اكلات و مناسبات
عمرك فكرت في ايه أهم علاقة في حياتك؟
أو ايه العلاقة الوحيدة الي متقدرش تستغني عنها
طبعا الموضوع دة مش محتاج تفكير اهم و احلي علاقة فى حياتنا كلنا هي علاقة الانسان بكرشة
.الأكل بالنسبه لنا مزاج أو كيف جرعة السعادة اللي بناخدها في نص اليوم
احنا شعب أكيل بطبعه فالأكل له معزّة خاصة عندنا احنا ماشيين بمبدأ حاجتين متهزرش فيهم الدين والأكل
.لو زعلان حتأكل لو قلقان حتأكل لو مبسوط برضو حتأكل كل دي شكليات أهم حاجة حنأكل ايه
…احنا كمصريين من حبنا في الاكل بنحب نحشره في كل حاجة
!الشغل بالنسبة لنا أكل عيش ولما نقرر نقفش على حد بنقول له متأكلش بعقلي حلاوة
.الكوسة بالنسبة لنا واسطة والدم الخفيف سكر
الناس حتأكل وشك ومتأكلش بعقلي حلاوة… كلام ملهوش معنى ومحدش بيقولوا ولا يفهمه غيرنا بس كمصريين
مجرد إن له علاقه بالأكل بيخلينا مقتنعين به جدًا وعشان كل ده احنا مينفعش
.يكون عندنا مناسبة من غير ما يكون ليها أكله مميزه
:الكحك في العيد
من عاداتنا اللي مبتتغيرش مهما عدى عليها أجيال في آخر عشر أيام من رمضان تلاقي الست المصرية الأصيلة بتبدأ تجهز أكل العيد
.كحك و بيتيفور و بسكويت وترمس أصل معروفة الكرش اللي دلدل من عزايم رمضان مش كفاية لازم نكمل بنائه في العيد
أصل حكاية كحك العيد بترجع لأيام الفراعنة لما كانت زوجات الملوك بيؤمروا الخبازين يخبزوا الكحك عشان يقدمه للكهنة
اللي بيحرسوا هرم خوفو في يوم تعامد الشمس عليه وكان الخبازون بيخبزوه في أشكال مختلفة بيوصل عددها ل١٠٠ شكل
:الفسيخ في شم النسيم
عيد الانتفاخ من المفترض إننا بنحتفل في شم النسيم ببداية الربيع و زهوره و جوه اللي مفيش زيه
بره مصر بيكتفوا بتلوين البيض بس طبعًا نحن نختلف عن الآخرين إحنا مينفعش يكون في مناسبة من غير أكل
احنا أصلًا بنحتفل عشان نأكل و القاعدة الأولى للاحتفال بشم النسيم في مصر متحاولش تشم ولا تتنفس برة البيت
لأن بيكون فيه سحابة من الروائح العظيمة الناتجة عن الفسيخ والرنجة والملوحة
وأصل العادة دي ترجع برضوا للفراعنة لما كانوا بيحتفلوا بالإله أوزوريس إله البعث و الحساب و الأبدية بعد الموت
.و كان بنسبة لهم شم النسيم عيد ازدهار للنبات وكانوا بييأكلوا الفسيخ عشان يمدهم بالطاقة و القوة
:العدس في الشتاء
شوربة العدس هو الراعي الرسمي لموسم الشتاء ليها مكانه خاصة عندنا كمصريين مينفعش شتاء يعدي علي بيت مصري من غيرها
مجرد بس ما نسمة الهوا تهب علينا بتلاقي ريحة الثوم قلبت البيت و ساعتها بتعرف ان ست الكل بتعمل وجبت المفضلة شوربة العدس
عن اقتناع شديد ان طبق واحد كفيل انه يدفيك و يعملك وقاية من نزلات البرد خلال الشتاء كله
.و ترجع العادة دي لأجدادنا الفراعنة فهم اول من زرعوا العدس و كانوا بيعتبروه من العلاجات الطبيعية
:حلاوة المولد النبوي
اول ما تلاقي شوارع مصر مليانة بالعرايس والأحصنة والحلاوة بنعرف إن المولد النبوي قرب أو موسم غيبوبة السكر
وعشان احنا في مصر بنحب نربط كل مناسبة بالأكل ربطنا المولد النبوي بالحلاوة و العرايس المصنوعة من السكر
وده للتعبير عن الفرحة بالطعم الحلو و العادة دي ترجع لعصر الفاطميين لما كانوا بيعملوا ولائم خلال المولد النبوي
و كانوا بيعملوا الحلاوة و يوزعوها على الحاضرين و كان في واحد من الحكام بيحب زوجته فخرج معها في موكب يوم المولد النبوي
و كانت لبسه فستان ابيض و تاج على رأسها فصناع الحلوة رسموهم في قالب حلوى هي على شكل أميرة و هو على شكل فارس بحصان
.و دي كانت بداية عروسة المولد
علاقة المصري بالأكل علاقة فريدة من نوعها مفيش أي شعب بيقدس الأكل زينا و عشان احنا مميزين في كل حاجة لو لفيت العالم كله
.مش حتلاقي طعم و ريحة المطبخ المصري في أي حته تانية