التحضيرات العصرية لمختلف المراحل الدراسية

التحضيرات العصرية لمختلف المراحل الدراسية

بما إن الجو بدأ يغير و غيمة فترة المدارس بدأت تهل علينا, فحبينا نلخصلكوا فترة التحضير للمدارس و نقولكوا شوية نصايح, عشان تعدوا الفترة دي و توصلوا لأول يوم مدرسة بالسلامة

….

مرحلة الحضانة

دي مش محتاجة أي تحضيرات
هي شنطة بس, عشان الطفل يحس إنه بيعمل حاجه مهمة و بتبقى فاضية طبعا
و بنجيب غسالة جديدة, عشان تستحمل هدوم ولادنا اللي كل يوم بيرجعوا متبهدلين من اللعب في الحوش

….

مرحلة ابتدائي

دي أكتر فترة بتحتاج تحضير, أنت مش صغير لدرجة إن ماتبقاش محتاج حاجه
ولا كبير لدرجة إن مش فارق معاك حاجة .. حماس مبالغ فيه
فهنا بقى إحنا بنقدم على قرض, و نبدأ بقى نجيب كل المستلزمات
شنطة أكبر من ابننا, كراريس وقلمة وجلاد, عفشة ماية بمنافعها (زمزمية سابقا)
و حاجة طالعينلنا فيها جديد اسمها (لانش بوكس)
فلوس كلها لو صرفناها صح, كان زمان عندنا أملاك برة مصر

….

مرحلة إعدادي

دي مرحلة البلطجة
هنا كل اللي هنعمله هننزل أقرب صيدلية نلم بقى
ميكروكروم, قطن, شاش, مضاد حيوي, و برشام صداع .. ده للبيت عادي
لإن دي مرحلة ماحدش بيهتم فيها بالدراسة
دي بتبقى مرحلة اكتشاف العالم .. و حب اثبات الذات فكل يوم خناقة بقى
فنحاول مانضيعش فلوسنا غير على الحاجات اللي هنستخدمها فعلا

….

مرحلة ثانوي

هنا الإحتياجات مختلفة خالص
إحنا هنا بنبدأ نطلع كل اللي حوشناه طول حياتنا, و نستلف, و نبيع أملاكنا, و نبيع أعضائنا
عشان نحجز الدروس الخصوصية
دي التحضيرات الوحيدة للمرحلة دي, لإن كده كده ماحدش بيروح المدرسة
فنوفر على نفسنا

….

و في النهاية حابين نقولكم إن أيا كانت التحضيرات اللي بتعملوها, اعرفوا إن نفسية ولادكوا و تحضيرهم للدراسة هي الأهم
و ياريت نتعلم من أخطاء بعض و مانخلفش