أفكار مشاريع صغيرة مربحة

أفكار مشاريع صغيرة مربحة

بدأت تنتشر مؤخرا فكرة حب الإستقلال المادي, و إن الواحد يفتح مشروعه الخاص, و احنا النهاردة جايين نديلك فكرة كام مشروع مش محتاجين رأس مال ضخم و في نفس الوقت تكون مشاريع مرحة إلى حد كبير

….

مشروع مغسلة سيارات

ممكن تحس إنك في (بريكينج باد) شوية بس ده واحد من أكتر المشاريع المربحة اللي ممكن تتعمل
الخدمات اللي بتقدمها مافيهاش صعوبة مش هتحتاج إيد عاملة خبيرة أو مكلفة
السوق مليان باللي محتاجين الخدمات دي .. شوف كم العربيات و الموتسكلات و التكاتك و الميكروبصات اللي ممكن تقدملهم الخدمة
كمان المنافسة مش قوية في المجال ده إلى حد كبير, و بالتالي هتقدر تلاقي مكان محترم في السوق ده بسهولة
كل اللي محتاجه إنك تبدأ بمكان صغير لحد ما تتقن كل تفاصيل الخدمات اللي بتقدمها و بعدين تتوسع

….

مشروع الطباعة على الأكياس

مشروع مضمون بشكل كبير لأن الكل بيحتاج إلى الأكياس (أصحاب المحلات والشركات والمؤسسات والمصانع وغيرهم), نسبة لا تقل عن 90% من جميع المشاريع التجارية تحتاج بكل تأكيد الى الأكياس فى عملها اليومي
و ده بيخلي المشروع مربح وناجح فى نفس الوفت
كل اللي أنت محتاجه إنك تسوق لنفسك صح و تستخدم أدوات جيدة للطباعة, ساعتها هتقدر تحقق ربح أكتر من اللي أنت متوقعه

….

مشروع استيراد الملابس

واحد من المشاريع برضه المعتمدة على التسويق بشكل رئيسي
و أول مشروع معانا معتمد على التسويق أونلاين, عشان مش هتحتاج تأجر أو تشتري و تفتح محل هدوم
أنت محتاج مصدر مضمون تستورد منه هدوم سواء خروج أو هدوم بيت
المشروع ده مضمون لإن الخامات بتكون كويسة جدا, و في نفس الوقت سعرها بيكون رخيص بالنسبة للهدوم هنا
فتقدر تبيعها وتكسب فيها بنسبة كويسة جدا

….

مشروع أكل جاهز

تاني مشروع معانا معتمد على التسويق الأونلاين
لو أنت موهوب في الطبخ سواء في عمايل الحلويات أو أكل الطبيخ, وماعندكش مشكلة في إنك تعمل كميات كبيرة
فأنت ببساطة تقدر تبدأ مشروعك من بكرة, لإن الموضوع مش محتاج أكتر من إنك تعمل الحاجة اللي بتحبها
و مؤخرا كمان الناس بقت تميل للأكل الجاهز والأكل البيتي , فأنت لو سوقت صح تقدر تخلي مشروعك مربح بمنتهى السهولة, خصوصا أنت ليك بصمة أو أكلة مميزة ماحدش بيعرف يعملها زيك

….

مشروع عربية مشروبات ساخنة

لأصحاب المزاج والروقان
لو أنت دماغك متكلفة و ليك في المشروبات الساخنة بشكل عام والقهوة بشكل خاص
فده مشروعك .. اختار مكان لطيف وديزاين مختلف للعربية و ابدأ بأقل التكاليف
الموضوع هيحتاج تسويق بشكل مختلف وتقديم خدمة مختلفة ومشروبات تكون مظبوطة
و ساعتها تقدر تبدأ مشروعك و تكبره واحدة واحدة

….

مشروع محل إكسسوارات

من أكتر المشاريع المضمونة
المادة الخام مش غالية و فيها تنوع كبير جدا, يعني تقدر تبيع لكل الأذواق
مافيش بنت أو ست مابتلبسش إكسسوارات, فالسوق كبير والربح مضمون
محتاج أسعار كويسة وتنويع كبير في التصاميم اللي هتقدمها و مبروك عليك مشروعك الجديد

….

الحقيقة في مشاريع كتير جدا وتنوع كبير جدا, احنا حاولنا نعرضلكوا كام مشروع منهم .. أنت عليك بس تفكر إيه الحاجة اللي بتحبها و مستعد تتعب فيها و تاخد الخطوة