إعرف أصل أشهر الأكلات المصرية

إعرف أصل أشهر الأكلات المصرية

إحنا شعب أكيل, مافيش حاجة بتسعده أكتر من الأكل, و بسبب أهمية الأكل عندنا, في الغالب بنحب ناكله بس
لكن مابنحاولش نعرف وصلّنا إزاي ولا مين أخترعه أو إيه حتى سبب تسميته بالإسم ده
فإحنا جينا بقى عشان نقولكوا أصل أشهر الأكلات اللي بتحبوها و ليه اتسمت كده, وأنتوا ركزوا في الأكل  زي ما أنتوا

….

المحشي

وحش الأكلات و نجم السُفر و الحلل والعزومات .. إيه القافية دي!, المهم
أنا عارف إنك ممكن تتصدم لما تعرف إن المحشي أصله تركي
أيوه دي الحقيقة اللي كنا مخبينها عليك
إحنا عرفنا المحشي وقت الحكم العثماني لمصر
و كان إسمه في الأول “دولمة” يعني خضروات محشية بخلطة الرز المتبلة مع اللحمة المفرومة
لكن طبعا لما وصل مصر الموضوع اختلف خالص
“احنا شيلنا اللحمة المفرومة و حطينا خضار و رز بالخلطة بس و اطلقنا عليه “محشي

….

الملوخية

الملوخية كانت نبات بيتم زرعه على ضفاف نهر النيل
و في روايتين لسبب تسميتها بالإسم ده
الأولى : إن الهكسوس أشاعوا خطورة النبات واحتوائه على السموم، ومن هنا انطلقت كلمة “خية” أي سام
و كان بيجبروا المصريين ياكلوها عشان يعذبوهم
بس إحنا حبناها و بقينا نستنى وجبة السم اللي زي العسل دي .. جبروت إحنا برضه

الثانية : إن بيرجع إسم الملوخية إلى رغبة السلطان (الحاكم بأمر الله) في حرمان الشعب من تناول الملوخية
بعدما نصحه بها أحد الأطباء لعلاجه من آلام المعدة
وبمجرد شفائه من الآلام, حب يبقى الوحيد اللي بياكلها
عشان كده منع المصريين من تناولها، فاقتصرت الوجبة على الملك, من هنا حصلت الوجبة على إسم (ملوكية)
و اتحور الإسم بعد كده مع مرور الوقت

….

الكشري

الكشري الأكلة الشعبية الأولى في مصر, أصلها مش مصري .. ايوه صدمة كبيرة أنا عارف
“أول ذكر للكشري في التاريخ كان مع الرحالة (ابن بطوطة) في كتابه “تحفة النظار في غرائب الأمصار وعجائب الأسفار
“ففي وصفه للهند قال “يطبخون الشعيرمع الأرز ويأكلونه بالسمن ويسمونه كشري وعليه يفطرون في كل يوم
وبذلك فالكشري أصله هندي, وانتقل لمصر من خلال التجارة مع الهند .. صدمة أبو طارق نفسه لسه مافقش منها أنا عارف
ولكن معلش يعني الكشري المصري هو الأشهر على الإطلاق في العالم كله, بفضل التقلية والصلصة والدقة المميزة

….

الفطير المشلتت

الفطير المشلتت أكلة فلاحي مصرية -الحمدلله- انتشرت في الريف المصري
وهو من أقدم أنواع الفطير في التاريخ, حيث قدمه المصريين القدماء قربان للآلهة في المعابد
و وضعوه مع المتوفيين في المقابر, لأنه كان يعمل من عناصر لها قيمة مادية كبيرة حينها مثل السمن, والدقيق, والعسل
في مصر القديمة كان يسمى الفطير الملتوت (المطبق)
ومع مرور الأيام أصبح الفطير المشلتت جزءا من الثقافة المصرية

….

الممبار

…الممبار أو القشة أو العصبان أو الفوارغ
تختلف المسميات ولكنها في النهاية وجبة من أهم الوجبات في الدول العربية
الممبار عبارة عن أمعاء الغنم أو البقر الدقيقة, ويتم حشوها بخلطة مكونة من الأرز والبهارات المختلفة
و لكل دول عربية طريقة خاصة بها ومميزة في عمل الممبار
لكن الأصل مصري يعني معلش
تحتكر قبائل بدو سيناء في مصر براءة اختراع أحلى أكلة في الدنيا
فبدأت من البدو المصريين ومن هناك انتشرت إلى بلاد الشام والمغرب العربي والخليج