أنت كإنسان ربنا خالقك تقدر تميز بين الصح والغلط تقدر تميز بالكويس والوحش وفي الأغلب بنستخدم مخنا ده في إختيار الصح الا بقى لما الموضوع بييجي عند الأكل دايماََ سبحان الله بنختار الأكل السريع ونفضله على الأكل الصحي الطيب زي القلقاس والفاصوليا، بس يعني خلونا نبقى واقعيين شوية ليه ممكن إنسان يسيب البيتزا أو البرجر ويفضل عليهم شوربة الخرشوف؟ زمان مثلا كنا بنشوف أن أكل البيت ميزته أنه ببلاش لحد ما كبرنا وإشتغلنا وإكتشفنا انه مش ببلاش ورفاهية الطفولة دي خلصت خلاص, في السطور اللي جاية هنقولكم ليه إحنا بنحب …الأكل السريع أو أكل الدليفري أكتر من أكل البيت
…..
١-أكل الدليفري عامل زي عفريت علاء الدين
أكل الدليفري مالوش أول من أخر أيا كان المطعم اللي بتقرر إنك تطلب منه بتلاقي عنده العشرات والعشرات من الأختيارات وأنت ومزاجك بقى وحسب ما بطنك تتمنى، أما في البيت فا المنيو اليومي بيبقي محدود حسب مزاج مامتك أو مراتك, النهاردة مفيش غير بسلة ورز
٢-أكل الدليفري بيعاملك معاملة الملوك
أكل الدليفري بيجيلك لحد باب البيت بيجيلك بسرعة وبيجيلك بأي إضافات إنت بتتمناها يعني مثلا عايز جبنة زيادة أو عايز البيتزا بأطراف محشية جبنة كله متوفر أما في البيت فا عشان تاكل لازم تساهم في عملية تحضير الأكل بأي شكل من الأشكال يعني هتروح تجيب حاجة ناقصة من السوق أو السوبر ماركت لو في حاجة مش موجودة على السفرة هتقوم تجيبها لنفسك …الدليفري بيعاملك بشياكة كده
٣-أكل الدليفري ٢٤ ساعة
أكل الدليفري متاح لمزاج وكرش حضرتك في ال٢٤ ساعة طول أيام الأسبوع، أيا كان الوقت اللي نفسك بتهفك على أكلة هتمسك التليفون وفي دقايق هتلاقي الأكل عندك، أما في البيت الأكل ليه مواعيد حضور وانصراف، مفيش أكل متأخر عشان تعرف تنام كويس، لو جعان بليل قوم أعمل لنفسك .كل حاجة ليها توقيت وميعاد إلا الدليفري
٤-أكل الدليفري عامل زي مستر أكس
أكل الدليفري عامل زي مستر أكس has no end يعني عمرك ما هتسمع المطعم بيقولك معلش يا باشا السندوتشات خلصت أو مفيش حاجة ساقعة، دايما مطاعم الدليفري الخير فيها كتير ومالوش أخر أما في البيت فا وارد جدا تسمع مراتك بتقولك صينية البطاطس خلصت يا حبيبي أو مامتك تقولك أخواتك خلصوا الحواوشي كله قبل ما أنت تيجي
٥-أكل الدليفري ليه سحره
سبحان الله يا أخي، أكل الدليفري ليه سحره وإختلافه في الطعم عن أكل البيت يعني ماما اللي بتعملك بيتزا في البيت وتملاها وتحشيها وتحط عليها مكونات حلوة وجميلة مش هتعرف تعمل بيتزا طعمها حلو زي اللي عمو بتاع محل البيتزا اللي بيحطلك شوية عك على عجينة وبنتبسط جدا بطعمها أكل الشارع سحره وسره باتع
…..
في النهاية عايزين نوجه تحية لكل رجالة الدليفري اللي ساهموا في نمو كروشنا وتحسين المزاج العام في حياتنا كا محبين للأكل السريع الجميل
