أنواع المصريين على الفطار

أنواع المصريين على الفطار

لو كنت في عزومة مع العيلة, أو بتفطر مع صحابك, أو حتى بتفطر مع أسرتك في البيت
فدايما هتلاقي أنواع مختلفة من الناس بتتعامل بطرق مختلفة مع الفطار, والأنواع دي موجودة حوالينا دايما وفي كل وقت
و إحنا كالعادة مانعرفش نشوف حاجة كده ونسكت, فتعالوا معانا عشان تعرفوا أنواع الناس اللي ممكن تقابلوها وقت المغربية في رمضان

….

اللي بيقوم مش قادر يتحرك

النوع الأشهر في مصر, ده اللي بيعوض حرفيا كل ساعات الصوم
و غالبا بيبدأ في الفطار قبل آذان المغرب اصلا, بيسمي الله و يبدأ بقى, و السفرة مابتتشلش قبل السحور
و ده نوع بيبقى باين أوي, بتحس في عينه بنظرة الاشتياق للأكل, بيسأل دايما المغرب أذن ولا لسه
و له جمله شهيرة بيقولها دايما وقت الصيام “أنا الصيام بيعطشني لكن مابجوعش” .. و طبعا كدبه بيبان مع أول ربع فرخه عينه تلمحه

….

الكائن السائل

ده النوع اللي الفطار بالنسباله إنه يشرب
ده غالبا كائن خمسة وسبعين من جسمه محشي و مفتقد للمايّه بس
ده تلاقيه وقت الفطار يفطر على مايّه أو عصير أو شوربة أحيانا
يقوم يصلي المغرب و يلحم فيها التراويح, و بعدين بقى قُرب السحور كده يفتكر يفطر
تقريبا النوع ده بيبقى متغدي قبل ما يجي

….

اللي فطاره خفيف وأكيل الحلويات

ده نوع معتدل بس مش أوي يعني
ده اللي هو يشرب حاجه, يقوم يصلي, يرجع ياكل على خفيف كده
ده النوع اللي في العادي مابيتقلش في الأكل
!بس النوع ده بقى خطر في الحلويات, اللي هو أنا مافطرتش أهو, فين الحلو بقى
ده نوع غالبا هتبقى بتسحب منه صينية الكنافة و هو مروح من العزومة

….

!مش هناكل ولا إيه

ده النوع الأخطر على الإطلاق
مايغركش إنه وقت الفطار مش بيفطر قد كده, ده بيحوش
ده النوع اللي مابيبطلش أكل لحد السحور
!كل تقريبا ساعة ونص ساعتين يقول جملته الشهيرة “مش هناكل ولا إيه!” .. أومال إحنا كنا بنلعب شطرنج
يخلص حادق يدخل في حلو ويخلص حلو يدخل في حادق
و ده النوع المستفز لمشاعرنا كلنا, لإنه في الغالب مابيتخنش بعد كل ده

….

الحقيقة رمضان شهر استثنائي, وكل واحد بيتعامل معاه بطريقته و بالشكل اللي يريحه, و الحقيقة برضه إن العزومات و اللمة مابتحلاش إلا بالناس دول