هابي نيو يير يا عم سعيد
أيام قليلة وحنوّدع ٢٠١٨ ونستقبل سنة جديدة سعيدة إن شاء الله.
وخلّينا نتفق إنك لو بتقرأ المقال ده، فده معناه إنك -الحمد لله- مش مسجون ولا مقتول ولا عيان بعد الشر…
فيا سيدي ألف مبروك إنك وصلت بالسلامة لآخر السنة. *صوت زغاريد وضرب نار في الخلفية*
،،
إنجازك الكبير الحقيقي هو إنك نجوت بنفسك… survived يعني.
مش مطلوب منك تكون أخدت نوبل أو أوسكار أو تكون اكتشفت كوكب عاشر في المجموعة الشمسية، كفاية إنك تكون كويس… سليم نفسيًّا وجسديًا… كسبت صاحب أو اتنين جداد، حققت إنجازات صغيرة في شغلك أو جِبت درجات وتقديرات في دراستك.
وعلى أبواب ٢٠١٩ خُد من أختك شوية نصايح جايز تفيدك وتنوّر طريقك وامسح رجلك وادخل السنة الجديدة على نضافة… دخول رايق يسبب حرايق
١- ابن خالتك مش أحسن منك، انت زي الفل!
على مدار الـ١٢ شهر اللي فاتوا، انت أكيد عملت انجازات كتيرة، مش مهم حجمها قد إيه ولا مدى تأثيرها قد إيه… متقارنش نفسك ولا تقارن إنجازاتك باللي حواليك، ولو مهما أمك قالتلك إن ابن خالتك أحسن منك… متصدقهاش!
٢- الصاحب الناقص بناقص!
في الكام يوم اللي فاضلين دوول في السنة قلَّب ذكريات الـ٣٦٥ يوم وشوف مين وقف جنبك وساعدك وعلَّمك عشان تكون شخص أفضل، ومين سابك في أسوأ أيامك وأصعبها… اللي سابك ده سواء كان صاحب/ حبيب/ قريب، بكل أريحية أقدر أقولك سيبه في ٢٠١٨ ينتهي معاها وابدأ ٢٠١٩ على رواقة وبشياكة مع الجدعان اللي وقفوا كتف في كتف ودائمًا عايزينك أفضل في كل حاجة.
٣- هو ده الوقت المناسب!
مفيش وقت أحسن من اليومين دوول اللي احنا فيهم عشان أي تغيير كبير انت مستنيه أو أي قرار مصيري كنت مأجله، تبدأ تآخده دلوقتي… عايز تغيّر مجال دراستك، عايز تشوف شغل تاني، عايز تتجوز، عايز تفركش، عايز تهاجر… هو ده الوقت المناسب!
لحظة العبور من سنة لسنة هو وقت إتخاذ القرارات المصيرية… تبدأ صفحة جديدة كده على رواقة ونضافة وبنفس مشرقة ومستعدة للتغيير ونشمّر كده وندخل بقلب جامد على مراحل جديدة. 
٤- ساعة لقلبك!
مع بداية سنة جديدة هتحتاج تحدد جوانبك العاطفية أخبارها ايه!
حب جديد في حياتك ولا علاقة معفنة بتحاول تنساها… أياً كان ايه ما تسيبش أسامة منير اللي جواك يسيطر عليك ومع بداية السنة أوزن قراراتك اللي من قلبك مع عقلك عشان ما تتعبش كتير وتلبس تاني. محدش فيه حيل ولا صحة والله لوجع قلب… احنا ماشيين بالعلاج!
٥- البركة في الـ ٣٦٥ الجايين!
سيبك بقى من جو النيو يير نيو مي… والـ Year resolution والكلام اللي مبيأكلّش عيش ده، عندك سنة بحالها تحددلها أهدافك وطموحاتك ورتب ورقك، شوف عايز تحقق ايه بالترتيب وخليك فاكر إن علي عسيلي وعدوية قالوا انت تقدر!
ممكن متبقاش عندك هدف محدد واضح وصريح دلوقتي…
بس خلي دايمًا هدفك الرئيسي إنك تكون إنسان أفضل، إنك تكون أطيب… تبقى مصدر فخر لأهلك وسند بجد لصحابك وزمايلك، وباقي الأهداف تيجي في السكة مش مشكلة… معانا 365 يوم يعني هي الدنيا طارت!! 😂
وهابي نيو يير يا عم سعيد… 😄❤