٧ كتب ماتتفوتش في معرض الساقية للكتاب
0 comments
٧ كتب ماتتفوتش في معرض الساقية للكتاب
…..
معارض الكتاب رجعت من تاني وكل الناس المهتمة بالكتب متحمسين جدا سواء القراء، الكتاب والناشرين
في الفترة الأخيرة ظهرت كتب شيقة وممتعة جدا سواء في معرض القاهرة الدولي للكتاب ٢٠٢٠ او بعده
. في المقال ده هنستعرض معاكم 7 كتب ماينفعش تفوتهم لما تروح معرض
ساقية الصاوي في الفترة من ١٧ ل ٢٦ أغسطس
١
لوكاندة بير الوطاويط لأحمد مراد
مفيش مفاجأة في الترشيح ده، ده عشان أحمد مراد دايما بيروح لحتت مفيش كتير بيقربوا منها
في الرواية دي أحمد مراد بيرجع بينا بالزمن لمصر سنة 1865
حقبة قليل أوي لما نلاقي حد بيتكلم عنها بالشكل العميق ده
بنعيش مع حياة مصور الأموات “سليمان أفندي السيوفي” اللي قرر يوثق يومياته عن مطاردته
لسلسلة إغتيالات عنيفة لقاتل بيسيب تذكار مع كل ضحاياه،
من الأخر..الرواية دي مينفعش متتشراش، فجأة هتلاقيها بتخدك لعالم غريب من الإثارة والجريمة
عمرهم ما اتقدموا بالشكل ده قبل كده، رحلة ممتعة هتلاقي فيها مزيج مابين الزمن القديم بقصة وحبكات معاصر
٢
إذما لمحمد صادق
ناس كتير بتستني اعمال محمد صادق لحبهم طريقة وصفه للمشاعر وبراعته فيها
إذما رواية بتتكلم عن العلاقات السامة اللي في حياتنا،عن الصحاب اللي بيفضلوا في ضهر بعض مهما طالت السنين
وعن اننا احنا بس اللي نقدر ننقذ نفسنا من أي حاجة بتعدي علينا.
.اذما تعتبر حتي الأن افضل اعمال صادق الأدبية من حيث الفكرة وأسلوب الكتابة
٣
كوابيس قبل النوم لعبدالرحمن حجاج
هو فيه ايه أحلي من ان الكاتب يخليك قاعد علي أعصابك الرواية كلها؟
وفجأة يقرر يكشف كل كروته، فتحس انك خلاص استوعبت كل حاجة، يقوم يشتغلك تانيلحد ما يديك أبعد نهاية تخطر علي بال معاليك
كوابيس قبل النوم تجربة ممتعة لأي قارئ بيحب الكاتب الذكي، اللي ذكاؤه يخليك تسأل نفسك بعد كل جملة
” هو أنا ازاي اتضحك عليا كده؟ “
في إطار درامي نفسي بنكتشف إن مش دايما الكوابيس بتيجي وقت النوم
لا ده ساعات بيبقي النوم هو الوقت الوحيد الخالي من الكوابيس، بتقضي رحلة طويلة مرهقة مع
..الدكتور النفسي يونس أحمد ليل، أكثر دكتور محتاج دكتور يخرج كل كوابيسه المزعجة من دماغه
٤
منازلهم صغيرة لا تستعني لسلمي سامح شمس الدين
اعمال سلمي بتناقش دايما مشاكل المرأة بشكل مختلف
في الرواية دي سلمي بتاخدنا رحلة مع بطلة الرواية اللي بتعيش كل فترة في دار للأيتام
من خلال الرحلة دي بنعرف اكتر عن أحلام البنات وعن المشاكل اللي بتواجههم
ونهاية الرواية كانت غير متوقعة بشكل مبهر
٥
كونداليني لميرنا الهلباوي
مش لازم كل الروايات تبقي معقدة وطويلة وشخصياتها كتير عشان نقول عليها ناجحة
كفاية أوي انك متبقاش قادر تسيبها، ساعات الجمال بيبقي في البساطة
ورواية كونداليني لميرنا الهلباوي
حققت المبدأ ده من أول سطر لحد أخر كلمة في الرواية، مغامرة جديدة جواها ميكس محترم بين
أغلب المشاعر اللي بنتعرض لها بشكل يومي، الضحك، الحزن، الخوف، والهروب
الرواية نقدر نقول انها تجربة لعدم الهروب من مشاكل الحياة، المواجهة
.وازاي نقدر نتقبل صفاتنا سواء خير أو شر وده اللي ميرنا حاولت تعرضه من خلال اليوجا والتأمل
٦
النيدلان لمحمد عصمت
محمد عصمت من الكتاب اللي بيطوروا من نفسهم
دايما،بيكتب بأسلوب السهل الممتنع
لغة ممتعة توصل للقارئ بسهولة من غير تعقيد،عصمت فضل ينقل اللي بيقرا من كابوس للتاني بشكل يخليك مش قادر تاخد نفسك وعمال تفكر ياتري الكابوس اللي بعده هيبقي ايه
الجديد اللي بيقدمه عصمت انه قدر يجمع بين الرعب والغموض ومعاهم شوية رومانسية علي غير عادته
٧
ذات صباح لدينا عماد
مش بيجيلنا كده أوقات بنحس اننا عايزين نعيط ونتشحتف؟ عايزين نعيش مع قصة مأسوية مفيهاش نقطة بيضا واحدة؟
هي دي تجربة رواية دينا عماد الجديدة، قصة رومانسية بحته
بتحكي عن شاب وبنت فاضلهم أيام ويتجوزوا بعد حب سنين
بس عشان كالعادة الحلو مبيكملش، بتحصلهم مفاجأة قبل الفرح بأيام
بتقلب قصة الحب دي كلها
حوار الشخصيات في الرواية رائع كعادة دينا عماد
مميز وممتع يخليك تخلص الرواية في ساعتين زمن من كتر بساطته وحيويته
الحبكات ممكن تكون اتكررت في كذا فيلم عربي قبل كده، بس ده يرجعنا لأول نقطة تاني
..مش أنت نفسك في الشحتفة؟ استلم بقي الهدية دي
ايه الكتب اللي جبتوها من المعرض وعجبتكم؟
مستنيين نعرف منكم