الضحك في مصر

الضحك في مصر

.الضحك من اهم ردود الأفعال اللي بنستخدمها لما نتعرض لأي موقف في حياتنا
دراسات كتيرة أكدت إن الضحك  له تأثير كبير على الصحة ووسيلة لعلاج أمراض كتيرة
و غالباً ده سر إستخدامنا  كمصريين للضحك في كل حاجه في حياتنا احنا الشعب اللي بيتميز
عن غيره بالذات بتعابير وشنا اللي دايما
مش بتكون ماشية مع الموقف “ حتضحك حضحك ، حتتكلم بجد حضحك برضو”
دي القاعدة الذهبية اللي احنا

.كمصريين مستحيل نكسرها أياً كانت المواقف او الظروف
الضحك لغة عالمية بيستخدمها الناس كلها علشان تعبر
عن السعادة اللي جواها بس احنا كمصريين لقينا لها استخدامات تانيه

:الضحك في الوقت الغلط

دي حاجه كده زي اللي بيحصل لما حد من صحابك يوقع فأنت أكيد كمصري اصيل
مش حتساعده يقوم او حتطمن عليه لا أنت حتقرر تقع جنبه بس من الضحك عليه.
دي الضحكة اللي بتطلع في المكان و الزمان و مع الأشخاص الغلط و دي غالبا من اكتر الانواع اللي بنستخدمها
في حياتنا اليومية ومن اكتر الأنواع الملفتة للنظر بتطلع كده لاإراديا زي مثلا وانت قاعد في عزاء
و الناس كلها متأثره و بتعيط في اللحظة دي مخك بيجمع كل المواقف الظريفة اللي حصلت  في حياتك
و يقرر يطلعها عليك بشكل حاله من الضحك الهستيري النوع ده سبب لتدمير علاقات كتير.

:الضحكة الصفراء

دي بقى الضحكه اللي بتطلع من غير نفس حاجه كده زي طبق السبانخ اللي كنا بنستخبى منه
و احنا صغيرين. ضحكه اضطراريه في وش حد انت مش طايقه او على حاجه دمها ثقيل و دي نفس الضحكه
اللي كنا بنستخدمها زمان لما مدرس الدراسات كان بيقول نكتة فلسفيه محدش فهمها غيره
بس طبعا قدرة القوي كانت بتخلينا نضحك.
. دي ضحكه منافقة اللي بتخلي اللي قدامك محتار انت سعيد و مبتسم ولا بطنك قالبة و قربت ترجع في وشه

:الضحكة من القلب

كام مره بطنك وجعتك او عينك فضلت تدمع من كتر الضحك ؟
كام مره كنت بتضحك لمرحلة ان مكنتش عارف تتنفس؟
ده بقى احلى أنواع الضحك بنوصله و احنا في اعلى درجات السعادة و دايما بتطلع
و أنت حولين الناس اللي بتحبها زي شلة الصحاب اللي بتضحك على حاجات ملهاش معنى
.بس مجرد وجودهم مع بعض كفايه. ضحك بيطلع من النفس يهون عليك اي حاجه و بينسيك اي حاجه

:الضحك على الخيبة

 الاعتراف بالحق فضيله مفيش احلى من التصالح مع النفس و ان كل واحد يكون معترف بخيبته ؛
احنا كمصريين معروفين بروحنا الحلوه  و هزارنا اللي ملهوش حل و غالبا ٩٠٪ من الضحك
بيكون تحفيل على  نفسنا  احلى إفيهات  بتطلع وانت في عز خنقتك و شايل هموم  الدنيا
فتقرر تبص علي نص الكبايه المليان و تضحك على حالك و على اللي انت فيه  وده المعنى الحقيقي للروح الحلوه

:الضحك  من باب المجاملة

.عشان المركب تمشي لازم تجامل المجاملة عنصر أساسي لنجاح اي علاقه أيا كانت ايه
عشان تكسب اللي قدامك لازم تديله ضحكه بسيطه حتى لو كانت على حاجه أنت مش فاهمها احنا بتوع الزوق
و الأخلاق وإتربينا ان منحرجش حد مهما كانت الظروف المجاملة عندنا من الأساسيات
. بنحب نجامل بعض و السلام