مصيف زمان ومصيف دلوقتي

مصيف زمان ومصيف دلوقتي

مين فينا مش فاكر مصيف زمان!؟

رغم ان كل حاجة بتتغير بسرعة واحيانا بتتنسي بالوقت لكن في حاجات مهما عدى عليها الزمن عمرنا ما هننساها
!ايوة ارجع شوية كدة بذاكرتك، بسسسس كدة –

اجازة الصيف يعني مصيف ومصيف يعني اسكندرية، مرسى مطروح وراس البر…..الخ

افتكرت!؟ –

من الحاجات اللي مستحيل تنساها ليلة المصيف وتجهيزاتها: دوشة في كل البيت، البيت كله بيجري،  ماتنساش الكاميرا ، جبت الراكت، هات شرايط الكاسيت ،تعرف تربطلي الطيارة الورق؟ جهزت الكوتشينة؟ هتعملي اكل ايه؟ العوامات محدش يناساها

يالا بينااااا –

مصيف زمان يعني لمة العيلة اللمة الحلوة البسيطة اللي كلها ضحك ولعب على شاطيء واسع كبير ومياه زرقا صافيه، يعني شمسيات ملونة وكراسي البحر اللي بتتفرش على الرملة اللي تقعد عليها بالساعات تضحك من غير ماتحس بالوقت لغاية ما الدنيا تضلم عليك والراجل بتاع الفريسكا اللي كنتوا بتجروا عليه اول ما
.تلاقوه، والكاميرا اللي تقعدوا تتخانقوا مين هيتصور بيها الاول وتجمعوا فلوس من بعض عشان اول ماترجعوا تحمضوا الصور

اما مصيف دلوقتي مع مرور الوقت وتغير الزمن والتطور التكنولوجي الكبير اللي حصل حوالينا بقى عبارة عن هنصيف فين السنادي؟ هنجيب المايوه منين؟ هنطلب ديليفري من اي مطعم؟ نسيت النضارة الشمس مش هتصور معاكوا لأ، بقينا بنكتفي بالقاعده على الكراسي على البحر او البسين عشان ناخد تان من غير ماننزل الماية حتى، ونضايق لو حد رش علينا ماية او جاب علينا راملة، السيلفي اصبح بدل الكاميرا وبقى المصيف هو احسن وقت عشان ناخد فيه صور وننشرها على السوشيال ميديا، البراشوت والبراسيلينج والبانانا بوت بدل الراكت وبدالات البحر والطيارات الورق والكوتشينة، الحفلات بليل بدل تأجير العجل والقاعدة على سور البحر

وبما اننا مش هنعرف نرجع بالزمن لورا واننا عايشين في دلوقتي وان المظاهر والصور مش دايما بتكون حقيقة، حاولوا تخلوا كل حاجة ابسط، نهتم بالحاجات اللي بتدي معنى اكتر للوقت اللي بنقضيه مع اللي حوالينا، ندي لكل حاجة وقتها ونستمتع بيها دلوقتي عشان نقدر نحتفظ بيها زي حاجات زمان “الحاجة لما بنعقدها بتفقد معناها الحقيقي وبتبقى مجرد لحظة

ها بتحب مصيف زمان اكتر ولا مصيف دلوقتي!؟