The Curious Case of الأكل البايت
في أساطير وظواهر مصرية عتيقة وكتيرة محدش يعرف لها أساس ولا يعرف لها أسباب. وتُعتبر من الأسرار الكونية اللي الأجيال كلها بتحاول تتوصل لإجابات عليها.
زي مثلًا أهرامات الجيزة ومين بناها وإزاي…
والسر الأعظم اللي شاغل بالي وقلبي ومعدتي هو… الأكل البايت اللي بيزداد حلاوة تاني يوم!!
،،
من المتعارف عليه إن الأكل لازم يتآكل طازة وسخن في يومها على طول… وده كلنا عارفينه ومتفقين عليه وياما بيوت اتخربت عشان ستات قدَّمت لأجوازها الرُز بايت تاني يوم مثلًا!
لكن مع مرور الوقت وباختلاف الأذواق واختلاف مدارس الطبخ واختلاف نَفَس ستات البيوت… بيفضل فيه كام طبخة وأكلة كل ما بيباتوا لتاني يوم بيبقوا أحلى وأحلى. محدش عارف إيه السر ورا الموضوع ده، لكن خليني أمشي معاكم بعقلي ومعدتي مع اخواتنا الأكيلة ونحزر ونفزر ايه السبب ورا الـ curious case دي! 
١- البامية.
البامية باللحمة والصلصة هي إحدى ألطف وأجمل الأكلات اللي قاعدتها الجماهيرية كبيرة ونسبة أعدائها قليلين جدًا.
وسواء كانت مطبوخة في حلة أو يا سلام بقى لو في بِرام طاجن، فالبامية بالصلصة واللحمة هي الأولى في قائمة الأكلات المحببة لقلبي اللي بتزداد حلاوتها لما تبات. نظريتي المتواضعة هنا بتكمُّن في إن مع تكرار التسخين للبامية على مدار اليومين فبالتالي صلصلتها بتتقل وبتبقى أجمد من أول يوم اتطّبخت فيه.
٢- المحشي.
ملك السفرة المصرية بقوته وحلاوته وخلطته… المحشي طبعًا له وقاره وهيبته ومعروف إنه مفيش أي عزومة أو مناسبة تخلو من المحشي بأنواعه. لكن لو راجعت تاريخ ذكرياتك مع المحشي حتلاقي إن تاني يوم بعد أي عزومة لما بتيجي تأكل المحشي اللي فاضل من العزومة، بتلاقي إن جماله وطعامته زادوا… وخاصةً ورق العنب أو الكرنب اللي مع إعادة التسخين تاني يوم بيقرمشوا كده فتضرب صوباع ورا صوباع.
٣- المسقعة.
في المركز التالت بدون منافسة تأتي صينية المسقعة لتتربع على عرش الأكلات البايتة اللي مبتفقدش سحرها وحلاوتها لما تبات تاني يوم. ورغم إن البتنجان مش من أصدقائي المفضلين إلا إننا منقدرش ننكر إن بشكل ما حلاوته بتزيد لما بيبات لتاني يوم.
٤- السبانخ.
انا عارفة إني ح أخسر قاعدة جماهيرية كبيرة هنا بس معلش… نقول اللي لينا واللي علينا بقى!
السبانخ بتتعامل معاملة الكُفّار بين قوائم الطعام وعلى السفرة المصرية… فيه أطفال كتير كانت كوابيسهم مبنية على أطباق سبانخ بتجري وراهم في الحلم.
لكن الحقيقة بنكبر وبشكل مفاجئ أو شكل غامض ممكن نبدأ نحب السبانخ ونتعامل معاها عادي.
السبانخ -لمحبينها فقط واللي تخلّصوا من عقدة طفولتهم- بتيجي في المركز الرابع للأكل اللي لما بيبات طعمه بيبقى أحلى!
،،
الحقيقة إن حب الأكل بحر واسع ومبينتهيش… وعلاقتنا بالأكل من أعظم الـ relationships اللي بنعيشها. والنهاردة كنّا في جولة سريعة في “الأكل البايت Zone”. والموضوع مكعبل زي ما انتم شايفين.
وأكيد كل واحد فينا ممكن يكون عنده قائمة تانية من الأطباق اللي هو شايف إنها لما بتبات لتاني يوم بتبقى أحلى… فيا ريت تشاركونا بيها أثابكم الله ويبقى زيتنا في دقيقنا يعني… 😂😂
،،
زيكا
Podcast: Play in new window | Download