هتعمل ايه في الجونة لو أنت مش ساويرس؟
ناس كتير كل معلوماتهم عن الجونة انه مصيف المليونيرات وانك لازم تبقي مليونير مليونير عشان تروح هناك
وناس تانية معلوماتهم عن الجونة انه المكان اللي بيتعمل فيه مهرجان الجونة السينيمائي وبس كده
احنا جايين النهارده نغيرلك معلوماتك دي ونقولك ان الجونة دي للجميع
وأنك مش لازم خالص تبقي ساويرس عشان تروح هناك
ايه الجونة دي بقي؟
الجونة منتجع سياحي جوه مدينة الغردقة او ممكن نقول انها قريبة أوي من الغردقة
الوجهة الأولي ليك لو بتدور علي مكان حلو تقضي فيه شهر العسل لأنها هتخليك تحس بالراحة والأستجمام هناك
الجونة كمان مشهورة بأنها موقع متميز جدا للغطس وللرياضات المائية المختلفة
ولو انت بتحب الروقان فالجونة هتبقي مكانك المفضل بعد كده في السفر
نعمل ايه في الجونة؟
حاجات كتير جدا ممكن تتعمل في الجونة
من اول الأنشطة البحرية زي السباحة، كايت سيرفينج او الصيد او أنشطة برية زي السفاري، ركوب الخيل، الجولف او لعب التنس والسكواش
ده غير انك ممكن تستمتع بالجو والشمس يعني مفيش احلي من كده والله
طب لو انا ماليش في الفرهدة؟
لو انت شخص رايق ومالكش في كل الاكشن ده، الجونة برضه عشانك
هناك هتلاقي كافيهات، مطاعم، مناطق تسوق، نوادي ليلية
ده غير انك ممكن تستمتع بأحياء الجونة زي الحي النوبي اللي هتخليك تحس بالجمال والبساطة، الحي الإيطالي واللي هيخليك تحس انك سافرت إيطاليا
وحي الجولف للناس اللي بتحب الطبيعة والمساحات الخضراء
يلا بينا على الجونة؟
فنادق الجونه معظمها كويسة، فانت تعمل ايه بقي؟
تخش تشوف متطلباتك على مواقع حجز الفنادق وتشوف الفندق اللي حابب تحجزه او تتصل تحجز من الفندق مباشرة
فى نقطة مهمه اوى فى بعض الفنادق للكبار فقط فلازم تتأكد قبل ما تحجز من النقطة دى
الميزه فى الجونه أنك لما بتتمشى فى الميناء أو الممشى ممكن تعدى من فندق لفندق فالموضوع سهل
وفيها كمان مكتبة سفارة المعرفة، والمكتبة دى مرتبطة اليكترونيا بمكتبة الأسكندرية
ويا سلام لو حظك حلو وفى أيفنت يعنى مثلا لو بطولة أسكواش او مهرجان السينما
الجونة بتبقي أجمل و أجمل
المطاعم والكافيهات هناك على قفا من يشيل
لكن لو عاوز تنزل بالسعر شويه ممكن تروح وسط البلد وهتلاقى مطاعم من كل البلاد تجرب اللى انت عاوزة هناك
وانت هناك هتلاقى السوبرماركت جنب كل فندق والصيدليات عادى يعنى كل اللي انت محتاجة هتلاقيه حواليك من غير ماتوجع قلبك
وابقي جرب التوكتوك بتاع الجونة ،اه والله عندهم توكتوك هناك
حلوة الجونة دي يا عماد؟
بعد كل اللي قريته ده لو لسه ماتحمستش فا على الأقل جرب كده وسافر خد فكرة، اوعدك أنك مش هتندم
لو انت من الناس اللي بتحب الهدوء فا المكان ده عشانك
ولو انت برضه شخص بيحب المغامرات فا الجونة عارفة دماغ كل واحد وهتلاقي نفسك فيه
ومتنساش وانت قاعد هناك علي البحر تسمع ٣ دقات وتعيش الموود