حقيقة ولا خيال: الهرم
في سلسلة حقيقة ولا خيال بنتكلم في مواضيع تخص تاريخ مصر ممكن تكون مجرد نظريات و ممكن تكون حقيقية …
و في المقال ده هنتكلم عن نظرية ,، و هي ان هرم الجيزه الأكبر ممكن يكون محطة لتوليد الكهرباء..
طبعا ناس كتير مستغربه ازاي هرم الجيزه الأكبر ممكن يكون محطة لتوليد الكهرباء؟ احنا اتعلمنا في كل الكتب انه مقبرة للملك خوفو و لكن كل يوم في اكتشافات و نظريات جديده بتغير فكرتنا عن تاريخنا
تعالوا نتكلم في حاجة حاجة
الهرم اتبنى باكتر من 2 مليون حجر ، النظريات بتقول انهم بنوا الهرم ده في اكثر من 20 سنه
النقطة الأولى :
في كذا مشكله كده هم اللي يخلونا نفكر تاني هرم الجيزه مقبره فعلا ولا لا؟ من اهم مميزات اي مقبره للفراعنه هي الحيطان المزخرفه و المرسوم عليها بفن وألوان مبهره و الأثار و الكنوز اللي بتكون جوا و أهم حاجة المومياء لكن هرم الجيزه الكبير كان ناقصه حاجات كثير من الكلام ده, و يقال ان الأثار اتسرقت من الهرم, في الحقيقة الهرم فيه أنفاق كثير تؤدي الي عمق رهيب في الأرض ولكن مازالت غير مستكشفه ممكن يكون فيها مومياوات و أثار بس دي كلها نظريات. 
النقطة الثانية:
الهرم في يوم من الأيام كان متغطي بحجر جيري لامع وكان سطح الهرم مسطح تماما و ده يخلي الهرم شبه المراية وكانت بتعكس أشعة الشمس و ده يخلي الهرم معزول تماما من جوا و في سنه 1303 زلزال هد الطبقة دي .
النقطة الثالثة:
يقال أن المصريين كمان استخدموا معدن الدولوميت على جوانب الهرم الداخليه و من اهم خصائص المعدن ده انه بينتج عنه توصيل كهربائي و كل ما الضغط زاد كل ما التيار الكهربائي زاد .
النقطة الرابعة:
الجرانيت اللي في ممرات و أنفاق الهرم ده مادة مشعه و الجرانيت فيه كميات عالية من بلورات الكوارتز ,و الكوارتز ده موصل معروف للبيزوكهربائية, البيزوكهربائية بتحصل نتيجة الإجهاد أو الضغط على الكوارتز , كمان الجرانيت مؤين للهواء جوا الهرم و ده برضه بيزود التوصيل الكهربائي. 
النقطة الخامسة:
ومن المواد المهمة المستخدمة هي الملاط و الملاط ده اللي بيلزق الحجر ببعض و على الرغم من أنه تم تحليله كذا مره ، إلا أن التكنولوجيا الحديثة معرفتش تصنع الجبس المستخدم في بناء الهرم بالظبط ، الجبس ده بيستحمل الضغط الهائل والمذهل و هو أقوى من الحجارة نفسها.
و من الواضح ان الجبس ده او الملاط ساعد في الحفاظ على الهرم دون تغيير لآلاف السنين. 
لو ربطنا آخر أربع نقط ببعض هنقول الله دول فعلا ممكن يكونوا أكتشفوا الكهرباء او الطاقة من الاف السنين..
بس ممكن يكون في سبب تاني لاستخدام المواد اللي ممكن أن تتحمل الضغط العالي و خلونا مننساش ان دي نظريات محتاجين نفكر فيها ..
النقطة السادسة:
أكتشفوا غرفة غامضة بعد ما كانت مخبأة من آلاف السنين ، و الغرفة دي بقى اسمها غرفة الملكة و المفاجأه ان كان فيها قوابض نحاسية ، الأهم من كدا أنه بيقال أن كان في تعليمات مرسومة كرموز على الأرض و يقال أنها بتبين بوضوح
رسم بياني للأسلاك ممكن نقول أن المواد الكهربائية المستخدمة في بناء الهرم الأكبر هي مجرد صدفة.
