طرق للمذاكرة تعديك من الفاينل

طرق للمذاكرة تعديك من الفاينل

…الفاينالز يعني البيت والملازم والمذاكرة للصبح. أو في قول آخر البلايستيشن والقهوة وميمز عن إننا مانذاكرش نتفرج عليها واحنا مابنذاكرش

في “بس في مصر” قررنا نبطل فرجة على ميمز احنا كمان ونقدم لكم 3 طرق علمية للمذاكرة عشان تعدي الكام امتحان الجايين على خير

 

 (POMODORO) طريقة الطماطم 

ببساطة حدد لنفسك حاجة واحدة هتذاكرها، اقعد ذاكر لمدة 25 دقيقة من غير أي تشتيت، استريح بعدها لمدة خمس دقائق، وعيد الموضوع 4 مرات. بعد الأربع مرات ممكن تستريح لمدة ربع أو نص ساعة وبعدين ترجع تكرر كل ده تاني

الطريقة دي أفضل من إنك تقعد تذاكر لمدة ساعتين أو تلاتة متواصلين لإنك بتريح في النص فقدرة التحصيل عندك بتبقى أحسن بكتير على مدار الوقت اللي بتذاكره كله

SQ3Rطريقة ال

.Survey, Question, Read, Recite, Review اسمها يخض شوية بس الموضوع مش كبير هي اختصار ل

  الطريقة بتستخدمها لما تيجي تذاكر المادة لأول مرة، بتبدأ بإنك بتتصفح الكتاب أو الملزمة، بتقرا العنواين والصور، وده هيخلق عندك تساؤلات، يفضل انك تكتب الأسئلة دي في ورقة، وده هيفتح مخازن الذاكرة. بعدين هتقرا الكتاب وتخطط على إجابات الأسئلة اللي أنت سألتها. بعدها المفروض تقرا السؤال بالإجابة وتسمعهم كذا مرة. آخر خطوة انك بتقرا الأسئلة وتحاول تجاوب عليها لوحدك، والأسئلة اللي ماعرفتش إجابتها تكتبها على جنب عشان تراجعها بعدين

Deep Processingطريقة ال

أو المعالجة العميقة، والموضوع مالهوش أي علاقة بوسط البلد أو الشغف. الطريقة بيفضل إنك تستخدمها مع الحاجات المعقدة اللي مش عارف تفهمها. ببساطة حاول تفهم السياق اللي الحاجة بتذاكرها بتتكلم عنها أو تحطها في سياق، وتعالج السياق ده فبالتالي تفهم ايه اللي بيحصل عامة وماتنساهوش بدل ما تحفظ الحاجة وخلاص وتنساها بعد كام يوم

أي طريقة من التلات طرق مثبت فعاليتها، المهم إنك ماتشتتش نفسك الفترة دي، لإن أي حاجة تانية ممكن تستنى. حاول تركز الكام يوم دول عشان الامتحانات تعدي على خير، وتتبسط لما النتيجة تطلع