الأفراح في مصر

الأفراح في مصر

بعد التخلص من الوحدة و الإستقرار على شريك الحياة, و بعد ترحيب العيتلين و الإنتهاء من معاناة التحضير للفرح
نيجي بقى للفرح نفسه .. و ده بقى موضوعنا النهاردة

….

الزفة

طبعا أنت عشان تعمل فرح في مصر, ماينفعش تعمل فرح عادي كده
لازم مصر كلها تعرف, وعشان مصر كلها تعرف
فبنعمل حفلة قبل حفلة الفرح نفسها
و دي بقى مش في قاعة ولا مكان محجوز ولا البيت
دي بتبقى في الشارع
سواء و أنت رايح للعروسة أو و أنتوا رايحين القاعة
في خمس ست عربيات لازم يزفوك بطريقة تحس فيها إنهم بيحدفوا “كلاكس” في ودان أي حد معديين جنبه

….

الزفة التانية

و دي بتبقى أثناء دخول العروسين للقاعة
و الزفة دي برضه بيبقوا بيحدفوا المزيكا بس في ودنك أنت والعروسة
لإننا بنرجع بالزمن لفترة ما قبل ال”دي جي” و بتيجي فرقه بالطبل والمزامير بتاخد العريس والعروسة وأهلهم وصحابهم في أضيق حتى في القاعة و هاتك يا احتفال بقى
و أضيق حتى دي بقى مش بتفرق
يعني مدخل القاعة, السلم اللي بيودي ع القاعة ممكن جوه العربية اللي جايين فيها العروسين أصلا

….

طقوس الفرح

طبعا لازم بنعزم خمستلاف نفر بيجي منهم عشرين
بنقولهم المعاد الساعة واحدة الضهر و بننزل احنا القاعة عشان نبدأ الفرح 3 الفجر
بنبدأ برقصة “سلو” و احنا أصلا مابنعرفش نرقص
و بعديها فقرة تعليم الأكل والشرب
لازم الشربات وكل واحد يشرّب التاني, لإن أكيد أنت في السن ده مابتعرفش تشرب لواحدك
و في نص الفرح قبل البوفيه
فقرة التورتة تقطعوا تورتة 80 دور, اللي هو بتطلعوا بسلم عشان تقطعوها
و طبعا لازم تأكلوا بعض لإن أكيد طالما مابتعرفش تشرب لواحدك فأنت مش بتعرف تاكل لواحدك

….

البوفيه

و بما إننا اتكلمنا عن ما قبل البوفيه, فخلينا نتكلم عن البوفيه نفسه بقى
أهم فقرات الفرح … الفقرة اللي بتعرفك مين بيحبك بجد
لإن الدراسات اثبتت إن تقريبا 90 في المية من المعازيم جايين يقيموا الأكل أصلا هما مالهمش دعوة بالفرح
و مجرد ما ياكلوا كل الناس بتطلعلها مشاوير و بيبقوا لازم يمشوا بقى معلش

….

التصوير

طبعا مافيش فرح من غير تصوير (ليلة العمر) بقى ولازم نحتفظ بفيديو ليها
و أنتوا أصلا بعد كده بتتخانقوا مين فيكوا هيدغدغ “سي دي” الفرح الأول
بس فيديو الفرح بقى أصلا له شروط عندنا في مصر
طبعا أول شرط العريس والعروسة ممنوع يظهروا فيه
تاني شرط إنه ياخد كشف حضور بكل المعازيم
فيعدي جنبك كده هو ضارب الفلاش في وشك و يفضل مستني حبه كده غالبا لحد ما المخرج يبلغه “اه حاجز معانا ده” فيعديك و يروح للي بعدك
و الشرط التالت إن ممنوع تستلم الفيديو إلا بعد 16 سنة جواز
تلاقي شخص لطيف بيكلمك و يقولك “حضرتك كان فرحك سنة 1968 الفيديو جاهز يا فندم” تروح أنت وعيالك بقى تستلموه

….

و طبعا أخر الفرح بقى نرن الجرس بتاع المراويح و نشغل “سهر الليالي” عشان نخلص أحلى فرح مصري ماتعملش زيه قبل كده …. خالص