دليلك لخروجات الصحاب في مصر

دليلك لخروجات الصحاب في مصر

ظبط و كلمني, اشهر جملة بتتقال بين الصحاب, وهي السر اللي مبوظ كل الخروجات تقريبا
لكن لو قررتوا تخرجوا, تظبطوا و تكلموا بعض فعلا , فتعالوا نقولكم على انواع الخروجات اللي هتخرجوها

….

خروجة العربية

طبعا أنت لو عندك صاحب معاه عربية, فكدة أصبح في سبب للخروجة
حتى لو مش عارفين هتروحوا فين, مش مهم
“لإن العرية في حد ذاتها خروجة .. “ما تيجي نلف شوية بالعربية
شوية أغاني حزينة أو مهرجانات, على حسب أنتوا عالم مفرفشة ولا كئيبة
تاكلوا أو تشربوا من أي مكان و أنتوا في العربية .. لإن لو نزلتوا الخروجة باظت كده
و بارك الله فيما رزق

….

خروجة الأكل

النوع الأشهر في كل الخروجات
دي خروجة بيبقى سببها إما في عروض في مكان معين, ف يلا نجرب
أو لإن مافيش أصلا أي مكان تاني ممكن يتراح .. الأماكن كلها محفوظة
طبعا لام نعمل فوتوسيشن للأكل, عشان يبان اننا مبسوطين و اننا غيرنا جو جامد جدا
و بناكل براحة لإن الخروجة هتخلص مجرد ما الأكل يخلص

….

خروجة القهوة

الخروجة الرجالي
بنحاول نتفق سوا على أكتر قهوة عشوائية في الكوكب
طبعا بنروح نقعد في الشارع, بنطلب شاي أو قهوة سادة .. غير كدة حرام شرعا
بنقعد في دوشة مايستحملهاش خبير مفرقعات, من هبد الدومينو و الطاولة
نشد الحجر المتين و نروح مصدعين و مبسوطين
و بتتكرر الخروجة دي 8 أيام في الإسبوع, بدون زهق عادي

….

خروجة البلاي ستيشن

خروجة أول الشهر
لسه قابضين, الجيب مليان .. بلا نصرف بقى
ننزل على أكتر محل بلاي ستيشن دراعاته بايظة و قعدته صعبة, و العب بقى يا معلم
طبعا خروجة البلاي ستيشن ماتنفعش بعدد أقل من 20 بني آدم .. بنأجر اتوبيس رحلات يوصلنا
و ماينفعش تبقى أقل من 6 ساعات, عشان يادوب كل واحد يلعبله ماتش
و باقي الوقت أنت في الإستاد بتتفرج بقى و معاك أكلك و موبايلك عشان ماتزهقش
و رغم كل ده ببنروح برضه مصدعين و مبسوطين

….

خروجة الكافيه

خروجة البنات و المثقفين
دي بتبقى خروجة مافيهاش أكل, احنا هنشرب حاجه و نقعد نتكلم
طبعا في فوتوسيشن للمشروب .. الأكل مش أحسن منه في حاجة
و بعدين نقعد نتكلم بقى في كل جوانب الحياة, و نحكي عن كل خلق ربنا
و نروح بنفس الصداع برضه

….

“اظن بقى واضح ليه بقى كله بيقول “ظبط و كلمني