنا كرمك و بقى في باقة ونت, فأنا آسف في الكلمة أنت محتاج تسمي الله و تذاكر بقى وتحضر دروسك
حاول دايما تحس بقيمة حاجة زي أنك بتذاكر من البيت مش محتاج تصحى بدري وتنزل ومواصلات و بهدلة
طبعا المحاضرة أو الدرس بيعتمد برضه على النت اللي عند الدكتور أو المدرس
بس مش مهم أنت المعلومة متوفرة عندك من الدكتور أو المدرس تقدر توصلها في أي وقت وتعيدها براحتك
فأنا مضطر أقولك أن يعني بصراحة مابقاش ليك حجة

….

 ماتفتحش لينكات تانية

تخيل بعد ظهور التكنولوجيا الأهالي كانت بتشتكي أن ولادها لما بيذاكروا بيسيبوا الكتب و يقعدوا يمسكوا التليفون
أنت الحكومة بقى مسلماك التابلت في إيدك (رسالة سرية غرضها انك ماتنجحش) فحاول أنت تتفوق عليهم وتذاكر
ماتشتتش نفسك .. ماتفتحش بقى تتطمن كل دقيقتين على رصيدك في البنك و خط إنتاج المصنع و أسهمك في البورصة, يعني حاول تذاكر عشان يبقى عندك بقى كل ده
لازم تعرف أن “التابلت مش للعب ولا اللهو” التابلت عشان يبقى سهل عليك تذاكر وتجمع منهجك كله في مكان واحد ويبقى الوصول له سهل بدون تضيع وقت أو مجهود

….

اللي عايزين نقوله أن إحنا دلوقتي في خطوة تطور مهمة وبنحاول نجاري العالم كله, وفعلا المذاكرة دلوقتي بقت أسهل وأمتع من زمان و في وقت ومجود كتير متوفر,  ومش محتاجين بس منك غير إنك تركز وتتابع المنهج أول بأول وتذاكر .. فقوم ذاكر بقى