يا ترى صدقت كام إشاعة من دول في ٢٠١٨؟
زي اي سنة، ٢٠١٨ كانت مليانة اشاعات محدش فاهم اللي اخترعها وصلها ازاي. مابين بوست متفبرك لفيديو متركب، الاشاعات و الحقيقة اتلخبطوا و محدش بقى فاهم ايه حصل بجد و ايه كان مجرد بوست يخليك تعمله شير.
انهارده جمعنالكوا اكبر اشاعات السنة دي معظمنا صدقها و لسه فاكرها بجد:
العاق/وليد الشريف
مفيش كلمة تتقال غير “فوتوشوب“
رسم محمد صلاح على حيط مبنى في ليفربول
الصورة متركبة من موقع متخصص في تركيب الصور
اغنية ٣ دقات مسروقة من اغنية اسبانية
مغني لبناني اسمه جوني عجبته الاغنية و قرر يعمل منها نسخة اسباني و وضح الخبر على الراديو
“نسر و كاب” بديل القوات المسلحة لاوبر و كريم
كان مجرد خبر ساخر على صفحة “عمرو الشريف“
جماهير ليفربول تغني “طلع البدر علينا” بعد هدفين لصلاح
الصوت متركب على فيديو لجمهور ليفربول من سنة ٢٠١٣ و كانوا بيغنوا اغنية اجنبية، و الصوت من جمهور الاتحاد السعودي سنة ٢٠١٢
طفلة تمسح دموع صلاح
تاني..”فوتوشوب“
وزارة الرياضة تهرب سعد سمير من وزارة التجنيد
سعد سمير مخلص تجنيد و سبب سفره بدري كان ان الباسبور بتاعه قرب يخلص
السباح السعودي يحصل على المركز ال٤٧ من اصل ٤٧
ده سباح اثيوبي اسمه (روبل كيروس هابتي) و ابن رئيس اتحاد السباحة و طلع الاخير من اصل ٥٩ سباح
محاولة اشعال الكعبة ببنزين
دي محاولة انتحار من ٢٠١٧
غواص مصري من اللي ساعدوا في انقاذ اطفال الكهف في تايلاند
هو كان مجرد في تايلاند بالصدفة و مشاركش في عملية الانقاذ
رجال المطافئ الكرواتيين عند نداء الواجب قبل ركلة الجزاء الحاسمة في كأس العالم
دي مكنتش حالة طوارئ بجد، كان مجرد اعلان للتقليل من استخدام الالعاب النارية عشان بتسبب حرايق
البيض البلاستيك المسرطن وصل مصر
مصر مش بتستورد بيض من برة علشان عندنا اللي يكفي الاستهلاك المحلي و زيادة، و ده كان فيديو عن مصنع لتصنيع لعب الاطفال (سلايم)
عزاء جميل راتب لم يحضر فيه الفنانين و الفنان تبرع بثروته كلها لمستشفى السرطان
فنانين كتير حضروا العزاء و الوصية مكنتش اتفتحت لما ظهر خبر التبرع و اللي طلع مش حقيقي بعدها.
نشر تركيا لصور من كاميرا المراقبة لتقطيع جثة جمال خاشقجي
دي صور من حلقة مسلسل فرنسي اسمه (باركو) الموسم ال٤ الحلقة ٥
حصول مجدي يعقوب على لقب اسطورة الطب في العالم
اشاعة و الدكتور مجدي يعقوب نفاها بنفسه.
