١٠ اكلات مصرية تحسسك بالأمان

١٠ اكلات مصرية تحسسك بالأمان

الأكل عند المصريين يعتبر من الأشياء المقدسة

و زي ما قال أحمد حلمي في فيلم اكس لارج ان علاقته بالأكل زي علاقة اتنين متجوزين وبيحبوا بعض

ده بقي حالنا كشعب بيتعامل مع الأكل زي ما بيتعامل الحبيب مع حبيبته

ده غير استخدامنا لأمثال شعبية مستوحاه من الأكل زي يا داخل بين البصلة وقشرتها،اللى اتلسع من الشوربة ينفخ فى الزبادى او ادى العيش لخبازه

في المقال ده هنتكلم عن ١٠ اكلات مصرية بتحسسنا بالأمان والسعادة

المحشي

تقريبا مفيش حد هتقابله مش بيحب المحشي

مفيش عزومة مش بيبقي فيها طبق المحشي المشكل واللي بيتكون من كوسة،بتنجان،فلفل وطماطم

ولو الطبق ده مش موجود هيبقي بداله طبق محشي ورق العنب ويا سلام بقي لو محشي كرنب..حاجة عظمة

الفطير المشلتت

المصريين القدماء كانوا بيقدموا للألهة الفطير المشلتت كقربان في المعابد

الفطير ده بقي عظمته انه مابيقولش لأ علي نوع الغموس اللي هتاكله معاه

يعني لو هتاكله بعسل ابيض وقشطة ماشي،هتاكله بمش وجبنة قديمة برضو ماشي

الكشري

الطبق السحري،جواه مكرونة و رز وعدس وصلصة وبصل مقرمش ودقة ثوم وحمص،معاهم شوية شطة بقي وادعيلي

 

الملوخية

الفاطميين كانوا بيسموها ملوكية لأنها كانت تعتبر أكلة الملوك في الوقت ده

وصفتها بتتغير من بيت لبيت

في اللي بياكلها مع الأرانب وتعتبر الوصفة الأشهر على الاطلاق، و في اللي بياكلها مع الفراخ

اما في محافظات الوجه البحري بيحبوها جدا مع الجمبري

 

 

المكرونة البشاميل

المكرونة البشاميل شكلها لوحده يخليك تحس انك جعان

ريحتها تخليك جعان،حاجة كده صعب تتوصف،ومنظر البشاميل كده والجبنة الموتزريلا وهي بتمط….يالهوي يالهوي

 

الفول والفلافل

الفول والفلافل هما اشهر اكلتين في مصر

واحنا كشعب فنان بنتفنن في عمايلهم

عندك مثلا فول بالزبدة،فول بالصلصة،فول بالسجق،فول بالخلطة وفلافل محشية وفلافل بالبسطرمة..وانت وذوقك بقي

 

الكبدة

الموضوع بيبدأ ب”لو سمحت عايز اتنين كبدة” وبينتهي ب هو انا اكلت ١٥ رغيف ولا ٢٠”

الكبدة عموما والاسكندراني خصوصا حلاوتها انها بتدوب كده وياسلام لو معاها قرن فلفل بس خلي بالك من الحموضة بقي

https://www.youtube.com/watch?v=xCgBPYfJ4Pc&feature=youtu.be

 

 

الحمام المحشي

محشي بالفريك أو الرز بالكبد، وبعدها بقي يتحمر أو يتشوي،ده بقي بيتاكل كل علي بعضه

وغير حلاوة طعمه هو كمان مليان فسفور

 

الحواوشي

عبقرية الحواوشي في بساطته،لحمة مفرومة وعيش بلدي وشوية بهارات وشكرا علي كده

بس البساطة دي عايزة طباخ محترف عشان يعرف يظبط طعمها..السهل الممتنع

 

ام علي

اما بقي لعشاق الحلويات

فأم علي تعتبر ملكة الحلويات المصرية،عجينة،سكر،لبن ومكسرات

وتتاكل وهي لسه طالعة مولعة من الفرن

 

المطبخ المصري مليان اكلات تانية كتير واللي بيعشقها المصريين

زي الفتة،الممبار،الفسيخ،رموش الست وغيرهم كتير وكتير

و لو كنا كشعب شاطرين في حاجات كتير فا شطارتنا في الأكل ملهاش مثيل

الناس بتيجي مصر من كل مكان في العالم عشان تجرب اكلنا وتحكي عنه وعن طعامته وجماله

الواحد لازم يروح ياكل بعد المقال ده بقي