معلومات هامة لتلخيص الثانوية العامة

معلومات هامة لتلخيص الثانوية العامة

في أثناء ما الطلاب مستنيين النتيجة و مستنيين تحديد مستقبلهم, جينا النهاردة عشان نطمنكم ونعرفكم إن المجموع مالوش علاقة بمستقبلكم
فتعالوا معانا واحدة واحدة كده و صدقني مش هتمشي غير و أنت شاري

….

التفكير في شغلانة العمر

دايما و احنا صغيرين بنتخيل في دماغنا شغلانة الأحلام
اللي عايز يبقى دكتور, اللي عايز يبقى مهندس, اللي عايز يبقى ظابط, و هكذا
الفكرة بقى إن إحنا بنفكر في سن صغير جدا واحنا لسه ماكتشفناش باقي الشغلانات اصلا
ولا عارفين ايه اللي المفروض نمر بيه عشان نوصل للشغلانه اللي بنحبها
فسيبك خالص من شغلانة العمر دي, لإنك هتكبر و تكتشف إن العالم أكبر من كده

….

لحظة دخول الثانوية العامة

هنا بقى بتبدأ تشوف العالم على حقيقته (شوية), و بيبقى أكبر طموحك الستر والصحة
مرحلة الوحش زي ما كتير من الناس بيقولوا عليها
بس هنا بقى لازم تقتنع إن الثانوية العامة مالهاش أي علاقة بنجاحك أو فشلك في حياتك
لإن تفكيرك في إن دي المرحلة اللي هتحدد مستقبلك, بيوترك و بيضيع مجهودك أصلا
إنت كل اللي محتاج تعلمه إنك تفهم إنها سنة زي أي سنة, و المنهج موجود عشان تفهمه و تستوعبه
اجتهد و اعمل اللي عليك من غير تقصير, و سيب النتيجة تيجي زي ما تيجي

….

لحظة ظهور النتيجة

يوم الهروب من الأهل و البيات برة البيت
اليوم اللي كل الناس بتقعد فيه على اعصابها
مع إن أيا كانت النتيجة والكلية فهي مش نهاية العالم
طالما اجتهدت وعملت اللي عليك خلاص تقبل الموضوع بمنتهى الهدوء
و اعرف إن أكيد ده الخير و هتفهم ده لما تدخل الكلية

….

الكلية

المكان اللي فعلا بيحدد مستقبلك
و ده مش عشان الكلية نفسها, لا, ده عشان ده الوقت اللي بتبدأ تعرف فعلا أنت بتحب إيه
ممكن الكلية مش عجباك, بس تلاقي فيها قسم معين يعجبك
ممكن تبقى حابب الكلية جدا, بس ماتلاقيش الشغل زي ما أنت كنت متوقعه
بتبدأ تشوف الفرص التانية, تشوف المهارات اللي ممكن تتعلمها و تشتغل بيها بعيد عن الكلية
كل الفرص بتكون ادامك, و بيبقى عندك وقت وطاقة, و بتقدر تقرر فعلا عايز إيه
افتكر بس كويس إنك التقدير في الكلية بيفرق لو ناوي تشتغل بدراستك

….

ما بعد الكلية

لحظة إدارك العالم
الوقت اللي هتكتشف فيه إن كان فعلا مافيش حاجة تستاهل توترك وخوفك
اللحظة اللي هتعرف فيها إن طالما اجتهدت هتلاقي
و إن شغلك ومستقبلك معتمد فقط على قد إيه أنت اشتغلت على نفسك مش أكتر

….

سواء كنت شخص قدر إنه يوصل لحلمه و يدخل الكلية اللي عايزها, أو يشتغل شغلانة حلمه
أو كنت شخص ماقدرش يحقق أي حاجه من اللي كان بيتمناها و دخل أي كلية و خلاص
فصدقني الموضوع كله لسه في إيدك, و تقدر في يوم وليلة تغير شكل مستقبلك كله
دور على اللي بتحبه و على موهبتك و اتعلمها واتقنها, لإن هي دي الفرصة الحقيقية
اجتهد في كل مراحل حياتك و ماتنتظرش النتيجة, ذاكر واسهر واسعى وهات اخرك
بس مش عشان الكلية .. عشان نفسك .. لإنك تستاهل