لان مولد الطاقة محتاج إلى محفز من مصدر ثاني .
و دا بيشرح سبب وجود الأهرامات جغرافيا على أرض طبيعية قوية و ده يخلينا نتكلم في النقطة اللي بعديها. 
النقطة السابعة:
تم اثبات أنه من آلاف السنين نهر النيل كان بيعدي من حيث الأهرامات موجوده دلوقتي و ده بيخلق نظرية ثانية بتقول ان الاهرامات عمرها اكثر من ما احنا متخيلين يمكن عشان كدا مافيش رسومات او كتابات بتقول الأهرامات اتبنت ازاي …
النقطة الثامنة:
في نظريات بتقول ان الهرم كان متوج من فوق بالذهب و انه اتسرق و ده بيفسر المثلث الناقص في أعلى الهرم
بس لو فعلا كان ذهب ، فممكن يكون خلق مسار موصلًا للطاقة لتوجيهه إلى الأعلى للغلاف الأيوني
و زي ما قولنا ان المثلثات دي ممكن توصل الكهرباء و الطاقة الكهرومغناطيسية خصوصا لو حجر الكوارتز اللي ذكرناه في النقطة الرابعة كان موجود في الجزء العلوي منها
طيب لو كل ده حقيقي , ده يخلينا نقول ان نتج عنه الكهرباء اللاسلكية
زي تسلا بالظبط , في معرض العالم 1893 ، نقل تسلا الكهرباء بشكل طبيعي إلى المصباح الكهربائى و ده بيستخدم دلوقتي للعرض اكثر من الوظيفة.
النقطة التاسعة:
على فكره كان في رسومات بتقول اننا اكتشفنا اللمبة و اللمبة دي فيها اسلاك متوصله بانتنا و مستقبل بس دي برضه نظرية
النقطة العاشرة:
لقوا صناديق كبيره جدا من الجرانيت و لكن مافيهاش مومياوات و كان في صندوق غير مكتمل و زي ماقولنا في النقطة الرابعة ان الجرانيت مادة مشعة لكن لو كان في شرخ او مشكلة مش هيعمل الوظيفة دي و فعلا الصندوق ده كان في شرخ ف ده يخلينا نفكر اكثر في احتمالية أكتشاف الفراعنة للكهرباء و الطاقة الكهرومغناطيسية 
تعالوا بقى نسأل نفسنا سؤال .. الفراعنة اللي بنوا ألاهرامات اللي لحد دلوقتي التاريخ عاجز عن تفسير ازاي و امتى اتبنت , الفراعنة اللي بنوا أهرامات بحسابات دقيقة جدا ، الفراعنة اللي استخدموا علم الفلك من أكثر من 7000 سنة ، الفراعنة اللي عرفوا ازاي يستخدموا الألوان بابداع ، و لو قعدنا نتكلم من هنا لبكره هنلاقي حاجات الفراعنة أكتشفوها مبهره السؤال بقى تفتكر كان صعب عليهم أكتشاف الكهرباء؟
طريقة بناء الهرم و العبقرية اللي موجوده في التفاصيل و كل اثبات في ال 7000 سنه حضاره و العلوم والمعرفة يخلونا نقول ان النظرية دي ممكن تكون صحيحة بالعكس يخلونا نفتخر بتاريخنا و في الاخر كلها نظريات و اكتشافات و يمكن تفضل سر للأبد…
في رأيك انت تفتكر الفراعنة وصلوا للكهرباء اللاسلكية قبل تسلا؟
المصادر:
https://www.youtube.com/watch?v=Ko-ZboCzR64&t=891s
https://www.express.co.uk/news/weird/1053641/egypt-giza-pyramid-shock-energy-machine-spt