أصول شرب الشاي المصري: مفيش حد بيشربه زينا
تركي، فرابيه، موكاتشينو، شوكلاتشينو.. إلخ، أسماء كتير ومشروبات كتير دخلت حياتنا، لكن مهما رحنا أو جينا هيفضل مشروب شعبنا الأصيل هو الشاي بكل أنواعه وأشكاله
اتفضل شاي” الجملة الرسمية للتعبير عن الترحيب باستخدام مشروب محايد وعام كأنه مش وارد إن فيه حد ما بيحبهوش! وعشان هو أول حاجة بنعزم بيها على غريب عشان يبقى حبيب وفي كل مناسبة سعيدة ولا حزينة الشاي مفيش أحسن منه رفيق يظبطلك المزاج ويعدل الدماغ ويهون الوقت ، مفيش أفضل من المصريين ممكن يكون أحق بالاحتفال باليوم دة
أول طريقة اتعرف بيها شعبنا في شرب الشاي هي كوباية الشاي في الخمسينة ، طريقة “صعيدية صُح” تعدل أي مزاج حتى لو كان إيه! واتسمت خمسينة عشان الكوباية بتتملى لنصها من منطلق إن الشاي ومزاجه في تركيزه وتلقيمته مش في كميته، بس لو حبيت تملى الكوباية لأخرها ساعتها تسميها كوباية شاي عجمية
وبذكر المزاج يُذكر الشاي على الطريقة الشعبية وهو اللي بيتعمل في الرملة وبيتسمى الرمَّالة.. ده كيف لوحده
بعدها ظهروا محبي الشاي الكشري اللي تم اشتقاق اسمه من وجبة المصريين الرسمية وهي الكشري طبعا! بيتلخص عمله في وضع كمية الشاي المستحبة “التلقيمة” سواء خرز أو ناعم، وبعدين السكر وبعدين الميه المغلية، وجدير بالذكر إنك لو بتحبه “تلقيم خفيف” كده إنت بتحب شاي البوستة.
وطبعا ماينفعش ننسى حلاوة الشاي من البراد من على النار عدل، وساعتها نقول عايزين نشرب شاي البنور وما أدراك حلاوة البنور يا أمور
ومن قبل ما تظهر ويكتشف الناس إن “رب الكون ميزنا بميزة”، كانت الميزة عندنا من زمان وهي اسم كوباية الشاي باللبن اللي معظمها لبن وطبعا ساعتها تحلو السقي في الشاي بالبسكويت أو البقسماط وده لوحده عشق لا يعرفه الا قليلون
على جانب تاني من نفس النوع لو بتحب الشاي باللبن بس الشاي يكون أكتر من اللبن إذًا انت من محبي الشاي البربري الجميل
كل اللي فات كوم ولما دخلت الفتلة حياتنا كوم تاني ! الشاي الفتلة أو الطيارة طلَع جيل جديد من محبي الشاي في آخر كام عقد ومن ساعتها فيه أنواع مختلفة من الفتلة بيتم اخترعها عشان يرضي الجيل ده، فظهرت نكهات زي الليمون والقرنفل والحبهان والنعناع.
ونيجي هنا ونقول إن كوباية الشاي الاخضر اللي زاد معجبينها خلال السنين اللي فاتت عشان فوايدها الصحية اللي أحيانا بـيعتقد الناس إنها سحر خاصة لما بتتشرب بعد أكلة من الاكلات اللي بترم العضم زي المحشي أو الكشري مثلا ودة لفعاليته في الهضم وامتداد صحي ومتطور لفكر إن الشاي “بيحبس” بعد الأكل.
عشان كل دة لازم نحتفل بالشاي وبحبنا ليه، النهاردة اليوم العالمي للشاي، كل بلد هتحتفل بيه بطريقتها شاركنا طريقة احتفالك بس أهم حاجة ماتشربش حد شاي بالياسمين